ប្រធានរដ្ឋសភា ជំរុញចលនាស្រ្ដីខេត្តកណ្ដាលខិតខំបម្រើសេវាជូនពលរដ្ឋ ពង្រឹងសមត្ថភាព ឆ្ពោះ​ទៅ​ការបោះឆ្នោតឆ្នាំ២០២៧

សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងជាប្រធានក្រុមចលនាស្រ្ដី នៃ​ក្រុម​ការងារគណបក្សចុះមូលដ្ឋានខេត្តកណ្ដាល ជំរុញចលនាស្រ្ដី ដែលជាមន្រ្ដីមូលដ្ឋាន ខិតខំ​បម្រើ​សេវា​ជូនពលរដ្ឋឱ្យកាន់តែល្អ ពង្រងសមត្ថភាព ឆ្ពោះទៅរកការបោះឆ្នោត ឃុំ-សង្កាត់ ឆ្នាំ​២០២៧។

ប្រសាសន៍របស់សម្ដេចមហារដ្ឋសភាធិការធិបតី ឃួន សុដារី ធ្វើឡើងនៅថ្ងៃទី២៦ ខែកញ្ញា ឆ្នាំ​២០២៦​នេះ ក្នុងឱកាសសម្ដេចអញ្ជើញដឹកនាំកិច្ចប្រជុំបូកសរុបវឌ្ឍនភាពការងារ និងលើក​ទិស​ដៅ​ភារ​កិច្ចបន្ត ឆ្នាំ២០២៧ របស់ក្រុមការងារចលនាស្រ្ដី នៃក្រុមការងារគណបក្សចុះមូលដ្ឋាន ខេត្ត​កណ្ដាល ដែលមានការអញ្ជើញចូលរួមពីគណៈអភិបាលក្រុង ស្រុក ទាំង ១៣ នៃ​ខេត្ត​កណ្ដាល​។

ជាកិច្ចចាប់ផ្ដើមសម្ដេចមហារដ្ឋសភាធិបតី ឃួន សុដារី បាននាំនូវប្រសាសន៍ផ្ដាំផ្ញើសួរសុខទុក្ខ ពី​សម្ដេច​អគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជា​ប្រមុខ​រដ្ឋ​ស្ដីទី​ និងសម្ដេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និង​ជា​នាយក​រដ្ឋមន្រ្ដី ជូនមន្រ្ដីមូលដ្ឋានខេត្តកណ្ដាល ដែលខិតខំបំពេញការងារ អនុវត្ត​តាម​ចក្ខុ​វិស័យ​របស់​រាជ​រដ្ឋាភិបាល ក្នុងការបម្រើប្រជាពលរដ្ឋ។

សម្ដេចរដ្ឋសភាធិបតី មានប្រាសន៍ថា នៅឆ្នាំ២០២៧ គឺជាព្រឹត្តិការណ៍បោះឆ្នោត ជ្រើស​រើស​ក្រុ​ម​ប្រឹក្សា ​ឃុំ សង្កាត់ អាណត្តិទី៦ ដែលនៅបាំងក្នុងរយៈខ្លីទៀតតែប៉ុណ្ណោះ ហេតុ​ដូច្នេះ​មន្រ្ដី​មូល​ដ្ឋាន​គ្រប់​រូប​ ត្រូវត្រៀមខ្លួនឱ្យរួចរាល់ និងត្រូវបន្តប្រឹងប្រែងក្នុងការបម្រើសេវា ឱ្យបានល្អ ជូន​ប្រជា​ពលរដ្ឋ​ អនុវត្តឱ្យបានម៉ឺងម៉ាត់ តាមគោលនយោបាយរបស់រាជរដ្ឋាភិបាល។ សម្ដេចបន្តថា សម្ដេច​តេជោ ហ៊ុន សែន ប្រធានគណបក្ស បានប្រកាសរួចហើយ ពីការផ្ដល់ឱកាសជូនស្រ្ដី ដែល​មាន​សមត្ថភាព ក្នុងការកាន់តួនាទីជាថ្នាក់ដឹកនាំមូលដ្ឋាន ខណៈខេត្តកណ្ដាល បានកំណត់​អាទិភាព​ខ្ពស់​ជូន​ស្រ្ដី ក្នុងបញ្ជីឈ្មោះបោះឆ្នោត ស្ថិតនៅលេខរៀងអាទិភាព ចាប់ពីលេខរៀងទី៣ ឡើង​ទៅ​។

ជាការឆ្លើយតបចំពោះអនុសាសន៍របស់សម្ដេចប្រធានរដ្ឋសភា និង​ជា​ប្រធាន​ក្រុម​ការងារ​ចលនា​ស្រ្ដី​ខេត្ត​កណ្ដាល មន្រ្ដីមូលដ្ឋានទាំង ១៣ក្រុង ស្រុក នៃខេត្តកណ្ដាល ពិសេសស្រ្ដី បង្ហាញ​ការ​ប្ដេជ្ញា​ចិត្ត​ខ្ពស់ នឹងបម្រើសេវាពលរដ្ឋឱ្យកាន់តែល្អ និងខិតខំពង្រឹងសមត្ថភាព រៀនសូត្របន្ថែម ដើម្បី​ចាប់យកឱកាសជាថ្នាក់ដឹកនាំមូលដ្ឋាន ឆ្លើយតបការផ្ដល់តម្លៃខ្ពស់របស់សម្ដេចតេជោ ហ៊ុន សែន ដែលលើកម្ពស់តួនាទីស្រ្ដី ទាំងក្នុងវិស័យ សង្គម សេដ្ឋកិច្ច និងនយោបាយ៕ អត្ថបទ៖ លៀ ស៊ីណា