រដ្ឋសភាចែករំលែកចំណេះដឹងពាក់ព័ន្ធនឹងស្ថាប័ននីតិប្បញ្ញត្តិ និងយន្តការសមាជរដ្ឋសភា-ព្រឹទ្ធសភា ដល់និស្សិតខ្មែរនៅបរទេស

ភ្នំពេញ៖ អគ្គលេខាធិការដ្ឋានរដ្ឋសភា នៅថ្ងៃទី១៥ ខែកញ្ញា ឆ្នាំ២០២៦ បានបើកទ្វារស្វាគមន៍គណៈប្រតិភូនៃសហព័ន្ធនិស្សិតកម្ពុជានៅបរទេស ក្នុងការចុះសិក្សាស្វែងយល់ផ្ទាល់អំពីការងារនីតិប្បញ្ញត្តិ ដោយផ្តោតសំខាន់លើការយល់ដឹងអំពីយន្តការ «សមាជរដ្ឋសភា និងព្រឹទ្ធសភា» ដែលជាវេទិកាកំពូលរួមគ្នារបស់ស្ថាប័ននីតិប្បញ្ញត្តិទាំងពីរ (ព្រឺទ្ឋសភានិងរដ្ឋសភា) ក្នុងការពិភាក្សា និងដោះស្រាយបញ្ហាសំខាន់ៗរបស់ជាតិក្នុងករណីចាំបាច់ ស្របតាមរដ្ឋធម្មនុញ្ញ។

ថ្លែងក្នុងឱកាសនោះ ឯកឧត្តម ឡាយ ប៊ុនម៉េង អគ្គនាយករងនីតិកម្ម និងស្រាវជ្រាវ និងជាលេខាធិការអចិន្ត្រៃយ៍នៃក្រុមប្រឹក្សាពិគ្រោះយោបល់ច្បាប់រដ្ឋសភា បានបញ្ជាក់លម្អិតអំពីដំណើរការសភា និងបេសកកម្មស្នូល ទាំងការតាក់តែងអនុម័តច្បាប់ ការអនុម័តថវិកាជាតិ ការតាមដានត្រួតពិនិត្យការអនុវត្តច្បាប់របស់រាជរដ្ឋាភិបាល ការងារជាតំណាងរាស្ត្រ និងការទូតសភា។ ឯកឧត្តមបានកោតសរសើរចំពោះការខិតខំប្រឹងប្រែងរបស់និស្សិត និងបានចាត់ទុកយុវជនទាំងអស់ជាធនធានមនុស្សដ៏មានសក្តានុពលខ្ពស់ក្នុងការចូលរួមអភិវឌ្ឍជាតិ។

តំណាងឱ្យប្រតិភូនិស្សិត លោក ឆៃ ប៉េងស្រ៊ន់ សមាជិកក្រុមប្រឹក្សាភិបាលនៃសហព័ន្ធនិស្សិតកម្ពុជានៅបរទេស បានថ្លែងអំណរគុណយ៉ាងជ្រាលជ្រៅចំពោះការបើកឱកាសដ៏មានតម្លៃនេះ ដោយគូសបញ្ជាក់ថា បទពិសោធ និងចំណេះដឹងជាក់ស្តែងពីស្ថាប័នផ្ទាល់ គឺជាពន្លកគំនិត និងជាធាតុចូលដ៏រឹងមាំសម្រាប់និស្សិតយកទៅប្រើប្រាស់ក្នុងការសិក្សាស្រាវជ្រាវ ក៏ដូចជាការបំពេញការងារបម្រើសង្គមជាតិទៅថ្ងៃអនាគត។

សូមបញ្ជាក់ថា ក្រៅពីការស្តាប់បទបង្ហាញផ្ទាល់ពីមន្ត្រីជំនាញ គណៈប្រតិភូនៃសហព័ន្ធនិស្សិតកម្ពុជានៅបរទេស នៅថ្ងៃនេះដដែលក៏បានអញ្ជើញទស្សនកិច្ច និងសិក្សាស្វែងយល់ជាក់ស្តែងនៅទីតាំងសំខាន់ៗមួយចំនួនក្នុងបរិវេណវិមានរដ្ឋសភាផងដែរ៕