ក្រោយ សន្និសីទអន្តរជាតិ ICCOS-2026 កម្ពុជារំពឹង ពង្រឹងទំនុកចិត្តពីវិនិយោគិន និងទេសចរបន្ថែមទៀត

ការរៀបចំសន្និសីទអន្តរជាតិ ICCOS-2026 ស្តីពីការប្រយុទ្ធប្រឆាំងការបោកប្រាស់តាមប្រព័ន្ធបច្ចេកវិទ្យា មិនត្រឹមតែបង្ហាញពីការប្តេជ្ញាចិត្តរបស់កម្ពុជាក្នុងការទប់ស្កាត់ការបោកប្រាស់ប៉ុណ្ណោះទេ ប៉ុន្តែថែមទាំងអាចជួយពង្រឹងកេរ្តិ៍ឈ្មោះ និងទំនុកចិត្តពីសហគមន៍អន្តរជាតិ។ អ្នកជំនាញសេដ្ឋកិច្ចយល់ថា ប្រសិនបើកម្ពុជាបន្តអនុវត្តវិធានការបង្ក្រាបបានជាក់ស្តែង ការណ៍នេះអាចជួយលើកកម្ពស់ទំនុកចិត្តរបស់វិនិយោគិន និងភ្ញៀវទេសចរ។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិតសភា មានប្រសាសន៍ថា ការរៀបចំវេទិកាអន្តរជាតិស្តីពីការប្រយុទ្ធប្រឆាំងការបោកប្រាស់តាមប្រព័ន្ធបច្ចេកវិទ្យា គឺជាការបង្ហាញពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការទប់ស្កាត់ និងលុបបំបាត់ការបោកប្រាស់តាមប្រព័ន្ធបច្ចេកវិទ្យានៅក្នុងប្រទេស។ លោកបណ្ឌិតបញ្ជាក់ថា ការបន្តអនុវត្តវិធានការបង្ក្រាបការបោកប្រាស់តាមប្រព័ន្ធបច្ចេកវិទ្យា នឹងជួយពង្រឹងទំនុកចិត្តរបស់វិនិយោគិន និងភ្ញៀវទេសចរ ហើយអាចជំរុញឱ្យពួកគេចាប់អារម្មណ៍មកវិនិយោគ និងធ្វើដំណើរទេសចរណ៍នៅកម្ពុជាកាន់តែច្រើន។

លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ កត់សម្គាល់ថា ការរៀបចំសន្និសីទអន្តរជាតិ ICCOS-2026 ប្រកបដោយជោគជ័យ បានរួមចំណែកលើកកម្ពស់កេរ្តិ៍ឈ្មោះ និងភាពជឿជាក់លើកម្ពុជានៅលើឆាកអន្តរជាតិ។ លោកយល់ថា លទ្ធផលពីសន្និសីទនេះអាចជារបត់សំខាន់មួយ ក្នុងការបង្ហាញទៅកាន់វិនិយោគិនអន្តរជាតិថា កម្ពុជាមានការប្តេជ្ញាចិត្តយ៉ាងមោះមុតក្នុងការប្រយុទ្ធប្រឆាំង និងលុបបំបាត់ការបោកប្រាស់តាមប្រព័ន្ធបច្ចេកវិទ្យា។ លោករំពឹងថា ការប្តេជ្ញាចិត្ត និងវិធានការជាក់ស្តែងរបស់កម្ពុជា នឹងជួយពង្រឹងទំនុកចិត្តរបស់វិនិយោគិន និងភ្ញៀវទេសចរ និងជំរុញការសម្រេចចិត្តមកវិនិយោគ និងធ្វើដំណើរទេសចរណ៍នៅកម្ពុជា។

ក្នុងសន្និសីទ ICCOS-2026 រាជរដ្ឋាភិបាលកម្ពុជាបានបង្ហាញទៅកាន់ពិភពលោកថា កម្ពុជាបានបង្ក្រាបមជ្ឈមណ្ឌលឆបោក និងប្តេជ្ញាបន្តលុបបំបាត់សកម្មភាពឆបោកតាមប្រព័ន្ធបច្ចេកវិទ្យា។ សារនេះត្រូវបានអ្នកជំនាញសេដ្ឋកិច្ចមើលឃើញថា អាចជួយពង្រឹងទំនុកចិត្ត និងកែលម្អកេរ្តិ៍ឈ្មោះរបស់កម្ពុជាចំពោះវិនិយោគិន និងភ្ញៀវទេសចរអន្តរជាតិ។ អត្ថបទ៖ធូ វិរៈ