អ្នកជំនាញវិទ្យាសាស្រ្តនយោបាយ៖ ដំណើការកិច្ចប្រជុំលើកដំបូង UNCLOS ជា​សញ្ញា​វិជ្ជមាន​ខាង​ផ្លូវ​ច្បាប់

តាមការគ្រោងទុក គណៈកម្មការផ្សះផ្សា នៃអនុសញ្ញាអង្គការសហប្រជាជាតិ ស្តីពីនីតិសមុទ្រ (UN​​C​L​​O​​​S) នឹងប្រជុំលើកដំបូងជាមួយកម្ពុជា និងថៃ ស្ថិតនៅប្រទេសសិង្ហបុរី ចាប់ពីថ្ងៃទី១៤ ដល់​ថ្ងៃ​ទី១៦ ខែក​​ញ្ញា ឆ្នាំ២០២៦។ ជាមួយគ្នានេះ អ្នកជំនាញ​វិទ្យាសាស្រ្ត​នយោបាយ​នៃ​រាជ​បណ្ឌិត្យ​សភា​កម្ពុជា យល់ឃើ​​ញថា ​​​ដំណើរកិច្ចប្រជុំលើកដំបូងUNCLOS ជាសញ្ញាវិជ្ជមាន​ខាង​ផ្លូវ​ច្បាប់​។

បណ្ឌិត គិន ភា អ្នកជំនាញវិទ្យាសាស្រ្តនយោបាយ នៃរាជបណ្ឌិត្យសភាកម្ពុជា នៅ​ព្រឹក​ថ្ងៃ​ទី១១ ខែ​ក​​​ញ្ញា ឆ្នាំ២០២៦នេះ មានប្រសាសន៍ប្រាប់BTVថា កិច្ចប្រជុំលើកដំបូង UNCLOS ជា​សញ្ញា​វិជ្ជមាន​មួយ​ដែលភាគីកម្ពុជា-ថៃ បានចូលដោះស្រាយបញ្ហាដែនសមុទ្រនៃប្រទេសទាំងពីរ ក្នុង​ក្រប​ខណ្ឌ​ច្បាប់អន្តរជា​​តិ ​​ជំនួសឱ្យការប្រើប្រាស់សម្ពាធនយោយបាយ ឬក៏សកម្ម​ភាព​ជា​ឯក​តោ​ភាគី​ណាមួ​យនៅលើទីតាំងជាក់ស្តែង។ ហើយសម្រាប់កម្ពុជាបានបង្ហាញឲ្យឃើញថា មាន​ភាព​ចាស់​ទុំ​ គឺការជ្រើសរើសច្បាប់ ការទូត យន្តការសន្តិវិធី ដើម្បីដោះស្រាយបញ្ហាដែនសមុទ្រ និង​ម្យ៉ាង​​វិញ​ទៀតកម្ពុជាមិនចង់ឲ្យបញ្ហាសមុទ្រក្លាយជាវិ​​បត្តិស​​ន្តិសុខទេ។

បណ្ឌិត គិន ភា បានបន្តទៀតថា កម្ពុជាត្រូវប្រុងប្រយ័ត្នបន្តិច ពីព្រោះកិច្ចប្រជុំលើកដំបូង UNCL​OS ​​ភាគច្រើនគឺផ្តោតលើនីតិវិធី កាលវិភាគ វិធីសាស្រ្តការងារ និងការដាក់ឯកសារភស្តុតាង គឺ​មិន​ទាន់​ដល់​ការសម្រេចលើខ្លឹមសារវិវាទទេ ក៏ប៉ុន្តែជោគជ័យ​ពិតប្រាកដ​អាស្រ័យ​ទៅ​លើ​ឆន្ទះ​ស្មោះ​ត្រង់​រវាង​ភាគីទាំងពីរជាពិសេសប្រទេសថៃ ដែលតែងតែក្រឡេចក្រឡុចពុតត្បុតកន្លងមក។ ក្នុង​ន័យ ប្រទេសកម្ពុជាត្រូវបន្តឈ​​​​​​​​​​​​​​​​រលើមូលដ្ឋានច្បាប់អន្តរជាតិ រៀបចំភស្តុតាងឲ្យបានរឹងមាំ និង​ការ​ទូត​ម៉ត់ចត់ ដើម្បីបង្ហាញទៅអន្តរជាតិថា កម្ពុជាត្រូវការយុត្តិធម៌ តម្លាភាព សន្តិភាព និង​ធានា​ឯករាជ្យ អធិបតេយ្យ និងបូរណភាពទឹកដីកម្ពុជា។

បើតាមសេចក្តីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិ បានឱ្យដឹងថា គណៈ​​​​កម្មការផ្សះផ្សានៃអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) នឹង​ប្រជុំ​លើក​ដំបូ​ងជាមួយកម្ពុជា និងថៃ នៅប្រទេសសិង្ហបុរី ចាប់ពីថ្ងៃទី១៤ ដល់ថ្ងៃទី១៦ ខែកញ្ញា ឆ្នាំ​២០២៦​។ ក្នុងកិច្ចប្រជុំនោះ កម្ពុជានឹងតំណាងដោយឯកឧត្តមឧបនាយក រដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងស​​​ហ​ប្រតិបត្តិការអន្តរជាតិ ក្នុងនាមជាភ្នាក់ងារកម្ពុជា និងឯកឧត្តម ឡាំ ជា រដ្ឋមន្ត្រីទទួលបន្ទុកលេខាធិការដ្ឋានកិច្ចការព្រំដែន ជាភ្នាក់ងាររង រួមជាមួយគណៈប្រតិភូ និង​ក្រុមការងារច្បាប់កម្ពុជា។

គួរបញ្ជាក់ដែរថា ការផ្សះផ្សាដោយបង្ខំក្រោមឧបសម្ព័ន្ធទី៥ នៃអនុសញ្ញា UNCLOS ពុំ​មែន​ជា​ដំណើ​​​ការវិនិច្ឆ័យទេ ដោយក្នុងនោះមានគណៈកម្មការអព្យាក្រឹតមួយ ជួយដល់​ភាគី​ទាំង​ពីរ​ក្នុង​ការ​ស្វែង​រក​ដំណោះ​ស្រាយតាមសន្តិវិធី៕ អត្ថបទ៖ទូច សោភ័ណ