ផ្ទះទេវតាទី៣៣៩ និង៣៤០ ចំនួន២ខ្នងទៀតដោយមានភ្ជាប់ប្រព័ន្ធភ្លើងសូឡា និងទឹកស្អាត ជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, សម្ដេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ត្រូវបានលោកជំទាវ ហ៊ុន ម៉ាណា ប្រគល់ជូនពលរដ្ឋខ្វះខាតជីវភាព នៅខេត្តតាកែវ

នៅព្រឹកថ្ងៃសៅរ៍ ទី១២ ខែកញ្ញា ឆ្នាំ២០២៦ លោកជំទាវ ហ៊ុន ម៉ាណា អគ្គនាយិកា វិទ្យុ-ទូរទស្សន៍បាយ័ន បានអញ្ជើញប្រគល់អំណោយផ្ទះទេវតា២ខ្នងទៀត ជូនលោកយាយ លោកតា ចាស់ជរាគ្មានទីពឹង២គ្រួសារ នៅឃុំត្រពាំងក្រញូង ស្រុកត្រាំកក់ ខេត្តតាកែវ។

១- ផ្ទះទី៣៣៩ ផ្តល់ជូនលោកតា រំដួល ណៃ អាយុ៦៧ឆ្នាំ និងប្រពន្ធឈ្មោះ លោកយាយ សៅ សារុន អាយុ៥៨ឆ្នាំ រស់នៅភូមិព្រៃក្តួច ឃុំត្រពាំងក្រញូង ស្រុកត្រាំកក់ ខេត្តតាកែវ។ លោកតា លោកយាយមានកូនស្រីចំនួន ២នាក់ មានគ្រួសារទាំងពីរ រស់នៅក្បែតាយាយដែរ តែពួកគេទាំងពីរគ្រួសារសុទ្ធតែមានជីវភាពក្រលំបាកខ្វះខាតដូចៗគ្នា។

២-ផ្ទះទី៣៤០ ផ្តល់ជូនលោកយាយ ង៉ែត ណាន អាយុ ៦៥ឆ្នាំ រស់នៅភូមិព្រៃក្តួច ឃុំត្រពាំងក្រញូង ស្រុកត្រាំកក់ ខេត្តតាកែវ។ លោកយាយមានកូន៨នាក់ (ប្រុស ៥នាក់) មានគ្រួសាររៀងៗខ្លួន ទៅរស់នៅឆ្ងាយពីយាយ ក្នុងនោះមានម្នាក់ជាស្ត្រីមេម៉ាយមានកូនចំនួន២នាក់ រស់នៅក្នុងបន្ទុកគ្រួសារជាមួយលោកយាយ។ កូនៗលោកយាយទាំងអស់សុទ្ធតែមានជីវភាពលំបាកដូចៗគ្នា។

ក្នុងឱកាសនោះ លោកជំទាវ បាននាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ចំពោះលោកយាយលោកតា ដែលទទួលអំណោយផ្ទះនាពេលនេះ ដែលជានិច្ចកាលលោកទាំង៤ តែងតែគិតគូរពីសុខទុក្ខប្រជាពលរដ្ឋគ្រប់ទីកន្លែង និងគ្រប់ពេលវេលា។ បន្ថែមលើអំណោយផ្ទះនីមួយៗខាងលើ លោកជំទាវ ក៏បានផ្តល់នូវប្រព័ន្ធភ្លើងសូឡានៅមុខផ្ទះ និងក្នុងផ្ទះ និងអណ្ដូងទឹកស្អាតដល់ម្ចាស់ផ្ទះទៀតផង។ លោកជំទាវក៏បាននាំយកនូវអំណោយសម្តេចតេជោ និងសម្តេចកិត្តិព្រឹទ្ធបណ្ឌិតបន្ថែមមួយចំនួនទៀតផងដែរ រួមមាន ៖ អង្ករ១០០គីឡូក្រាម, ត្រីខ១កេស, មីចំនួន៥កេស, ទឹកដោះគោខាប់ ១កេស, ពួក១, ប្រេងកូឡូ១ប្រអប់ធំ, ប្រេងខ្យល់១ប្រអប់ធំ ,ចានដែក១, ឆ្នាំងតូច១, ឆ្នាំងធំ១, ខ្ទះឆា១, វែងឆា១, វែងបាយ១, វែងសំឡ១, ស្លាបព្រា និងសម១ឡូ, កំសៀវ១, ចានបាយចំនួន៥, ចានសម្លចំនួន៥, តែ ១ គីឡូក្រាម,ខ្នើយចំនួន២,មុងចំនួន២,ភួយចំនួន២,កន្ទេលចំនួន២,ស្ករសចំនួន៥គីឡូក្រាមទឹកស៊ីអុីវចំនួន៣យួរ,វិទ្យុ FM១គ្រឿង, ថ្មដាក់វិទ្យុចំនួន២ ស្បែកជើងចំនួន២គូរ,ថ្នាំនឹងច្រាសដុសធ្មេញចំនួន៥ឈុត,សាប៊ូដុំចំនួន១២ដុំតូច,ថ្នាំពេទ្យចំនួន៥ប្រអប់តូច,ខោអាវចំនួន២កំប្លេរ និងថវិកាចំនួន ៥០ម៉ឺនរៀល ព្រមទាំងអំណោយរបស់សម្ដេចតេជោ និងសម្ដេចកត្តិព្រឹទ្ធបណ្ឌិត ជាឃីត (កញ្ចប់ៗ) មានជាសម្ភារៈប្រើប្រាស់ សំលៀកបំពាក់ និងថវិកា ចែកជូនលោកយាយ លោកតាដែលបានចូលរួមនាឱកាសនោះ,ព្រមទាំងនាំយកនូវកាតាបដែលមានសម្ភារៈសិក្សាជាច្រើនមុខ និងសំលៀកបំពាក់ មកចែកដល់សិស្សានុសិស្សនៅភូមិនេះចំនួន៥០នាក់ផងដែរ។

បន្ទាប់មក លោកជំទាវក៏បានអញ្ជើញមកពិនិត្យស្ថានភាពទីតាំងសាលារៀន២កន្លែងនៅក្នុងឃុំនេះ ដែលទី១គឺស្ថិតនៅសាលាបឋមសិក្សាបុស្សតាផង់

ក្នុងភូមិត្រពាំងក្រញូង ស្រុកត្រាំកក់ ខេត្តតាកែវ និងទី២ នៅសាលាបឋមសិក្សា ស្រែជើងរាស្ត្រ ដែលនៅទីនេះ លោកជំទាវបានចែវនូវសម្ភារៈសិក្សាមួយចំនួនជូនដល់សិស្សានុសិស្ស និងបានផ្ដល់ថវិកាជួយជួសជុលឥដ្ឋការ៉ូក្នុងអគារសិក្សាចំនួន២បន្ទប់ផងដែរ៕