ឱកាសភ្ជុំបិណ្ឌ និងទិវាមនុស្សចាស់៖ កាកបាទក្រហមកម្ពុជា នាំយកអំណោយជួយដល់មណ្ឌលកុមារ និងចាស់ជរា

​ក្រោមគំនិតផ្តួចផ្តើម និងការគិតគូរដ៏ខ្ពង់ខ្ពស់បំផុតរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងឱកាសអបអរសាទរទិវាមនុស្សចាស់កម្ពុជា-អន្តរជាតិ ១តុលា និងបុណ្យភ្ជុំបិណ្ឌប្រពៃណីជាតិ នៅព្រឹកថ្ងៃទី០៩ ខែតុលា ឆ្នាំ២០២៦នេះ កាកបាទក្រហមកម្ពុជា បានចាត់តំណាងចុះសំណេះសំណាល សួរសុខទុក្ខ និងផ្តល់អំណោយមនុស្សធម៌ដល់ មណ្ឌលថែទាំកុមារ និងជនចាស់ជរាចំនួនពីរក្នុងរាជធានីភ្នំពេញ។

តបតាមការចាត់តាំងរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា, លោកជំទាវ ម៉ែន នារីសោភ័គ អគ្គលេខាធិការរងទី១ ព្រមទាំងមន្ត្រីប្រតិបត្តិ បានចុះសំណេះសំណាល សួរសុខទុក្ខ ព្រមទាំងផ្តល់អំណោយជាស្បៀង សម្ភារ ថវិកា និងអាហារ ជូនដល់ «អង្កការសង្គ្រោះជនអស់សង្ឃឹម» និង «មណ្ឌលមែកឈើ» ដែលស្ថិតក្នុងភូមិលិចវត្ត សង្កាត់កំបូល ខណ្ឌកំបូល រាជធានីភ្នំពេញ។

សម្រាប់ «អង្កការសង្គ្រោះជនអស់សង្ឃឹម» ដែលមានសមាជិករស់នៅសរុប ៣០០នាក់ (ក្នុងនោះមានកុមារ ២១៥នាក់, លោកគ្រូ-អ្នកគ្រូ ៥៥នាក់ និងលោកយាយចាស់ៗ ៣០នាក់) កាកបាទក្រហមកម្ពុជា បានផ្តល់ជូននូវអង្ករ ២តោន, មី ២០កេស, ត្រីខ ៥កេស, ទឹកស៊ីអ៊ីវ-ទឹកត្រី ២០យួរ, ប្រេងឆា ទឹកក្រូច ទឹកបរិសុទ្ធ, សាប៊ូ, ឃីតចំនួន ៥០កញ្ចប់, អាហារសម្រន់ និងថវិកាឧបត្ថម្ភមណ្ឌលចំនួន ៥លានរៀល។ បន្ថែមពីនេះ លោកយាយចាស់ៗទាំង ៣០នាក់ ក៏ទទួលបានថវិកាម្នាក់ៗ ៥ម៉ឺនរៀលផងដែរ។

ដោយឡែក សម្រាប់ «មណ្ឌលមែកឈើ» ទទួលបានទឹកបរិសុទ្ធ ៣០កេស, ទឹកផ្លែឈើ ២០កេស, ប្រេងឆា, សាប៊ូ, ផ្លែឈើ fresh ៤កេសធំ, អាហារមួយពេល និងថវិកាឧបត្ថម្ភមណ្ឌល ១០លានរៀល។ ក្នុងនោះ កុមារា-កុមារីចំនួន ១៧៤នាក់ ម្នាក់ៗទទួលបានថវិកា ៥ពាន់រៀល, លោកគ្រូ-អ្នកមើលថែ ២៧នាក់ ម្នាក់ៗទទួលបាន ៥ម៉ឺនរៀល ព្រមទាំងលោកយាយចាស់ៗរស់នៅក្បែរមណ្ឌលចំនួន ១៥នាក់ផ្សេងទៀត ក៏ទទួលបានអង្ករ មី ត្រីខ ឃីត និងថវិកា ៥ម៉ឺនរៀលក្នុងម្នាក់ៗដូចគ្នា។

មានប្រសាសន៍សំណេះសំណាលនាឱកាសនោះលោកជំទាវ ម៉ែន នារីសោភ័គ បានពាំនាំនូវប្រសាសន៍ផ្តាំផ្ញើសួរសុខទុក្ខ ដោយមនោសញ្ចេតនា ស្រឡាញ់អាណិត របស់សម្តេចកិត្តិព្រឹទ្ធបណ្ឌិត ចំពោះកុមារ ចាស់ជរា និងការកោតសរសើរដល់ស្ថាបនិកមណ្ឌល ដែលបានលះបង់កម្លាំងកាយចិត្តមើលថែ និងផ្តល់ការអប់រំដល់កុមាររហូតដល់ចប់មហាវិទ្យាល័យ។ ជាមួយគ្នានេះ លោកជំទាវអគ្គលេខាធិការរងទី១ ក៏បានផ្តាំផ្ញើឱ្យក្មួយៗ ចៅៗ និងសិស្ស-និស្សិតទាំងអស់ ត្រូវយកចិត្តទុកដាក់ថែទាំសុខភាព រក្សាអនាម័យ ចេះជួយអាសារគ្នា និងខិតខំសិក្សារៀនសូត្រដើម្បីអនាគតភ្លឺស្វាង។

ស្ថាបនិក/តំណាងមណ្ឌល ទាំងពីរ ថ្លែងអំណរគុណយ៉ាងជ្រាលជ្រៅចំពោះ កាកបាទក្រហមកម្ពុជា និងសម្តេចកិត្តិព្រឹទ្ធបណ្ឌិត ដែលតែងតែគិតគូរពីសុខទុក្ខ និងជីវភាពរស់នៅរបស់មណ្ឌល ជាពិសេសអំណោយទាំងនេះ បានជួយសម្រាលបន្ទុកអាហារ និងការស្លៀកពាក់របស់កុមារយ៉ាងខ្លាំង។

សូមបញ្ជាក់ថា នេះជាលើកទី២៧ ហើយ ដែលកាកបាទក្រហមកម្ពុជា បាននាំយកអំណោយមកផ្តល់ជូនអង្កការសង្គ្រោះជនអស់សង្ឃឹម និងជាលើកទី៤ សម្រាប់មណ្ឌលមែកឈើ។

គួររំលឹកផងដែរថា ក្នុងអំឡុងពេលបុណ្យភ្ជុំបិណ្ឌ និងទិវាមនុស្សចាស់នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែចាត់សហការី នាំយកទេយ្យវត្ថុ និងចតុបច្ច័យវេរប្រគេនព្រះសង្ឃនៅតាមវត្តអារាម ដូចជានៅវត្តក្រពើហា ខេត្តកណ្តាល និងវត្តស្នំប្រាំពីរ ខេត្តកំពត។ បន្ថែមលើនេះ សម្តេចក៏បានបន្តចាត់ក្រុមការងារចុះសំណេះសំណាល និងផ្តល់អំណោយមនុស្សធម៌ជូនដល់និវត្តជន, សិល្បករ-សិប្បករ ចំនួន ២៥១នាក់, សមាគមស្នាមញញឹមថ្មីនៃក្តីសង្ឃឹមរបស់កុមារ ព្រមទាំងចាត់មន្ត្រីចុះសួរសុខទុក្ខ វីរយុទ្ធជនដែលកំពុងសម្រាកព្យាបាលនៅតាមមន្ទីរពេទ្យផងដែរ ប្រកបដោយស្មារតីសប្បុរសធម៌ និងមនោសញ្ចេតនាយ៉ាងជ្រាលជ្រៅបំផុត៕ ​

អត្ថបទ៖ សំ ងីម