ក្រសួងការងារ ផ្សព្វផ្សាយឱកាសការងាររាប់ម៉ឺនកន្លែងដល់និស្សិត​នៅសាកលវិទ្យាល័យ​ធំៗចំនួន៤ នៅរាជធានីភ្នំពេញ

ទីភ្នាក់ងារជាតិមុខរបរ និងការងារ (NEA)នៃក្រសួងការងារ និងបណ្តុះ​បណ្តាល​វិជ្ជាជីវៈ​តាមរយៈ​មជ្ឈមណ្ឌលការងារចល័ត នៅថ្ងៃទី៨ ខែសីហា ឆ្នាំ២០២៤នេះ បានចុះផ្សព្វផ្សាយ​ឱកាស​ការងារ​រ៉ាប់​ម៉ឺន​កន្លែងដល់និស្សិតនៅសាកលវិទ្យាល័យធំៗចំនួន៤ នៅរាជធានីភ្នំពេញ។ សាកលវិទ្យាល័យធំៗទាំងនោះរួមមានសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) , សាកលវិទ្យាល័យភូមិន្ទវិចិត្រសិល្បះ (RUFA) , សាកលវិទ្យាល័យអន្តរជាតិ ( IU) និង​សាកលវិទ្យាល័យបញ្ញាសាស្រ្តកម្ពុជា(PUC)។

លោក ជិន ខិ អនុប្រធានមជ្ឈមណ្ឌលការងាររាជធានីភ្នំពេញនៃទីភ្នាក់ងារជាតិមុខរបរ និងការងារ នៃ​ក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា មជ្ឈ​ម​ណ្ឌល​ចល័ត​របស់​យើង​បាន​ចុះ​ទៅដល់គ្រប់ទីកន្លែង មិនត្រឹមតែនៅតាមសាកលវិទ្យាល័យក្នុងរាជធានីភ្នំពេញនោះទេ ទីតាំង​សាធារណៈផ្សេងៗទៀតក៏យើងទៅដល់ដែរ។ លោក ជិន ខិ បញ្ជាក់បន្ថែមថា តាម​រយៈ​ការ​ផ្សព្វ​ផ្សាយ​ពីឱកាសការងារទៅដល់ទីកន្លែងនេះ យើងមើលឃើញ​ថា​មាន​ការ​ចាប់​អារម្មណ៍​ជា​ច្រើន​ពី​សំណាក់យុវជន សិស្ស និស្សិត ក៏ដូចជាអ្នកកំពុងស្វែងរកការងារធ្វើ ឬអ្នកមាន​បំណង​ចង់​ផ្លាស់​ប្តូរការងារ។ លើសពីនេះទៀត យើងក៏ទទួល​បាន​ការ​សាក​សួរ​ព័ត៌មាន​អំពី​ឱកាស​ការងារ​ក្នុង​វិស័យ​ផ្សេង​​ៗជាច្រើនផងដែរ។

លោកបានឱ្យដឹងទៀតថា ក្រៅពីការងារចុះផ្សព្វផ្សាយពីឱកាសការងារដល់ទីតាំងផ្ទាល់នេះ ទីភ្នាក់​ងារ​ជាតិ​មុខរបរ និងការងារ ក៏នឹងបន្តរៀបចំវេទិកាការងារ ពិព័រណ៍ការងារ និង​កិច្ច​សម្ភាស​ការងារ​ជា​ប្រចាំ ដើម្បីបង្កើតជាកន្លែងជួបជុំគ្នាដោយងាយស្រួលរវាងអ្នកស្វែងរកការងារធ្វើ និង​និយោជក​ដែល​កំពុងត្រូវការជ្រើសរើសបុគ្គលិកអាចពិភាក្សា និងស្វែងយល់អំពីតម្រូវការជំនាញ នៅ​ក្នុង​ទីផ្សារ​ការងារ ដែលកំពុងមានតម្រូវការនាពេលបច្ចុប្បន្នផងដែរ។

ការចុះផ្សព្វផ្សាយនេះធ្វើឡើងតាមរយៈមជ្ឈមណ្ឌលចល័តនេះ ដែលនេះ​គឺ​ជា​យន្តការ​បន្ត​សកម្មភាព​ផ្សព្វផ្សាយឱកាសការងារនៅតាមសាកលវិទ្យាល័យនានា ដើម្បីផ្តល់​ព័ត៌មាន​អំពី​ទីផ្សា​រ​ការងារ និងនាំយកឱកាសការងារឱ្យខិតជិតដល់យុវជន សិស្ស និស្សិត សាធារណជនទូទៅ ក្នុង​គោល​បំណងបង្កើនលទ្ធភាពនៃការទទួលបានព័ត៌មានការងារ និងឱកាសការ​ងារ​កាន់​តែ​ឆាប់​រហ័ស​៕