កម្ពុជាស្នើនគរបាលព្រហ្មទណ្ឌអន្តរជាតិតាមចាប់មេក្លោង Online scams ពីររូបដែលរត់គេចពីតំបន់ព្រំដែនជ្រៃធំ សង្ស័យចាកចេញពីកម្ពុជា

សមត្ថកិច្ចកម្ពុជា បានស្នើទៅនគរបាលព្រហ្មទណ្ឌអន្តរជាតិសចាប់ខ្លួនមេក្លោង Online scams ពីររូបដែលរត់គេចខ្លួនពីតំបន់ព្រំដែនជ្រៃធំ ដែលបានសង្ស័យចាកចេញពីប្រទេសកម្ពុជា។ជនជាប់ចោទទាំងពីរនាក់នោះ ជាម្ចាស់អតីតមជ្ឈមណ្ឌលOnline scams «ក្រុមហ៊ុន Jin Zi Hui Property Management Co., Ltd.» ស្ថិតនៅសង្កាត់សំពៅពូន ក្រុងសំពៅពូន ខេត្តកណ្ដាល។

បើតាមលោក ហាក់ សុខមករា អភិបាលរងខេត្តកណ្ដាល បានប្រាប់BTVថា អតីតមជ្ឈមណ្ឌលOnline scams «ក្រុមហ៊ុន Jin Zi Hui Property Management Co., Ltd.» ត្រូវបានកម្លាំងគណៈបញ្ជាការឯកភាពខេត្ត ចុះបង្រ្កាបនៅថ្ងៃទី២០ខែមករា ឆ្នាំ២០២៦ ដែលជាប់ពាក់ព័ន្ធនឹងក្រុមហ៊ុនព្រីនស៍។បច្ចុប្បន្នទីតាំងនេះ កម្លាំងគណៈបញ្ជាការឯកភាពខេត្ត ចូលមកគ្រប់គ្រង និងបិទឃ្លុំ ដោយបានតាមដានត្រួតពិនិត្យជាប្រចាំ ដោយកាត់ផ្តាច់ភ្លើង ប្រព័ន្ធអ៉ីនធឺណែត និងទឹក ដែលធ្វើយ៉ាងដូចនេះ គឺមិនអនុញ្ញាតឱ្យមានបទល្មើស Online Scams កើតឡើងវិញនៅទីតាំងនេះ។លោក ហាក់ សុខមករា ក៏បានលើកឡើងពីវិធានការរដ្ឋបាលខេត្តកណ្តាលក្នុងការបង្ក្រាបបទល្មើសអនឡាញផងដែរ។

លោក សេង ហៀង ព្រះរាជអាជ្ញារងរាជធានីភ្នំពេញ បានលើកឡើងថា តុលាការបានចោទប្រកាន់ជនជាប់ចោទពីរូបរួមមាន៖ទី១.ឈីវ យិនអ៊ូ – Qiu Ren Wu (កម្មសិទ្ធករ) និងទី២.ចន រីសស្ទីន – John Riskin (អ្នកឈរឈ្មោះ) ជាម្ចាស់ក្រុមហ៊ុន Jin Zi Hui Property Management Co., Ltd.» ដែលជាមជ្ឈមណ្ឌលឆបោកអនឡាញ។បទល្មើសដែលតុលាការចោទប្រកាន់នោះរួមមាន៖ទី១.បទល្មើសបោកមានស្ថានទម្ងន់ទោស និងទី២.បទល្មើសសម្អាតប្រាក់។

លោកបានបន្តថា បច្ចុប្បន្នកម្លាំងសមត្ថកិច្ចកម្ពុជាកំពុងតាមចាប់ខ្លួន និងបានស្នើទៅនគរបាលព្រហ្មទណ្ឌអន្តរជាតិ (Interpol) ដើម្បីស្វែងរកចាប់ខ្លួន ដែលសង្ស័យចាកចេញពីប្រទេសកម្ពុជា។

គួរបញ្ជាក់ដែរថា អតតីមជ្ឈមណ្ឌលឆបោកOnline scams «ក្រុមហ៊ុន Jin Zi Hui Property Management Co., Ltd.» មានផ្ទៃដីជាង៥០ហិតា ក្នុងនោះមានការសាងសង់អគារចំនួន ៥៥ខ្នងផ្ទះវីឡាចំនួន ១១៣ខ្នង និងមានបន្ទប់ចំនួនជាង៤ពាន់បន្ទប់។រីឯវត្ថុតាងដែលរឹបអូសបាននៅក្នុងរង្វង់ប្រតិបត្តិការរួមមាន៖ កុំព្យូទ័រ ៣ ៧៧៩គ្រឿង, ទូរស័ព្ទដៃ ១១,៥៨៥គ្រឿង, CPU ៥៦គ្រឿង, ម៉ាស៉ីនមេ (Serversr) ៣៥គ្រឿង, ឯកសណ្ឋាននគរបាលបរទេស ៨កប្លេ លិខិតឆ្លងដែន និងសម្ភារៈផ្សេងៗទៀត។អត្ថបទ៖ទូច សោភ័ណ ថត៖ប៉ាន់ ប៉ូនី ហួត រតនៈ រូបភាព៖Online scams នៅព្រំដែនជ្រៃធំ៕