ព្រះសង្ឃវត្តបទុមវតី ចែកបបរដល់ពលរដ្ឋកំពុងស្នាក់នៅមន្ទីរពេទ្យគន្ធបុប្ផាទី២ ក្នុងថ្ងៃកាន់បិណ្ឌ៦

ស្ថិតក្នុងថ្ងៃកាន់បិណ្ឌ៦ ត្រូវនឹងថ្ងៃទី០២ខែតុលា ឆ្នាំ២០២៦ ព្រះសង្ឃគង់នៅវត្តបទុមវតីរាជវរារាម បានយកបបរចែកជូនប្រជាពលរដ្ឋកំពុងស្នាក់នៅមន្ទីរពេទ្យគន្ធបុប្ផាទី២ ក្រោយព្រះបរមរាជវាំង រាជធានីភ្នំពេញ។

ព្រះតេជគុណ សាន ភារ៉េត មេកុដិ លេខ២៣ នៃវត្តបទុមវតីរាជវរារាម មានសង្ឃដីកាប្រាប់BTVថា កាចែកបបរជូនប្រជាពលរដ្ឋស្នាក់នៅមន្ទីរពេទ្យគន្ធបុប្ផាទី២ គឺធ្វើឡើងជារៀងរាល់ព្រឹក ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ដែលមានរយៈពេល១៥ថ្ងៃ។ ហើយការផ្តល់ទានជាបបរនេះ ទទួលបានពីពុទ្ធបរិស័ទជាម្ចាស់វេន និងព្រះចៅអធិការវត្តបទុមវតី បានស្នើដល់ចុងភៅរក្សាទុកបបរមួយខ្ទះជារៀងរាល់ព្រឹក។ ព្រះតេជគុណ សាន ភារ៉េត មានសង្ឃដីកាបន្តថា ក្រោយបញ្ចប់ពិធីបុណ្យកាន់បិណ្ឌ និងភ្ជុំបិណ្ឌ ប្រសិនបើវត្តនៅសល់ស្បៀង អាហារ និងរបស់របរមួយចំនួនទៀតអាចប្រើប្រាស់បាន នឹងយកទៅបែងចែកផ្តល់ជាអំណោយដល់ស្ថាប័នផ្សេងៗទៀតដូចជា៖ កាកបាទក្រហម និងពន្ធនាគារជាដើម។

ប្រជាពលរដ្ឋមកទទួលបបរបានលើកឡើងថា បបរទទួលបាននៅពេលនេះ មានរសជាតិឆ្ងាញ់ និងរួមចំណែកកាត់បន្ថយការចំណាយបានមួយកំរិតលើការហូបចុកក្នុងពេលស្នាក់នៅមន្ទីរពេទ្យគន្ធបុប្ផាទី២។ពលរដ្ឋទាំងនោះបន្តថា ក្រៅពីទទួលបានបបរពីព្រះសង្ឃនៅវត្តបទុមវតី នៅពេលថ្ងៃ និងល្ងាចនេះ មានសប្បុរសជនមួយចំនួន បាននាំគ្នាចែកបាយម្ហូបផងដែរ។

ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ព្រះសង្ឃ និងពុទ្ធបរិស័ទ តែងតែធ្វើបុណ្យទានដល់ប្រជាពលរដ្ឋមានការខ្វះខាត ឬជួបការលំបាកផ្សេងៗ។ សកម្មភាពមនុស្សធម៌ និងការចែករំលែកនេះ គឺជាប្រពៃណីដ៏ល្អផូរផង់របស់សង្គមជាតិខ្មែរ ៕

អត្ថបទ៖ ទូច សោភ័ណ