ក្រសួងការងារគ្រោងបើកការធ្វើតេស្តជំនាញផ្នែកភេសជ្ជៈដោយឥតគិតថ្លៃជូនប្រជាពលរដ្ឋ នាខែតុលាខាងមុខ

បន្ទាប់ពីទទួលបានជោគជ័យយ៉ាងត្រចះត្រចង់លើការអនុវត្តកម្មវិធីធ្វើតេស្តវាយតម្លៃ និងទទួលស្គាល់ជំនាញមានពីមុន (RPL – Recognition of Prior Learning) ក្នុងវិស័យសំណង់រួចមក ក្រសួងការងារ និងបណ្តុះបណ្តាលវិជ្ជាជីវៈ គ្រោង រៀបចំផែនការបន្តដើម្បីបើកការធ្វើតេស្តជំនាញលើផ្នែក «ធុរកិច្ច និងភេសជ្ជៈ» ចាប់ពីខែតុលាខាងមុខនេះតទៅ។

លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យព័ត៍មាន ប៊ីធីវី ដឹងថា នៅក្នុងជំហានដំបូងនេះ រាជរដ្ឋាភិបាលនឹងចេញថ្លៃសេវាជំនួសទាំងស្រុង ក្នុងការផ្តល់ឱកាសធ្វើតេស្តជំនាញដោយឥតគិតថ្លៃជូនដល់ប្រជាពលរដ្ឋទូទៅចំនួន ១ពាន់នាក់។ ឯកឧត្តម បានបន្តថា គោលបំណង និងអត្ថប្រយោជន៍ចម្បងនៃកម្មវិធី គឺដើម្បីផ្តល់ការទទួលស្គាល់ផ្លូវការ ក្នុងការបើកឱកាសឱ្យប្រជាពលរដ្ឋដែលមានជំនាញ និងបទពិសោធន៍ស្រាប់ក្នុងវិស័យធុរកិច្ច និងភេសជ្ជៈ ទទួលបានវិញ្ញាបនបត្រទទួលស្គាល់សមត្ថភាពផ្លូវការពីរាជរដ្ឋាភិបាល ដោយមិនបាច់ចំណាយពេលសិក្សាយូរឡើងវិញ។ បន្ថែមពីនេះទៀត គឺដើម្បីលើកកម្ពស់អាជីវកម្ម និងមុខរបរ ដែលជួយជំរុញឱ្យអ្នកប្រកបមុខរបរផ្ទាល់ខ្លួន ឬអ្នកបើកអាជីវកម្មខ្នាតតូច និងមធ្យម អាចអភិវឌ្ឍគុណភាពសេវាកម្ម និងដំណើរការអាជីវកម្មបានកាន់តែប្រសើរជាងមុន ក៏ដូចជាការបើកផ្លូវឱ្យអ្នកជំនាញងាយស្រួលក្នុងការស្វែងរកការងារធ្វើ មានភាពទាក់ទាញចំពោះនិយោជក និងមានឱកាសទទួលបានប្រាក់ចំណូលសមរម្យ ឬខ្ពស់ជាងមុន ស្របតាមកម្រិតវិជ្ជាជីវៈពិតប្រាកដ។

សូមបញ្ជាក់ថា ក្រសួងការងារ និងបណ្តុះបណ្តាលវិជ្ជាជីវៈ បានដាក់ឱ្យអនុវត្តការធ្វើតេស្តវាយតម្លៃជំនាញមានពីមុន (RPL) ជូនដល់ប្រជាពលរដ្ឋទូទៅ ជាពិសេសអតីតពលករមកពីប្រទេសថៃ ៨មុខជំនាញ ក្នុងវិស័យសំណង់ ដោយរដ្ឋាភិបាលជាអ្នកចេញថ្លៃជំនួសដែលគិតមកដល់ពេលនេះ មានអ្នកត្រូវបានវាយតម្លៃទទួលស្គាល់ជំនាញ និងទទួលបានវិញ្ញាបនបត្រ សរុបចំនួនជាង ១ម៉ឺននាក់៕

អត្ថបទ៖ ឈិត បូរ៉ាវី