អគ្គនាយករងក្រសួងរ៉ែ និងថាមពល ដែលផ្ទុះអាវុធបណ្ដាលឱ្យរងរបួសកូនប្រុស ត្រូវបានតំណាងអយ្យការចោទប្រកាន់២បទល្មើស

ភ្នំពេញ៖ ករណីឈ្មោះ ម៉ក់ សុភ័ក្ត្រា អគ្គនាយករងនៃក្រសួងរ៉ែ និងថាមពល និងកូនប្រុសបានបើករថយន្តដេញបុករថយន្តមួយគ្រឿងទៀត ហើយផ្ទុះអាវុធបណ្ដាលឱ្យរងរបួសកូនប្រុសខ្លួនឯង ត្រូវបានតំណាងអយ្យការសម្រេចចោទប្រកាន់ចំនួន២បទល្មើស។ នេះបើតាមការបញ្ជាក់របស់លោក ឆាយ ហុង ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានប្រាប់នៅព្រឹកថ្ងៃទី២០ ខែតុលា ឆ្នាំ២០២៦។

អ្នកនាំពាក្យអយ្យការអមសាលាដំបូងរាជធានីភ្នំពេញបានឱ្យដឹងថា ករណីនេះត្រូវបានតំណាងអយ្យការសម្រេចចោទប្រកាន់លើជនសង្ស័យពីបទ ហិង្សាដោយចេតនាមានស្ថានទម្ងន់ទោស និងប្រើប្រាស់អាវុធដោយគ្មានការអនុញ្ញាត តាមមាត្រា ២១៨ នៃក្រមព្រហ្មទណ្ឌ និងមាត្រា២០ នៃច្បាប់ស្តីពីការគ្រប់គ្រងអាវុធជាតិផ្ទុះនិងគ្រាប់រំសេវ។

សូមរំលឹកថា កាលពីថ្ងៃទី១៤ ខែតុលា ឆ្នាំ២០២៦ វេលាម៉ោង២០ និង២០នាទីយប់ នៅចំណុចវាលស្រែ ភូមិជ្រេស សង្កាត់គោករកា ខណ្ឌព្រែកព្នៅ រាជធានីភ្នំពេញ ឈ្មោះ ម៉ក់ សុភ័ក្ត្រា អគ្គនាយករងនៃក្រសួងរ៉ែ និងថាមពល និងកូនប្រុសបានបើករថយន្តដេញបុករថយន្តមួយគ្រឿងទៀត ហើយឈ្មោះ ម៉ក់ សុភ័ក្ត្រា បានដកកាំភ្លើងបាញ់បណ្ដាលឱ្យត្រូវចំកូនប្រុសខ្លួនឯង ភ្លាមៗជនរងគ្រោះត្រូវបានបញ្ជូនទៅមន្ទីរពេទ្យ។ ដោយឡែកជន បង្ក និង វត្ថុ តាង ត្រូវបានសមត្ថកិច្ចនាំ យកទៅអធិការដ្ឋាន នគរបាល ខណ្ឌ ព្រែកព្នៅ និងបន្តកសាងសំណុំរឿងបញ្ជូនទៅកាន់ស្ថាប័នអយ្យការអមសាលាដំបូងរាជធានីភ្នំពេញ ដើម្បីសម្រេចចោទប្រកាន់តាមផ្លូវច្បាប់៕អត្ថបទ៖ តារាវុទ្ធី