គណៈប្រតិភូសភាកម្ពុជាពង្រឹងកិច្ចសហប្រតិបត្តិការសភា និងពិភាក្សាការត្រៀមធ្វើជាម្ចាស់ផ្ទះកិច្ចប្រជុំគណៈកម្មាធិការអចិន្ត្រៃយ៍ ស្តីពីកិច្ចការសង្គម និងវប្បធម៌ APA ឆ្នាំ២០២៧

នៅថ្ងៃទី២៤ ខែកញ្ញា ឆ្នាំ២០២៦ នៅទីក្រុងឌូស្ហាន់បេ សាធារណរដ្ឋតាជីគីស្ថាន ឯកឧត្តម ងី ច័ន្ទ្រផល ប្រធានគណៈកម្មការទី១ នៃព្រឹទ្ធសភា និងជាប្រធានគណៈប្រតិភូសភាកម្ពុជា បានជួបពិភាក្សាជាមួយថ្នាក់ដឹកនាំសភាតំបន់អាស៊ី (APA) និងរដ្ឋសភាតាជីគីស្ថាន ព្រមទាំងចូលរួមកិច្ចប្រជុំគណៈកម្មការដឹកនាំ APA អមកិច្ចប្រជុំគណៈកម្មាធិការអចិន្ត្រៃយ៍ ស្តីពីកិច្ចការសង្គម និងវប្បធម៌។ សកម្មភាពទាំងនេះផ្តោតលើការពង្រឹងទំនាក់ទំនងសភា និងការត្រៀមលក្ខណៈរបស់កម្ពុជាក្នុងការធ្វើជាម្ចាស់ផ្ទះកិច្ចប្រជុំគណៈកម្មាធិការនេះនៅឆ្នាំ២០២៧។

ក្នុងជំនួបជាមួយ ឯកឧត្តមបណ្ឌិត Mohammad Reza Majidi អគ្គលេខាធិការ APA ឯកឧត្តមបណ្ឌិតបានស្វាគមន៍ការត្រៀមធ្វើជាម្ចាស់ផ្ទះរបស់កម្ពុជា ហើយភាគីទាំងពីរបានផ្លាស់ប្តូរយោបល់អំពីមូលបទ ខ្លឹមសារ និងការងាររៀបចំកិច្ចប្រជុំ ដោយផ្តោតលើការលើកកម្ពស់ភាពចម្រុះនៃវប្បធម៌ សាមគ្គីភាពអាស៊ី និងកិច្ចសហប្រតិបត្តិការសភាដើម្បីសន្តិភាព និងការអភិវឌ្ឍ។ អគ្គលេខាធិការដ្ឋាន APA បានបង្ហាញការត្រៀមសហការជាមួយភាគីកម្ពុជា ដើម្បីជំរុញការងារនេះឱ្យដំណើរការទៅមុខ។

បទពិសោធន៍របស់តាជីគីស្ថានក្នុងការរៀបចំកិច្ចប្រជុំឆ្នាំនេះ ក៏ជាចំណុចសំខាន់មួយក្នុងជំនួបរវាងឯកឧត្តម ងី ច័ន្ទ្រផល និងលោកជំទាវ Mavsuma Muini អនុប្រធានរដ្ឋសភាតាជីគីស្ថានផងដែរ។ ភាគីតាជីគីស្ថានបានបង្ហាញឆន្ទៈចែករំលែកបទពិសោធន៍ទាំងនេះជាមួយកម្ពុជា ខណៈភាគីទាំងពីរបានពិភាក្សាពីការពង្រីកកិច្ចសហប្រតិបត្តិការរវាងសភា តាមរយៈការផ្លាស់ប្តូរគណៈប្រតិភូ បទពិសោធន៍នីតិកម្ម និងទំនាក់ទំនងរវាងគណៈកម្មការ។ លោកជំទាវក៏បានជម្រាបពីគម្រោងបង្កើតក្រុមមិត្តភាពសភាតាជីគីស្ថាន–កម្ពុជា ដើម្បីបន្តពង្រឹងចំណងមិត្តភាពរវាងប្រទេសទាំងពីរ។

ការប្តេជ្ញាចិត្តរបស់កម្ពុជាចំពោះកិច្ចសហប្រតិបត្តិការសភា និងការត្រៀមធ្វើជាម្ចាស់ផ្ទះនៅឆ្នាំ២០២៧ ត្រូវបានឯកឧត្តម ងី ច័ន្ទ្រផល បញ្ជាក់ជាថ្មី នៅពេលត្រូវបានអញ្ជើញឱ្យមានមតិក្នុងកិច្ចប្រជុំគណៈកម្មការដឹកនាំ APA។ ឯកឧត្តមបានលើកឡើងពីបទពិសោធន៍របស់កម្ពុជាក្នុងការកសាងសន្តិភាព និងការផ្សះផ្សាជាតិ ព្រមទាំងសារៈសំខាន់នៃកិច្ចសន្ទនារវាងវប្បធម៌ និងសាសនា ក្នុងការកសាងទំនុកចិត្ត និងការយោគយល់គ្នា។ តំណាងព្រះរាជាណាចក្របារ៉ែន ដែលដឹកនាំកិច្ចប្រជុំក្នុងនាមប្រទេសកាន់តំណែងប្រធាន APA បានស្វាគមន៍ការប្រកាសត្រៀមខ្លួនរបស់កម្ពុជា និងបង្ហាញឆន្ទៈសហការសម្រាប់ការរៀបចំកិច្ចប្រជុំនាពេលខាងមុខ។