ឱកាសការងារជាង ៥ពាន់កន្លែង ត្រៀមតាំងបង្ហាញក្នុងពិព័រណ៍ការងារ និងមគ្គទេសក៍អាជីព នៅផ្សារអ៊ីអន សែនសុខ

ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ គ្រោងនឹងរៀបចំពិព័រណ៍ការងារ និង​មគ្គទេសក៍​អាជីព អមដោយការបម្រើសេវាកាហ្វេរ៉ូបូត ចាប់ថ្ងៃទី១៦ ដល់ទី១៨ ខែសីហា ឆ្នាំ​២០២៤​ខាងមុខនេះ នៅផ្សារទំនើប អ៊ីអន សែនសុខ ជាមួយឱកាសការងារជាង ៥ពាន់កន្លែង។

យោងតាមក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១២ ខែសីហានេះ បានឲ្យដឹងថា ក្នុង​ឱកាសអបអរសាទរការបើកដំណើរការ សាខាបេឡាជាតិសន្តិសុខសង្គម និង​មជ្ឈ​មណ្ឌល​ការងារ ក្រសួងការងារ និងបណ្តុះបណ្តាលវិជ្ជាជីវៈ សហការជាមួយសហភាពសហព័ន្ធ​យុវជន​កម្ពុជា (ស.ស.យ.ក) រាជធានីភ្នំពេញ និងសមាគម​សហព័ន្ធ​សិស្សនិស្សិត​អប់រំ​បណ្តុះ​បណ្តាល​បច្ចេក​ទេស និងវិជ្ជាជីវៈ គាំទ្រដោយក្រុមហ៊ុន អ៊ីអន ម៉ល (ខេមបូឌា) ខូអិលធីឌី នឹងរៀបចំ​ពិព័រណ៍​ការងារ និងមគ្គទេសក៍អាជីព អមដោយការបម្រើសេវាកាហ្វេរ៉ូបូត (Robot Coffee) ជា​មួយ​ឱកាសការងារជាង ៥ពាន់កន្លែង សម្រាប់ឲ្យយុវជន និងអ្នកស្វែងរកការងារអាច ដាក់​ពាក្យ​ស្វែង​រក​ការងារដោយផ្ទាល់ និងធ្វើការសម្ភាសភ្លាមៗ។

ពិព័រណ៍ការងារនេះ នឹងនាំមកនូវក្រុមហ៊ុនធំៗចំនួន២០ ដែលនឹងផ្តល់​ឱកាស​ការងារ​ជា​ច្រើន​វិស័យ​ មានដូចជា៖ វិស័យធនាគារ គ្រឹះស្ថានមីក្រូហិញ្ញវត្ថុ និងធានារាប់រង វិស័យអចលនវត្ថុ វិស័យ​សណ្ឋាគារ និងបដិសណ្ឋារកិច្ច វិស័យបច្ចេកវិទ្យា និងទូរគមនាគមន៍ វិស័យ​លក់ដុំ និង​លក់រាយ វិស័យសេវាកម្មផ្សេងៗ និងវិស័យឧស្សាហកម្ម។

ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់បន្ថែមថា នៅក្នុងពិព័រណ៍ការងារ និង​មគ្គទេសក៍​អាជីពនាពេលខាងមុខនេះ យុវជន និងសាធារណជន ក៏អាចទទួល​បាន​ការ​ផ្តល់​សេវា​កាហ្វេ Robot Coffee ដ៏ភ្ញាក់ផ្អើល ដែលបង្កើតដោយស្នាដៃកូនខ្មែរ ព្រមទាំងអាច​ចុះ​ឈ្មោះ​ចូល​រៀន​ជំនាញវិជ្ជាជីវៈ និងបច្ចេកទេសណាមួយ ដែលជាកម្មវិធីអាទិភាពមួយរបស់សម្តេច ធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។ លើសពីនេះ យុវជន និងសាធារណជនទូទៅ ដែលមាន​គ្រប់​លក្ខ​ខណ្ឌអាចមកចុះឈ្មោះធ្វើប័ណ្ណ ប.ស.ស. នៅសាខា ប.ស.ស. នៅជាន់ទី២ និងអាច​ដាក់​ឯកសារទូទាត់សំណងអត្ថប្រយោជន៍របបសន្តិសុខសង្គមបាន នៅសាខា ប.ស.ស. ព្រម​ទាំង​អាច​ចូលរួមកំសាន្តជាមួយក្រុមតន្ត្រីនាពេលល្ងាច ជាមួយឱកាស​ទទួល​បាន​រង្វាន់​ជា​ច្រើន​ពី​ការ​ឆ្លើយ​សំណួរ​ងាយៗ ក្នុងព្រឹត្តិការណ៍នេះផងដែរ៕