ឈ្វេងយល់ពី «ពិធីសារសេប៊ូ» (Cebu Protocol to Amend the ASEAN Charter) ដែលរដ្ឋសភាកម្ពុជាអនុម័តជាឯកច្ឆន្ទនៅថ្ងៃនេះ

វិមានរដ្ឋសភា៖ រដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី២១ ខែកញ្ញា ឆ្នាំ២០២៦ នេះ បាន អនុម័តជាឯកច្ឆន្ទលើសេចក្តីព្រាងច្បាប់ ស្តីពីការអនុម័តយល់ព្រមលើ «ពិធីសារសេប៊ូ ធ្វើវិសោធនកម្មធម្មនុញ្ញនៃសមាគមប្រជាជាតិអាស៊ីអាគ្នេយ៍» (Cebu Protocol to Amend the ASEAN Charter) ដោយសំឡេងគាំទ្រ ១១២ លើ ១១២ សំឡេង។

តើអ្វីជា «ពិធីសារសេប៊ូ» ហើយមានសារៈសំខាន់យ៉ាងណាខ្លះ?

ពិធីសារនេះ ត្រូវបានរដ្ឋមន្ត្រីការបរទេសអាស៊ានទាំង ១០ ប្រទេស ចុះហត្ថលេខារួមគ្នាកាលពីថ្ងៃទី២៨ ខែតុលា ឆ្នាំ២០១០ នៅទីក្រុងសេប៊ូ ប្រទេសហ្វីលីពីន ដើម្បីបំពេញបន្ថែមលើចំណុចខ្វះខាតនៃធម្មនុញ្ញអាស៊ានដើមឆ្នាំ២០០៧ (យោងមាត្រា ៤៨ និង ៥០)។

ពិធីសារសេប៊ូ បង្កើតឡើងនូវយន្តការច្បាប់ច្បាស់លាស់មួយ ក្នុងការកែប្រែ និងធ្វើបច្ចុប្បន្នភាពលើ «ឯកសារឧបសម្ព័ន្ធនៃធម្មនុញ្ញអាស៊ាន» ដូចជារចនាសម្ព័ន្ធស្ថាប័ន តួនាទីភារកិច្ចរបស់លេខាធិការដ្ឋានអាស៊ាន និងអង្គភាពពាក់ព័ន្ធនានា ឱ្យកាន់តែរហ័ស និងបត់បែនស្របតាមការវិវត្តជាក់ស្តែង ដោយមិនចាំបាច់ឆ្លងកាត់ការកែប្រែតួបទប្បញ្ញត្តិធំៗទាំងមូលនៃធម្មនុញ្ញនោះឡើយ។

សម្រាប់ប្រទេសកម្ពុជា ការអនុម័តយល់ព្រមពីសំណាក់រដ្ឋសភាលើសេចក្តីព្រាងច្បាប់នេះ គឺដើម្បី៖

១. ការបំពេញកាតព្វកិច្ចអន្តរជាតិ៖ ការបំពេញនីតិវិធីផ្ទៃក្នុងស្របតាមរដ្ឋធម្មនុញ្ញកម្ពុជា ដើម្បីឈានទៅការតម្កល់លិខិតុបករណ៍នៃការផ្តល់សច្ចាប័ន ទៅកាន់អគ្គលេខាធិការអាស៊ាន។

២. ការពង្រឹងនីតិរដ្ឋក្នុងក្របខ័ណ្ឌអាស៊ាន៖ បង្ហាញពីការប្តេជ្ញាចិត្តយ៉ាងមុតមាំរបស់កម្ពុជា ក្នុងការគាំទ្រដល់ដំណើរការការងាររបស់អាស៊ានដែលផ្អែកលើច្បាប់ (Rules-based ASEAN) និងការសម្រួលឱ្យយន្តការតំបន់មួយនេះដំណើរការប្រកបដោយប្រសិទ្ធភាពខ្ពស់។