គណៈកម្មាធិការជាតិកាតព្វកិច្ចយោធា បង្ហាញមោទនភាពចំពោះសន្ទុះយុវជនចុះឈ្មោះបំពេញកាតព្វកិច្ចយោធា

មន្ត្រីជាន់ខ្ពស់គណៈកម្មាធិការជាតិកាតព្វកិច្ចយោធា បានបញ្ជាក់ថា សន្ទុះយុវជនស្ម័គ្រចិត្តចូលបំពេញកាតព្វកិច្ចយោធា ចាប់ពីថ្ងៃទី០១ ដល់ថ្ងៃទី០៩ ខែតុលា ឆ្នាំ២០២៦ គឺមានការផុសផុលខ្លាំងក្លា និងជាប្រវត្តិសាស្ត្រ និងបានកោតសរសើរចំពោះទឹកចិត្តយុវជន និងប្រជាពលរដ្ឋដែលមានស្មារតីស្នេហាជាតិ។

នាយឧត្តមសេនីយ៍ ភួង ស៊ីផាន រដ្ឋលេខាធិការក្រសួងការពារជាតិ និងជាអនុប្រធានអចិន្ត្រៃយ៍នៃគណៈកម្មាធិការជាតិកាតព្វកិច្ចយោធា បានប្រាប់BTVថា ចំនួនយុវជនចុះឈ្មោះបំពេញកាតព្វកិច្ចយោធា ចាប់ពីថ្ងៃទី០១ ដល់ថ្ងៃទី០៩ ខែតុលា ឆ្នាំ២០២៦ គឺមានសន្ទុះផុសផុលខ្លាំង ទឹកចិត្តស្ម័គ្រចិត្តរបស់យុវជន គឺធ្វើឱ្យមានមោទនភាពជាតិខ្លាំង ពោលគឺយុវជនមានការពុះកញ្ជ្រោលខ្លាំងក្លាជាងពេលណាទាំងអស់ និងជាប្រវត្តិសាស្ត្រ។ គណៈកម្មាធិការជាតិកាតព្វកិច្ចយោធា មានមោទនភាព រំភើបខ្លាំង និងកោតសរសើរចំពោះទឹកចិត្តយុវជន និងប្រជាពលរដ្ឋដោយស្មារតីស្នេហាជាតិ ការពារជាតិ មាតុភូមិ។

នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិកាតព្វកិច្ចយោធា ធ្លាប់បានបញ្ជាក់ថា ប្រទេសជាតិ និងរាជរដ្ឋាភិបាល ត្រូវការកម្លាំងធនធានមនុស្សប្រកបដោយគុណភាព។ ការអនុវត្តកាតព្វកិច្ចយោធា និងផ្តល់នូវចំណេះដឹង វិន័យ ស្មារតីជួយគ្នា ការទទួលខុសត្រូវលើភារកិច្ចរបស់ខ្លួន ដែលអាចចូលរួមចំណែកក្នុងការបម្រើជាតិមាតុភូមិ។ ការចូលរួមហ្វឹកហាត់ នឹងធ្វើឱ្យយុវជនពង្រឹងកម្លាំងកាយ ចិត្តគំនិត វិន័យ ប្រកបដោយជំនាញ បទពិសោធន៍ អាចបង្កើនភាពជឿជាក់ មានទំនុកចិត្តកាន់តែប្រសើរ មានមូលដ្ឋានល្អសម្រាប់ការសិក្សា ការងារ និងជីវិត ក្រោយពេលបញ្ចប់ការអនុវត្តកាតព្វកិច្ចយោធានេះ៕ អត្ថបទ៖ វង្ស សុភាព