ព័ត៌មាន

ជំនន់ទឹកស្ទឹងសង្កែធ្វើឱ្យប៉ះពាល់ផ្ទះប្រជាពលរដ្ឋ ដំណាំ និងហេដ្ឋារចនាសម្ព័ន្ធមួយចំនួនក្នុងភូមិសាស្ត្រស្រុកឯកភ្នំ

នៅថ្ងៃទី២៥ ខែកញ្ញា ឆ្នាំ២០២៦ លោក ប៊ី សុភាព អភិបាលនៃគណៈអភិបាលស្រុក និងជាប្រធានគណៈបញ្ជាការឯកភាពរដ្ឋបាលស្រុក បានដឹកនាំកម្លាំងគណៈបញ្ជាការឯកភាពរដ្ឋបាលស្រុក ចុះពិនិត្យស្ថានភាពទឹកជំនន់ស្ទឹងសង្កែដែលធ្វើឱ្យប៉ះពាល់ដល់ផ្ទះបងប្អូនប្រជាពលរដ្ឋ ហេដ្ឋារចនាសម្ព័ន្ធផ្លូវថ្នល់ និងដំណាំរបស់បងប្អូនប្រជាពលរដ្ឋជាច្រើន។

បើតាមរដ្ឋបាលស្រុកឯកភ្នំ បានឱ្យដឹងថា ឃុំចំនួន៥ក្នុងភូមិសាស្រ្តស្រុកឯកភ្នំបានរងផលប៉ះពាល់ដោយសារជំនន់ទឹកស្ទឹងសង្កែសរុបរួមមាន៖ប៉ះពាល់ផ្ទះប្រជាពលរដ្ឋសរុបចំនួន ១ ៨៣២ ខ្នងផ្ទះ ស្មើនឹង ២ ០៨៣ គ្រួសារ,ប៉ះពាល់ហេដ្ឋារចនាសម្ព័ន្ធផ្លូវថ្នល់ចំនួន៥១ទីតាំង សរុបប្រវែងប្រមាណ ២២ ៦៤០ ម៉ែត្រ,ប៉ះពាល់ដំណាំសរុបចំនួន២ ១២៦.៥ហិកតា ក្នុងនោះដំណាំស្រូវប្រមាណ ២ ០៨៨ហិកតា និងដំណាំរួមផ្សំប្រមាណ ៣៨.៥ ហិកតា។

គិតត្រឹមម៉ោង ៣៖០០នាទីរសៀលថ្ងៃទី២៥ ខែកញ្ញា ឆ្នាំ២០២៦ ទឹកស្ទឹងសង្កែនៅចំណុចទំនប់សាលាតាអន បានហក់ឡើងដល់កម្ពស់ ១៣.៤០ម៉ែត្រ ជាកម្ពស់ត្រៀមប្រកាសអាសន្ន ដូច្នេះសូមបងប្អូនប្រជាពលរដ្ឋដែលរស់នៅតាមបណ្ដោយស្ទឹងសង្កែ មេត្តាបង្កើនការប្រុងប្រយ័ត្នឱ្យបានខ្ពស់ ជាពិសេសកុមារតូច។

ជាមួយគ្នានោះ លោកអភិបាលស្រុកបានដាក់បទបញ្ជាដល់អាជ្ញាធរ និងកងកម្លាំងប្រដាប់អាវុធគ្រប់ប្រភេទត្រូវត្រៀមលក្ខណៈកម្លាំង និងមធ្យោបាយសង្គ្រោះ ដើម្បីចុះអន្តរាគមន៍ជួយសង្គ្រោះប្រជាពលរដ្ឋបានទាន់ពេលវេលា ក្នុងករណីមានគ្រោះអាសន្ន ឬស្ថានភាពទឹកជំនន់បន្តវិវត្តកាន់តែធ្ងន់ធ្ងរឡើងជាយថាហេតុ៕