សម្ដេចធិបតិ៖ មកទល់ពេលនេះ ការប្រើប្រាស់មណ្ឌលសុខភាព និងពេទ្យបង្អែកស្រុក កើន​ដល់​៨០​ភាគរយ

សម្តេចធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានថ្លែងថា មកទល់ពេលនេះ ការ​ប្រើ​ប្រាស់​មណ្ឌលសុខភាព និងពេទ្យបង្អែកស្រុកពីសំណាក់ប្រជាពលរដ្ឋកម្ពុជា បាន​កើន​ដល់​៨០​ភាគរយ ដោយសារការផ្ដល់សេវា២៤ម៉ោង និងការបង្កើនសម្ភារបរិក្ខារវេជ្ជសាស្ត្រ ជាដើម។

សម្តេចធិបតី ហ៊ុន ម៉ាណែត នាយករដ្ឋមន្រ្តី នៅក្នុងឱកាស​អញ្ជើញ​សម្ពោធ​ដាក់​ឲ្យ​ប្រើ​ប្រាស់ជា​ផ្លូវការ មន្ទីរពេទ្យហ្លួងម៉ែ នាថ្ងៃទី១៦ ខែកញ្ញា នេះ បានបញ្ជាក់ថា កំណើននៃ​ការ​ប្រើ​ប្រាស់​មណ្ឌល​សុខភាព និងពេទ្យបង្អែកស្រុកកើនឡើងដោយសារមានពេទ្យគ្រប់ គុណភាពសេវា ថ្នាំ សម្ភារ ក៏ត្រូវបានបង្កើន ពិសេសគឺតាមរយៈការប្រើប្រាស់បណ្ណ ប.ស.ស បណ្ណសមធម៌សង្គម ដែល​មកដល់ពេលនេះគឺមានទាំងបរិមាណទីតាំងមណ្ឌលសុខភាព និងគុណភាព។

សម្ដេចធិបតី បានបញ្ជាក់ថា ខ្ញុំសុំឱ្យបន្តពង្រឹងសមត្ថភាពពេទ្យបង្អែកស្រុក ពេទ្យខេត្ត និងតំបន់របស់យើងឱ្យកាន់តែរឹងមាំដើម្បីដោះស្រាយបញ្ហាដែលកើតឡើងនៅនឹងកន្លែងតែម្ដង នេះហើយគឺជាវិធានការពង្រឹងមូលដ្ឋាន ដែលយើងបានដាក់ចេញ។ មូលដ្ឋានត្រូវរឹងមាំ ទើបមានភាពធន់។ ប៉ុស្តិ៍សុខភាព និងមណ្ឌលសុខភាពអាចធានាបាន មានពេទ្យគ្រប់ មានគុណវុឌ្ឍិគ្រប់គ្រាន់ មានឧបករណ៍សម្ភារ មានវិធីសាស្ត្រសង្គ្រោះបន្ទាន់នៅនឹងកន្លែងគ្រប់គ្រាន់ទៅតាមកម្រិតនៃការព្យាបាល មានសមត្ថភាពបញ្ជូនលឿន។

សម្ដេចធិបតី បានរំឭកថា កាលពីឆ្នាំ២០២៤-២៥ មុនផ្ទុះសង្គ្រាម សម្ដេចបានផ្ដល់ថវិកា១៨លានដុល្លារ សម្រាប់ពង្រឹងសមត្ថភាពពេទ្យបង្អែកស្រុក៦១កន្លែង ដើម្បីធ្វើការសង្គ្រោះបឋម ហើយជាលទ្ធផលកន្លែងទាំងនោះបានធ្វើហើយ។ ការវះកាត់កើនឡើង២៤,៨ភាគរយ ហើយករណីបញ្ជូនអ្នកជំងឺទៅមន្ទីរពេទ្យកម្រិតខ្ពស់ថយចុះ១១ភាគរយ បានន័យថា ការផ្ដល់សេវាទាន់ពេល បានឆាប់៕