មន្រ្ដីជាន់ខ្ពស់ គ.ជ.គ.ម. ចូលរួម​ក្នុង​ពិធី​បើក​កិច្ច​ប្រជុំ​ថ្នាក់​រដ្ឋ​មន្ត្រី​អាស៊ាន​ស្តីពី​ភាព​ធន់​នឹង​គ្រោះ​មហន្តរាយ​ នៅហ្វីលីពីន

នៅថ្ងៃទី១៥ ខែកញ្ញា ឆ្នាំ២០២៦ ឯកឧត្តម គីម វីរៈ អនុប្រធាន និងជាអគ្គលេខាធិការ នៃ​គណៈ​កម្មា​ធិការជាតិគ្រប់គ្រងគ្រោះមហន្តរាយ (គ.ជ.គ.ម.) តំណាងដ៏ខ្ពង់ខ្ពស់របស់ ឯកឧត្តម​កិត្តិ​សង្គ​ហ​បណ្ឌិត គន់ គីម ទេសរដ្ឋមន្ត្រី និងជាអនុប្រធានទី១ គ.ជ.គ.ម. បានដឹកនាំគណៈប្រតិភូ អញ្ជើញ​ចូល​រួមក្នុងពិធីបើកកិច្ចប្រជុំថ្នាក់រដ្ឋមន្ត្រីអាស៊ាន ស្តីពីភាពធន់នឹងគ្រោះមហន្តរាយ ដែល​ប្រព្រឹត្តទៅនៅទីក្រុងម៉ានីល សាធារណរដ្ឋហ្វីលីពីន។

ពិធីបើកកិច្ចប្រជុំនេះ មានការអញ្ជើញចូលរួមជាអធិបតីពី ឯកឧត្តម Ralph G. Recto លេខាធិការប្រតិបត្តិការិយាល័យប្រធានាធិបតី តំណាងដ៏ខ្ពង់ខ្ពស់របស់ ឯកឧត្តម Ferdinand R. Marcos Jr. ប្រធានាធិបតីនៃសាធារណរដ្ឋហ្វីលីពីន។

ក្នុងឱកាសនេះ ឯកឧត្តម គីម វីរៈ ក៏បានអញ្ជើញចូលរួមក្នុង កម្មវិធីប្រកាសដាក់ឱ្យដំណើរការរបាយការណ៍ស្តីពីការតាមដានហានិភ័យ និងការពិនិត្យឡើងវិញលើការគ្រប់គ្រងគ្រោះមហន្តរាយរបស់អាស៊ាន ដែលជាឯកសារសំខាន់មួយសម្រាប់ពង្រឹងការយល់ដឹងអំពីនិន្នាការ និងការវិវត្តនៃហានិភ័យគ្រោះមហន្តរាយ ព្រមទាំងជំរុញការរៀបចំវិធានការ និងគោលនយោបាយកាត់បន្ថយហានិភ័យគ្រោះមហន្តរាយឱ្យកាន់តែមានប្រសិទ្ធភាព និងឆ្លើយតបបានទាន់ពេលវេលានៅក្នុងតំបន់អាស៊ាន។

ក្នុងដំណើរចូលរួមកិច្ចប្រជុំនេះ ឯកឧត្តម គីម វីរៈ បានជួបសំណេះសំណាល និងពង្រឹងទំនាក់ទំនងជាមួយថ្នាក់ដឹកនាំ និងតំណាងបណ្តាប្រទេសសមាជិកអាស៊ាន ព្រមទាំងថ្នាក់ដឹកនាំ និងតំណាងអង្គការអន្តរជាតិ និងដៃគូអភិវឌ្ឍន៍ ដើម្បីផ្លាស់ប្តូរទស្សនៈ បទពិសោធន៍ និងចំណេះដឹង ព្រមទាំងពង្រឹងកិច្ចសហប្រតិបត្តិការក្នុងវិស័យគ្រប់គ្រងហានិភ័យគ្រោះមហន្តរាយ ការកាត់បន្ថយហានិភ័យ និងការកសាងភាពធន់របស់សហគមន៍ និងប្រទេសក្នុងតំបន់។

សូមជម្រាបថា កិច្ចប្រជុំថ្នាក់រដ្ឋមន្ត្រីអាស៊ានស្តីពីភាពធន់នឹងគ្រោះមហន្តរាយនេះ មានការអញ្ជើញចូលរួមពីតំណាងបណ្តាប្រទេសសមាជិកអាស៊ាន តំណាងអង្គការសហប្រជាជាតិ និងស្ថាប័នពាក់ព័ន្ធនឹងការកាត់បន្ថយហានិភ័យគ្រោះមហន្តរាយ ព្រមទាំងតំណាងដៃគូអភិវឌ្ឍន៍ជាតិ និងអន្តរជាតិ៕