ឧត្តមសេនីយ៍ទោ ប៊ុន សុសិក្ខា៖វត្តុតាងមួយចំនួនធំ ត្រូវបានដកហូតក្នុងប្រតិបត្តិការបង្ក្រាប Online Scams រយៈពេល១ឆ្នាំមកនេះ

ភ្នំពេញ៖រយៈពេល១ឆ្នាំមកនេះ វត្តុតាង និងសម្ភារពាក់ព័ន្ធជាច្រើន ត្រូវបានកម្លាំងនគរបាលរាជធានីភ្នំពេញដកហូត ក្នុងប្រតិបត្តិការបង្ក្រាប Online Scams កន្លងមកក្នុងភូមិសាស្ត្ររាជធានីភ្នំពេញ។

ឧត្តមសេនីយ៍ទោ ប៊ុន សុសិក្ខា ស្នងការរងនគរបាលរាជធានីភ្នំពេញ ទទួលផែនការងារនគរបាលសន្តិសុខ បានឲ្យដឹងថា ៖ លទ្ធផល នៃកិច្ចប្រតិត្តិការបោសសម្អាតបទល្មើសឆបោកតាមប្រព័ន្ធបច្ចេកវិទ្យា (Online Scams) ចាប់ពីថ្ងៃទី០១ ខែកក្កដា ឆ្នាំ២០២៥ ដល់ថ្ងៃទី០៨ ខែកញ្ញា ឆ្នាំ២០២៦ កម្លាំងសមត្ថកិច្ចបានធ្វើការដកហូតវត្ថុតាង និងសម្ភារពាក់ព័ន្ធរួមមាន ៖

១. Desktop ចំនួន ១,០៦១ គ្រឿង

២. Laptop ចំនួន ៩២៣ គ្រឿង

៣. CPU  ចំនួន ២,០៦៤ គ្រឿង

៤. Monitor ចំនួន ៣,៩៥២ គ្រឿង

៥. ALL in One ចំនួន ៣,១៧០ គ្រឿង

៦. I-Mac+Mac-book ចំនួន ២៣ គ្រឿង

៧. ទូរស័ព្ទ  ចំនួន ២៩,៩០០ គ្រឿង

៨. Ipad+Tablet  ចំនួន ៦៤ គ្រឿង ។

សូមរំលឹកថា ៖ នៅវេលារសៀលថ្ងៃទី២២ ខែកញ្ញា ឆ្នាំ២០២៦នេះ នៅស្នងការដ្ឋាននគរបាលរាជធានីភ្នំពេញ បានរៀបចំការធ្វើសន្និសីទបង្ហាញពីលទ្ធផល នៃកិច្ចប្រតិបត្តិការបង្ក្រាបទល្មើសអនឡាញស្គេមកន្លងមក និងបានបើកឃ្លាំងរក្សាទុកវត្ថុតាង និងសម្ភារពាក់ព័ន្ធនឹងបទល្មើសនេះ ជូនអ្នកសារព័ត៌មានជាតិ និងអន្តរជាតិជាច្រើនចូលផ្តិចយករូបភាព និងយកព័ត៌មាន ក្រោមការសម្របសម្រួល និងសហការជាមួយ គណៈកម្មការចំពោះកិច្ចប្រយុទ្ធប្រឆាំងការឆបោតាមប្រព័ន្ធបច្ចេកវិទ្យា ។

ក្នុងសន្និសីទខាងលើនេះ លោកឧត្តមសេនីយ៍ស្នងការរង បញ្ជាក់ថា ៖ ក្នុងរយៈពេល១ឆ្នាំមកនេះ កម្លាំងគណៈបញ្ជាការឯកភាពរដ្ឋបាលរាជធានីភ្នំពេញ បានបង្រ្កាបបទល្មើស Online Scams បានចំនួន១៨៤ករណី ឃាត់ខ្លួនជនសង្ស័យបានជាង៣ពាន់នាក់ ក្នុងនោះមានជាង២០០នាក់បញ្ជូនទៅតុលាការ ។

លោកឧត្តមសេនីយ៍ទោបន្តទៀតថា បើទោះបីឥលូវនេះ បទល្មើសOnline scamsនៅតាមមជ្ឈមណ្ឌលឆបោកធំៗ ត្រូវបានបោសសម្អាតក៏ដោយ ក៏កម្លាំងអាជ្ញាធរមានសមត្ថកិច្ច នៅតែបន្តកិច្ចខិតខំប្រឹងប្រែង ក្នុងការឈានទៅបន្តបោសសម្អាតសម្បុកក្រុមឧក្រិដ្ឋជនដែលកំពុងលាក់បំពួនខ្លួននៅតាមទីតាំងតូចៗ ដោយមិនលើកលែងនោះឡើយ ដើម្បីឆ្លើយតបទៅនឹងបទបញ្ជាម៉ឺងម៉ាត់របស់ប្រមុខរាជរដ្ឋាភិបាល ក្នុងការថែរក្សាការពារ សន្តិសុខ និងស្ថេរភាពជូនប្រជាជន និងសង្គមជាតិ ៕ លីហេង