ខេត្តឧត្តរមានជ័យ ជាខេត្តទី៧ បញ្ចប់ការចុះហត្ថលេខាលើផែនទីព្រំប្រទល់រដ្ឋបាលឃុំ-សង្កាត់

រដ្ឋបាលខេត្តឧត្តរមានជ័យ​បាន​ក្លាយជាខេត្តទី៧ ក្នុងព្រះរាជាណាចក្រកម្ពុជា ដែល​បាន​បញ្ចប់​ជា​ផ្លូវ​ការ​នូវការចុះហត្ថលេខាលើផែនទីព្រំប្រទល់រដ្ឋបាលឃុំ-សង្កាត់ ដែលបានចុះ​បញ្ជី​ដី​ធ្លី​មាន​លក្ខណៈ​ជា​ប្រព័ន្ធ​រួចរាល់ ដែលជាសមិទ្ធផល​សំខាន់​មួយ​ក្នុង​ការ​ពង្រឹង​ការ​គ្រប់​គ្រង​រដ្ឋបាល​ដែន​ដី ​និងការរៀបចំផែនការអភិវឌ្ឍមូលដ្ឋានឱ្យកាន់តែច្បាស់លាស់។

ពិធីនេះប្រព្រឹត្តិធ្វើឡើង ក្រោមអធិបតីភាព ឯកឧត្ដម វុឌ្ឍី វណ្ណារ៉ា អគ្គនាយក នៃអគ្គនាយកដ្ឋានសុរិយោដី និងភូមិសាស្ត្រ នៃក្រសួងរៀបចំដែនដី នគរូបនីយកម្ម និងសំណង់, និងឯកឧត្ដម មាន ចាន់យ៉ាដា អភិបាលខេត្តឧត្តរមានជ័យ ព្រមទាំងមានការចូលរួមពីថ្នាក់ដឹកនាំខេត្ត មន្ត្រីជំនាញ អាជ្ញាធរក្រុង-ស្រុក ឃុំ-សង្កាត់ ជាច្រើនរូបទៀត នៅថ្ងៃទី១៨ ខែកញ្ញា ឆ្នាំ២០២៦នេះ។

ឯកឧត្ដម មាន ចាន់យ៉ាដា អភិបាលខេត្តឧត្តរមានជ័យ បានបញ្ជាក់ថា៖ ការរៀបចំ និងកំណត់ព្រំប្រទល់ឃុំ-សង្កាត់ ត្រូវបានអនុវត្តស្របតាមមាត្រា៨៥ នៃច្បាប់ស្តីពីការគ្រប់គ្រងរដ្ឋបាលឃុំ-សង្កាត់ ឆ្នាំ២០០១ ដែលមានគោលបំណងផ្តល់ជាមូលដ្ឋានសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងការគ្រប់គ្រងរដ្ឋបាលឃុំ-សង្កាត់។

ឯកឧត្ដម អភិបាលខេត្ត បានបញ្ជាក់ថា៖គិតត្រឹមថ្ងៃទី១៥ ខែកញ្ញា ឆ្នាំ២០២៦ ខេត្តឧត្តរមានជ័យ សម្រេចបានលទ្ធផលការងារចុះបញ្ជីដីធ្លីមានលក្ខណៈជាប្រព័ន្ធ ដោយមានក្បាលដីប៉ាន់ស្មានចំនួន ៣៤១,៧២៥ ក្បាលដី និងបានវាស់វែងរួចចំនួន ៣៤១,៧២៥ ក្បាលដី។ក្នុងនោះបានចេញបណ្ណកម្មសិទ្ធិចំនួន ១០៣,១៣៥ ក្បាលដី និងបានចែកបណ្ណជូនដល់ដៃប្រជាពលរដ្ឋចំនួន ៧៥,៦៩៧ ក្បាលដី។ ឯកឧត្ដម វុឌ្ឍី វណ្ណារ៉ា អគ្គនាយក នៃអគ្គនាយដ្ឋានសុរិយោដី និងភូមិសាស្ត្រ បានលើកឡើងថា ការបញ្ចប់ការចុះហត្ថលេខាលើផែនទីព្រំប្រទល់រដ្ឋបាលឃុំ-សង្កាត់ដែលបានចុះបញ្ជីដីធ្លីមានលក្ខណៈជាប្រព័ន្ធ មិនមែនគ្រាន់តែជាការងារបច្ចេកទេសធម្មតានោះទេ ប៉ុន្តែវាជាមូលដ្ឋានគ្រឹះដ៏រឹងមាំក្នុងការគ្រប់គ្រងរដ្ឋបាលដែនដី និងការអភិវឌ្ឍមូលដ្ឋាន ជាពិសេស កាត់បន្ថយ និងលុបបំបាត់រាល់ភាពចម្រូងចម្រាស ឬទំនាស់ព្រំប្រទល់រវាងឃុំ-សង្កាត់ និងស្រុក-ក្រុង ព្រមទាំងជួយឱ្យការគ្រប់គ្រងភូមិសាស្ត្ររដ្ឋបាលមានភាពរលូន និងជួយដល់អាជ្ញាធរមូលដ្ឋានក្នុងការកំណត់ដែនសមត្ថកិច្ចដោះស្រាយបញ្ហាផ្សេងៗជូនប្រជាពលរដ្ឋបានឆាប់រហ័ស និងចំគោលដៅ។

ជាមួយគ្នានេះឯកឧត្ដម អគ្គនាយក បានថ្លែងអំណរគុណចំពោះអាជ្ញាធរខេត្ត ក្រុង-ស្រុក ឃុំ-សង្កាត់ និងក្រុមការងារបច្ចេកទេស ដែលបានសហការយ៉ាងសកម្ម និងផ្តល់ការគាំទ្ររហូតសម្រេចបាននូវលទ្ធផលដ៏សំខាន់នេះ ដើម្បីបម្រើផលប្រយោជន៍ជូនប្រជាពលរដ្ឋ និងការអភិវឌ្ឍមូលដ្ឋាន៕ អត្ថបទ៖ ឃិន សារិទ្ធ