ករណីចោទថាមន្ត្រីតុលាការនៅសាលាដំបូងខេត្តស្ទឹងត្រែងអនុវត្តខុសនីតិវិធី ក្រសួង​យុត្តិធម៌​សម្រេច​បញ្ជូន​ទៅ​ក្រុមប្រឹក្សាវិន័យ នៃឧត្តមក្រុមប្រឹក្សានៃអង្គចៅក្រម

ឯកឧត្ដម ឯម ច័ន្ទមករា អ្នកនាំពាក្យក្រសួងយុត្តិធម៌បានឱ្យទូរទស្សន៍ BTV ដឹង​នៅ​រសៀល​ថ្ងៃ​ទី១០ ខែកញ្ញា ឆ្នាំ២០២៦ថា ចំពោះករណីឈ្មោះ ស្លេះ ហ្វឺត និងឈ្មោះ ណុះ សូឡោះ ដែល​បាន​លើក​ឡើង​ជុំវិញការចោទប្រកាន់ថា មានការអនុវត្ត​ខុស​នីតិ​វិធី​របស់​មន្ត្រី​តុលាការ​នៅ​សាលាដំ​បូង​ខេត្ត​ស្ទឹងត្រែង សាមីខ្លួន​បាន​ដាក់​ពាក្យ​បណ្តឹង​ផ្ទាល់​មួយ​ទៀត​ទៅ​កាន់​ឧត្តម​ក្រុម​ប្រឹក្សា​នៃ​អង្គ​ចៅក្រម​។

អ្នកនាំពាក្យក្រសួងយុត្តិធម៌បញ្ជាក់ថា ចំពោះករណីនេះ ឯកឧត្តមឧបនាយករដ្ឋមន្រ្តី កើត រិទ្ធ រដ្ឋ​មន្រ្តី​ក្រសួង​យុត្តិធម៌បានសម្រេចបញ្ជូនករណីនេះ តាមនីតិវិធីជាធរមាន ទៅក្រុមប្រឹក្សា​វិន័យ​នៃ​ឧត្តម​ក្រុម​ប្រឹក្សានៃអង្គចៅក្រម ដើម្បីពិនិត្យស្រាវជ្រាវឱ្យបានល្អិតល្អន់ និងចាត់ការជាសមត្ថកិច្ច ក្នុង​ករណីរកឃើញកំហុស ដោយអនុវត្តទៅតាមច្បាប់ និងនីតិវិធី​ក្នុង​ក្របខ័ណ្ឌ​នៃយ​ន្ត​ការ​វិន័យ​របស់​ឧត្តម​ក្រុមប្រឹក្សានៃអង្គចៅក្រម។

ឯកឧត្ដម ឯម ច័ន្ទមករា បានបន្ថែមថា ជាមួយគ្នានេះ ក្រសួង​យុត្តិធម៌​ក៏​បាន​ចាត់​ក្រុម​ការងារ​ចុះ​ធ្វើ​ការ​ស្រាវជ្រាវបន្ថែមលើករណីនេះផងដែរ ហើយដែលលទ្ធផលនៃការចុះស្រាវជ្រាវនេះ នឹង​ត្រូវ​បញ្ជូន​ទៅក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម ដើម្បីជា​មូល​ដ្ឋាន​បន្ថែម​សម្រាប់​ការ​ធ្វើ​អធិការ​កិច្ចរបស់ក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម៕