សាកលវិទ្យាល័យកូរ៉េ ចង់ជួយនិស្សិតកម្ពុជាបានសិក្សាជំនាញ AI និងជំនាញបច្ចេកទេស

ភ្នំពេញ៖សាកលវិទ្យាល័យជាតិឆុនប៊ុក នៃសាធារណរដ្ឋកូរ៉េ ដែលផ្ដោតលើជំនាញឯកទេសផ្នែក Semi-conductor (ឯកទេសផ្នែកផលិតផលពាក់កណ្តាលសម្រេច) និង Physical AI (បញ្ញាសិប្បនិម្មិតរូបវន្ត) បានបង្ហាញបំណងបន្តជួយនិស្សិតកម្ពុជា បានសិក្សាលើជំនាញទាំងពីរនេះ ខណៈប្រទេសនីមួយៗនៅលើពិភពលោក ចង់បានធនធានមនុស្សចេះជំនាញទាំងនេះ ចូលរួមអភិវឌ្ឍន៍ប្រទេសជាតិ ។

នៅក្នុងជំនួបពិភាក្សាការងារជាមួយឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ កាលពីរសៀលថ្ងៃទី៧ ខែកញ្ញា ឆ្នាំ២០២៦ សាកលវិទ្យាធិការនៃសាកលវិទ្យាល័យជាតិឆុនប៊ុក (Jeonbuk National University) លោកបណ្ឌិត O-Bong Yang បានឲ្យដឹងថា

សាកលវិទ្យាល័យឆុនប៊ុក កំពុងមានកិច្ចសហប្រតិបត្តិការ ជាមួយសាកលវិទ្យាល័យមួយចំនួនក្នុងប្រទេសកម្ពុជា ហើយក៏មានបំណងពង្រីកកិច្ចសហប្រតិបត្តិការបន្ថែម ជាមួយសាកលវិទ្យាល័យដទៃទៀតនៅកម្ពុជា ។

លោកបណ្ឌិត ក៏បានបង្ហាញបំណង និងចង់ឃើញនិស្សិតកម្ពុជាកាន់តែច្រើន អាចបន្តការសិក្សា នៅក្នុងសាកលវិទ្យាល័យជាតិឆុនប៊ុក ជាពិសេសលើមុខវិជ្ជា Semi-conductor និង Physical AI ខណៈគ្រឹះស្ថានសិក្សានៃសាធារណរដ្ឋកូរ៉េមួយនេះ មានផ្ដោតលើជំនាញកសិកម្មផងដែរ ។

ក្នុងជំនាញនោះ ឯកឧត្តម ឃួន ផុនរតនៈ បានថ្លែងអំណរគុណចំពោះសាកលវិទ្យាល័យឆុងប៊ុក ដែលបានផ្តល់ឱកាសសិក្សាសម្រាប់និស្សិតកម្ពុជា ទាំងអាហារូបករណ៍ និងបង់ថ្លៃ ។ ឯកឧត្តមបានបន្តថា មុខវិជ្ជា Semi-conductor និង Physical AI ជាមុខវិជ្ជាដែលប្រទេសកម្ពុជាត្រូវការក្នុងការអភិវឌ្ឍសេដ្ឋកិច្ចជាតិក្នុងពេលបច្ចុប្បន្ន និងអនាគត ហើយសង្ឃឹមថានិស្សិតកម្ពុជាកាន់តែច្រើន អាចបានទៅសិក្សាលើមុខវិជ្ជាទាំងពីរនេះ នៅសាកលវិទ្យាល័យជាតិឆុនប៊ុក។

ក្នុងឱកាសនោះ ឯកឧត្តមអគ្គរាជទូត ក៏បានអញ្ជើញសាកលវិទ្យាធិការ នៃសាកលវិទ្យាល័យឆុនប៊ុក ដឹកនាំប្រតិភូមកបំពេញទស្សនកិច្ចនៅកម្ពុជា ហើយស្ថានទូតកម្ពុជា រីករាយនឹងជួយសម្របសម្រួលជំនួប រវាងសាកលវិទ្យាល័យ និងក្រសួង-ស្ថាប័នកម្ពុជា ក្នុងឱកាសទស្សនកិច្ច ក្នុងប្រទេសកម្ពុជា ។

បន្ទាប់ពីជំនួបខាងលើ ឯកឧត្តមឯកអគ្គរាជទូត ក៏បានជួបសំណេះសំណាល និងសួរសុខទុក្ខនិស្សិតកម្ពុជា ដែលកំពុងបន្តការសិក្សានៅសាកលវិទ្យាល័យជាតិឆុនប៊ុក ប្រមាណជា ៧០នាក់ ដែលភាគច្រើនកំពុងសិក្សាថ្នាក់មូលដ្ឋានភាសាកូរ៉េ មុននឹងបន្តឈានទៅជ្រើសរើសមុខជំនាញសិក្សានៅឆ្នាំក្រោយ។

ឯកឧត្តម ឃួន ផុនរតនៈ បានបញ្ជាក់ថា ជំនាញ Semi-conductor និង Physical AI ជាមុខវិជ្ជាដែលកម្ពុជាត្រូវការ សម្រាប់អភិវឌ្ឍប្រទេស ដោយឯកឧត្តមបានបង្ហាញនូវក្តីសង្ឃឹមថា និស្សិតកម្ពុជានឹងជ្រើសរើសយកមុខវិជ្ជាទាំងពីរ សម្រាប់ថ្នាក់សិក្សាជំនាញ ។

ជាមួយនេះឯកឧត្តម បានលើកទឹកចិត្តដល់និស្សិតកម្ពុជា ឱ្យខិតខំរៀនសូត្រទាំងភាសាកូរ៉េ និងជំនាញឯកទេស និងឆ្លៀតពេលធ្វើកម្មសិក្សានៅតាមស្ថាប័ននានា ដើម្បីទទួលបាននូវបទពិសោធន៍ការងារជាក់ស្តែង ព្រមទាំងយកចិត្តទុកដាក់ថែរក្សាសុខភាព និងមើលថែគ្នាទៅវិញទៅមក ៕ អត្ថបទ បាន សុខរិទ្ធិ