ព្រះមហាក្សត្រព្រះរាជទានម៉ាស៊ីនបូមទឹកខ្នាតធំ ១៩គ្រឿង ដើម្បីសង្គ្រោះស្រូវប្រជានុរាស្ត្រក្រោយរងគ្រោះរាំងស្ងួតនៅខេត្តកំពង់ស្ពឺ

កំពង់ស្ពឺ៖ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ បានសព្វព្រះរាជហឫទ័យ ប្រោសព្រះរាជទានម៉ាស៊ីនបូមទឹកខ្នាតធំ និងចាត់តាំងព្រះរាជតំណាងដ៏ខ្ពង់ខ្ពស់ នៃក្រុមការងារអន្តរាគមន៍ចុះជួយបូមទឹកសង្គ្រោះដំណាំស្រូវវស្សារបស់ប្រជានុរាស្ត្ររបស់ព្រះអង្គដែលកំពុងរងការគំរាមកំហែងដោយគ្រោះរាំងស្ងួត និងការខ្វះខាតទឹកស្រោចស្រព ។

ព្រះរាជសកម្មភាពដ៏ឧត្តុង្គឧត្តមនេះ​ បាននិងកំពុងធ្វើឡើងនៅក្នុងស្រុកគងពិសី និងស្រុកសំរោងទង​ ខេត្តកំពង់ស្ពឺ ចំពោះមុខផ្ទៃដីស្រែរងគ្រោះប្រមាណជិត២ពាន់ហិកតា​ ហើយត្រូវបានសង្គ្រោះ។

ឯកឧត្តម​បណ្ឌិត​ ជាម ច័ន្ទ​សោភ័ណ​អភិបាល​ខេត្តកំពង់ស្ពឺ​ បានឱ្យដឹងថា ជុំវិញព្រះរាជសកម្មភាពសង្គ្រោះនេះ​ គឺធ្វើឡើងក្រោមព្រះរាជតំណាងដ៏ខ្ពង់ខ្ពស់ សម្តេចមហាមន្ត្រី គុយ សុផល រដ្ឋមន្ត្រីក្រសួងព្រះបរមរាជវាំង បានព្រះរាជទានម៉ាស៊ីនបូមទឹកចំនួន ១៩គ្រឿង ដាក់ពង្រាយនៅតាមប្រភពទឹក និងប្រឡាយមេនានា ដែលជាគោលដៅរងគ្រោះចំនួន២ស្រុក និង៥ឃុំ គឺស្រុកគងពិសី៤ឃុំ គឺឃុំព្រះនិព្វានចំនួន ១គ្រឿង ឃុំវាលចំនួន ៣គ្រឿង ឃុំជង្រុក ១គ្រឿង ឃុំស្នំក្រពើចំនួន ២គ្រឿង និងស្រុកសំរោងទងមួយឃុំ គឺឃុំវល្លិ៍សចំនួន៩គ្រឿង ដើម្បីបូមទឹកបញ្ចូលទៅក្នុងស្រែរបស់ប្រជាកសិករឱ្យបានទាន់ពេលវេលាការពារមិនឱ្យស្រូវវស្សាត្រូវក្រៀមស្វិត ឬខូចខាត។

ឯកឧត្តម​ បានបន្ថែមថា ព្រះរាជសកម្មភាព​ នៃព្រះរាជតំណាងបានស្តែងឱ្យឃើញនូវព្រះរាជហឫទ័យគិតគូរជាប្រចាំ ចំពោះសុខទុក្ខរបស់ប្រជានុរាស្ត្ររបស់ព្រះអង្គ ដែលកំពុងប្រឈមនិងផលប៉ះពាល់នៃគ្រោះធម្មជាតិ។

ជាមួយនិងតំណាងព្រះរាជសកម្មភាពដ៏ឧដុង្គឧត្តមរបស់សម្តេចមហាមន្ត្រី គុយ សុផល អភិបាលខេត្តកំពង់ស្ពឺ​ និងអាជ្ញាធរ ប្រជានុរាស្ត្រដែលកំពុងប្រឈមនិងផលប៉ះពាល់ក្នុងឃុំទាំង៥ នៃស្រុកទាំងពីរ បានសម្តែងការត្រេកអរ ចំពោះទឹកព្រះទ័យរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ដែលបានសព្វព្រះរាជហឫទ័យប្រោសព្រះរាជទានម៉ាស៊ីនបូមទឹក និងចាត់តាំងព្រះរាជតំណាងដ៏ខ្ពង់ខ្ពស់ នៃក្រុមការងារអន្តរាគមន៍របស់ព្រះអង្គចុះជួយអន្តរាគមន៍បូមទឹកសង្គ្រោះដំណាំស្រូវវស្សារបស់ប្រជានុរាស្ត្ររបស់ព្រះអង្គទាន់ពេលវេលា និងបានជួយកាត់បន្ថយការចំណាយផ្សេងៗក្នុងអំឡុងពេលដែលអាកាសធាតុប្រែប្រួលនិងរបាយទឹកភ្លៀងមិនស្មើគ្នានេះ​ ៕ អត្ថបទ​ បាន​ សុខរិទ្ធិ