សន្និសីទ ICCOS បង្ហាញកិច្ចខិតខំ​ប្រឹងប្រែង​ប្រយុទ្ធ​ប្រឆាំង​បទ​ល្មើស​តាម​ប្រព័ន្ធ​អន​ឡាញ​របស់​កម្ពុជា ​និងជំរុញការវិនិយោគ និងទេសចរណ៍

ភ្នំពេញ៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានបញ្ជាក់ថា ការរៀបចំ​សន្និសីទ​អន្តរជាតិ​ប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ICCOS) នៅកម្ពុជា គឺជាឱកាស​សំខាន់​មួយ​ក្នុងការបង្ហាញពីកិច្ចខិតខំប្រឹងប្រែងរបស់កម្ពុជា ក្នុងការប្រយុទ្ធ​ប្រឆាំង​បទ​ល្មើស​តាម​ប្រព័ន្ធ​អន​ឡាញ ព្រមទាំងជួយផ្សព្វផ្សាយសក្តានុពលរបស់កម្ពុជាទៅកាន់អន្តរជាតិ និងលើក​កម្ពស់​ប្រទេសជាគោលដៅវិនិយោគ និងទេសចរណ៍។

ឯកឧត្តម ស៊ុន សុវណ្ណារិទ្ធិ បានមានប្រសាសន៍ថា តាមរយៈ​ការរៀបចំ​សន្និសីទ​អន្តរជាតិ​ស្តីពី​ការ​ប្រយុ​ទ្ធ​ប្រឆាំងការឆបោកតាមប្រព័ន្ធបច្ចេកវិទ្យា (ICCOS) ក្នុងរយៈពេលពីរថ្ងៃនេះ កម្ពុជា​បាន​បង្ហាញ​ឱ្យ​សហគមន៍អន្តរជាតិឃើញថា ប្រទេសកម្ពុជាកំពុងយកចិត្តទុកដាក់ និងខិតខំ​ប្រឹង​ប្រែង​យ៉ាង​សកម្មក្នុ​ងការទប់ស្កាត់ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា។ កិច្ច​ខិត​ខំ​ប្រឹង​ប្រែង​នេះ ​ក៏ជាផ្នែកមួយក្នុងការលើកកម្ពស់កេរ្តិ៍ឈ្មោះ និងភាពជឿជាក់​របស់​កម្ពុជា​នៅ​លើ​ឆាក​អន្តរជាតិ​។

ឯកឧត្តមបានបន្តថា សន្និសីទអន្តរជាតិ ICCOS ក៏បានចូល​រួម​ចំណែក​ក្នុង​ការ​ពង្រឹង​ទំនុក​ចិត្ត​របស់​វិនិយោគិនបរទេស និងភ្ញៀវទេសចរអន្តរជាតិ ដោយបង្ហាញពី​ការ​ខិតខំ​របស់​កម្ពុជា​ក្នុង​ការ​បង្កើត​បរិយាកាសប្រកបដោយសុវត្ថិភាព និងមានភាពជឿជាក់ សម្រាប់ការវិនិយោគ និង​ការ​ធ្វើ​ដំណើរ​ទេសចរណ៍​។

ជាមួយគ្នានេះ ឯកឧត្តម ស៊ុន សុវណ្ណារិទ្ធិ បានលើកឡើងថា ខេត្តកំពង់ឆ្នាំង គឺជាខេត្តមួយដែលមានសក្តានុពលសម្រាប់ការវិនិយោគ ដោយសារមានទីតាំងភូមិសាស្ត្រអំណោយផល និងមានសក្ដានុពលក្នុងការអភិវឌ្ឍលើវិស័យផ្សេងៗ។ ឯកឧត្តមក៏បានបញ្ជាក់ពីស្ថានភាពសន្តិសុខក្នុងមូលដ្ឋាន និងបានអំពាវនាវដល់វិនិយោគិនបរទេស និងភ្ញៀវទេសចរអន្តរជាតិ ឱ្យពិចារណាមកវិនិយោគ និងមកទស្សនាប្រទេសកម្ពុជា ជាពិសេស ខេត្តកំពង់ឆ្នាំង ដែលជាតំបន់មានសក្តានុពលសម្រាប់ការវិនិយោគ និងទេសចរណ៍។

ខេត្តកំពង់ឆ្នាំងគឺជាតំបន់សក្តានុពលមួយដែលបានទាក់ទាញគម្រោងវិនិយោគខ្នាតធំជាច្រើន រួមមាន គម្រោងដំឡើងរថយន្ត, ស្ថានីយថាមពលព្រះអាទិត្យ, វិស័យហេដ្ឋារចនាសម្ព័ន្ធ និងរោងចក្រកាត់ដេរ ជាច្រើនទៀត៕ អត្ថបទ៖ ធូ វិរៈ