សហរដ្ឋអាមេរិកបានស្រូបយកមុខទំនិញរបស់កម្ពុជា នៅក្នុងរយៈពេល ៨ខែ ឆ្នាំ២០២៦នេះ គិតជាទឹកប្រាក់សរុបមានចំនួនជាង ១០,៦ ពាន់លានដុល្លារអាមេរិក ត្រូវប្រមាណជិត ៤៤ ភាគរយ នៃការនាំចេញសរុបរបស់កម្ពុជា ដោយទីផ្សារមួយនេះបានកំពុងបន្តភាពរឹងមាំ នៃការនាំចេញទំនិញរបស់កម្ពុជា។

ជុំវិញទីផ្សារនាំចេញទំនិញរបស់កម្ពុជា ឃើញថា នៅក្នុងរយៈពេលប៉ុន្មានឆ្នាំចុងក្រោយនេះ ការនាំចេញរបស់កម្ពុជាមានកំណើន កើនឡើងជាបន្តបន្ទាប់ ដោយបានបង្ហាញឱ្យឃើញពីកិច្ចដំណើរល្អ នៅក្នុងខ្សែច្រវាក់ផលិតកម្ម ឧស្សាហកម្ម រោងចក្រ សហគ្រាសក្នុងស្រុក បាននិងកំពុងជំរុញដល់ការរីកលូតលាស់នៃសេដ្ឋកិច្ច និងបានបង្កើតនូវទំនុកចិត្តដល់វិនិយោគិន ក្នុងការមកបណ្តាក់ទុនវិនិយោគនៅកម្ពុជា ទោះបច្ចុប្បន្នពិភពលោកកំពុងប្រឈមភាពមិនប្រាកដប្រជាយ៉ាងណាក៏ដោយ។

ជាក់ស្តែងការនាំទំនិញរបស់កម្ពុជាទៅកាន់ទីផ្សារអន្តរជាតិ នៅក្នុងរយៈពេល៨ខែ ឆ្នាំ២០២៦នេះ មានទំហំទឹកប្រាក់សរុបជាង ៥០,៦ ពាន់លានដុល្លារអាមេរិក កើនឡើងជាង ២០ ភាគរយ ធៀបរយៈពេលដូចគ្នាឆ្នាំ២០២៥ ក្នុងនោះកម្ពុជានាំចេញទំនិញសំខាន់ៗ មានទឹកប្រាក់ សរុបប្រមាណជាង ២៤,១ ពាន់លានដុល្លារអាមេរិក កើនឡើងជិត ២០ ភាគរយ និងការនាំចូលពីបរទេសមានទឹកប្រាក់ជាង ២៦,៥ ពាន់ លានដុល្លារអាមេរិក កើនឡើងជាង ២០ ភាគរយ ធៀបរយៈពេលដូចគ្នាឆ្នាំ២០២៥។

ចំណែកការនាំចេញទំនិញទៅកា​ន់ទីផ្សារសហរដ្ឋអាមេរិកវិញ, នៅក្នុងរយៈពេល៨ខែនេះ មានទឹកប្រាក់សរុបជាង ១០,៦ ពាន់លាន ដុល្លារអាមេរិក កើនជាង ២៨ ភាគរយ ធៀបរយៈពេលដូចគ្នាឆ្នាំ២០២៥ (មានជាង ៨ ពាន់លានដុល្លារប៉ុណ្ណោះ) ក្នុងនោះប្រភេទទំនិញ សំខាន់ៗដែលកម្ពុជានាំចេញទៅទីផ្សារអាមេរិករួមមាន៖ សម្លៀកបំពាក់, ស្បែកជើង សម្ភារៈសម្រាប់ការធ្វើដំណើរ ការនាំចេញផលិតផល ពីកសិកម្មនិងផ្សេងៗទៀត។ ចំណែកការនាំទិញចូលពីសហរដ្ឋអាមេរិក នៅក្នុងរយៈពេលនេះដែរ មានទឹកប្រាក់ជាង ៤៣១ លានដុល្លារអាមេរិក កើនឡើងជាង ៧៧ ភាគរយ ចំពោះប្រភេទទំនិញដែលនាំចូលរួមមាន៖ យានយន្ត គ្រឿងបង្គុំ គ្រឿងអេឡិចត្រូនិច និងមានប្រភេទទំនិញ ច្រើនផ្សេងៗទៀត៕អត្ថបទ៖ សុន រ៉ាឌី