ឧត្ដមសេនីយ៍ឯក ឃឹង សារ៉ាត់ អញ្ជើញបើកវគ្គបណ្ដុះបណ្ដាលជំនាញស៊ើបអង្កេតបទល្មើសគ្រឿងញៀន និងច្បាប់ស្ដីពីការត្រួតពិនិត្យគ្រឿងញៀន

ភំ្នពេញ៖ ឯកឧត្ដមឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន តំណាងដ៏ខ្ពង់ខ្ពស់ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ បានអញ្ជើញជាអធិបតីពិធីបើកវគ្គបណ្ដុះបណ្ដាល បំប៉នជំនាញស៊ើបអង្កេតបទល្មើសគ្រឿងញៀន នីតិវិធី និងច្បាប់ស្ដីពីការត្រួតពិនិត្យគ្រឿងញៀន នៅអគ្គស្នងការដ្ឋាននគរបាលជាតិ។

ពិធីនេះបានធ្វើឡើងនៅព្រឹកថ្ងៃទី១២ ខែសីហា ឆ្នាំ២០២៤ មានការចូលរួមពីលោកឧត្តមសេនីយ៍ វរសេនីយ៍នាយករងមន្ទីរ លោកគ្រូបង្គោល លោកនាយការិយាល័យ និងសិក្ខាកាម​ចំណុះមន្ទីរ​ប្រឆាំងបទល្មើសគ្រឿងញៀនចំនួន៨៤រូប។

​ឯកឧត្ដម ឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន មានប្រសាសន៍ថា ដើម្បីចូលរួមអនុវត្តផែនការយុទ្ធនាការប្រយុទ្ធប្រឆាំងគ្រឿងញៀន ព្រមទាំងប្រសាសន៍ដឹកនាំដ៏ខ្ពង់ខ្ពស់របស់ឯកឧត្ដមអភិសណ្ដិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងបទបញ្ជាដ៏ខ្ពង់ខ្ពស់របស់ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ មន្ទីរប្រឆាំងបទល្មើសគ្រឿងញៀន បានចាត់តាំងលោកឧត្ដមសេនីយ៍ទោ អ៊ិន សុង នាយករងមន្ទីរប្រឆាំងបទល្មើសគ្រឿងញៀន ជាគ្រូបង្គោល ក្នុងបណ្ដុះបណ្ដាល​បំប៉ន​ជំនាញរយៈពេលខ្លី ​ស្ដីពីតួនាទីភារៈកិច្ចរបស់ប៉ុស្តិ៍នគរបាលរដ្ឋបាល ​ដល់មន្រ្តីប៉ុស្តិ៍នគរបាលរដ្ឋបាល តាមបណ្ដាស្នងការ រាជធានី-ខេត្ត ទូទាំងប្រទេស ដែលមកដល់ពេលនេះយើងចូលរួម​បណ្ដុះបណ្ដាលបានចំនួន ១២ខេត្តហើយនិងកំពុងបន្តរហូតគ្រប់ ២៥រាជធានី-ខេត្ត។ ចំពោះមន្ទីរប្រឆាំងបទល្មើសគ្រឿងញៀនក៏ធ្លាប់បានបើកវគ្គបំប៉នជំនាញ​ ចំនួន២លើករួចមកហើយ ដោយ​មានសិក្ខាកាមសរុប ចំនួន១២០នាក់ មកពីបណ្ដាការិយាល័យទាំង១១។

ឯកឧត្ដមឧត្ដមសេនីយ៍ឯក ​នាយកមន្ទីរប្រឆាំងបទល្មើសគ្រឿងញៀន ក៏បានផ្ដាំផ្ញើ​ដល់​សិក្ខាកាមចំនួន៤ចំណុចរួមមាន ៖ ១-សិក្ខាកាមសូមយកចិត្តទុកដាក់ស្ដាប់គ្រូបង្គោល និង​ដកស្រង់បទពិសោធន៍ពីពួកគាត់ ព្រោះពួកគាត់សុទ្ធតែជាបុគ្គលជំនាញ ​និងមានស្នាដៃក្នុងអង្គភាព

២-ត្រូវមកសិក្សាឲ្យបានទៀងទាត់ គោរពពេលវេលា បទញ្ជាផ្ទៃក្នុង ត្រូវមានវិន័យជាកងកម្លាំង

៣-ក្រោយបញ្ចប់វគ្គបំប៉ននេះ សិក្ខាកាមដែលបានបំពេញគ្រប់លក្ខខណ្ឌ និង​ទទួលបានវិញ្ញាបនបត្របញ្ជាក់ការសិក្សា

៤-សូមយកចំណេះដឹង ដែលទទួលបានពីវគ្គបំប៉នជំនាញនេះ ទៅបម្រើសង្គមជាតិ បម្រើអង្គភាព ជាពិសេសគឺត្រូវស្មោះត្រង់ជាមួយរាជរដ្ឋាភិបាលស្របច្បាប់ ​ដែលមាន​សម្ដេច​មហាបវរធិបតី ហ៊ុន ម៉ាណែត ​ជានាយករដ្ឋមន្ត្រី៕ អត្ថបទ៖ កុម្ភះ