យុវតីក្លាហានស្ម័គ្រចិត្តចូលបំពេញកាតព្វកិច្ចយោធាដោយសារឈឺចាប់នឹងការឈ្លានពានរបស់ថៃ

កាតព្វកិច្ចយោធាច្បាប់តម្រូវសម្រាប់បុរស ប៉ុន្តែដោយសារភាពក្លាហាន និងការឈឺចាប់ដោយសារថៃឈ្លានពានមកលើទឹកដីខ្មែរធ្វើឱ្យយុវតីជាច្រើននាក់បានស្ម័គ្រចិត្តសុំចូលបំពេញកាតព្វកិច្ចយោធាជាបន្តបន្ទាប់។ជាក់ស្ដែងយុវតីមួយចំនួននៅក្នុងខេត្តបាត់ដំបងក៏បានស្ម័គ្រចិត្តសុំចូលបំពេញកាតព្វកិច្ចយោធាផងដែរ។

ការស្ម័គ្រចិត្តសុំចូលបំពេញកាតព្វកិច្ចយោធានេះ ត្រូវបានយុវតី អះអាងថា ពួកគេទន្ទឹងរង់ចាំឱកាសនេះជាយូរមកហើយដើម្បីបានរួមចំណែកការពារបូរណភាពទឹកដី និងប្រជាជន។

យុវតី បានបង្ហាញអារម្មណ៍រំភើប និងថ្លែងអំណរគុណដល់រាជរដ្ឋាភិបាលកម្ពុជាដែលបានដាក់ឱ្យអនុវត្តច្បាប់ស្ដីពីកាតព្វកិច្ចយោធាដើម្បីផ្ដល់ឱកាសឱ្យកូនខ្មែរចូលរួមរៀនសូត្រ ហ្វឹកហាត់ និងអភិវឌ្ឍខ្លួនរួមចំណែកបំពេញកាតព្វកិច្ចចំពោះជាតិ។

យុវតីដែលមកទទួលពាក្យសុំស្ម័គ្រចិត្តចូលបំពេញកាតព្វកិច្ចយោធា បានអំពាវនាវដល់កូនខ្មែរទាំងបុរស និងស្រ្តី ឱ្យចូលរួមដាក់ពាក្យស្ម័គ្រចិត្តចូលបំពេញកាតព្វកិច្ចយោធា ដើម្បីមានឱកាសហ្វឹកហាត់កាយសម្បទា ចំណេះជំនាញ ចៀសឆ្ងាយពីគ្រឿងញៀន និងក្លាយជាធនធានមនុស្សសម្រាប់ជាតិ។

សូមជម្រាបថា រាជរដ្ឋាភិបាលកម្ពុជាបានដាក់ឱ្យអនុវត្តន៍ច្បាប់ស្ដីពីកាតព្វកិច្ចយោធាដើម្បីផ្ដល់ឱកាសឱ្យយុវជនជំនាន់ថ្មីមានលទ្ធភាពក្នុងការចូលរួមការពារជាតិ ប្រកបដោយវិន័យ មានការលត់ដំ មានកាយសម្បទារឹងមាំ មានជំនាញវិជ្ជាជីវៈ មានឆន្ទៈ មនសិការ ឧត្តមគតិស្នេហាជាតិ និងហ៊ានធ្វើពលិកម្មគ្រប់បែបយ៉ាងប្រកបដោយភាពអង់អាចក្លាហានដើម្បីបុព្វហេតុជាតិមាតុភូមិ ព្រមទាំងក្លាយជាធនធានមនុស្សដែលស្ថាប័នរដ្ឋ និងឯកជនចង់បានយកទៅបម្រើការ។

ការចែកពាក្យសុំស្ម័គ្រចិត្តចូលបំពេញកាតព្វកិច្ចយោធាធ្វើឡើងនៅតាមមូលដ្ឋានកងរាជអាវុធហត្ថក្រុង ស្រុក ខណ្ឌនៅទូទាំងប្រទេស ចាប់ពីថ្ងៃទី១ដល់ថ្ងៃទី៩ ខែតុលា ឆ្នាំ២០២៦ រៀងរាល់ម៉ោងធ្វើការ សម្រាប់ប្រជាពលរដ្ឋខ្មែរទាំងពីរភេទអាយុ១៨–២៥ឆ្នាំ៕