ប្រធានគណៈកម្មការទី៨នៃរដ្ឋសភា ជំរុញឱ្យបង្កើនបេក្ខភាពស្ត្រីក្នុង ការបោះឆ្នោតជ្រើសរើស ក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ ខណៈស្ត្រីដែលមានឈ្មោះ ក្នុងលំដាប់លេខរៀងទី១មានត្រឹមតែ១២%

ភ្នំពេញ៖ លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា បានជំរុញ ឱ្យបង្កើនបេក្ខភាពស្ត្រីក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ ២០២៧នាពេលខាងមុខ ដោយសារចំនួនបេក្ខភាពស្ត្រីនៅមានកម្រិត។

លោកជំទាវប្រធានគណៈកម្មការទី៨ បានលើកឡើងដូច្នេះ​នៅក្នុងពិធីបើក​សិក្ខាសាលា​ពិគ្រោះ​យោបល់ ស្តីពី «ការពន្លឿនអភិបាលកិច្ចមូលដ្ឋានប្រកបដោយបរិយាបន្ន តាមរយៈការបង្កើន​បេក្ខភាពស្ត្រីសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧» ដែលរៀបចំឡើងដោយក្រុមស្ត្រីដើម្បីទាំងអស់គ្នា(W4ALL)ដោយមានការចូលរួមពីតំណាងគណបក្សនយោបាយ ក្រសួងស្ថាប័នពាក់ព័ន្ធនិងអង្គការសង្គមស៊ីវិលកាលពីព្រឹកថ្ងៃទី២២ ខែតុលា ឆ្នាំ២០២៦ នៅសណ្ឋាគារកាំបូឌីយ៉ាណា ។

ក្នុងឱកាសនោះ លោកជំទាវ ឡោក ខេង បានគូសបញ្ជាក់ថា «អភិបាលកិច្ច​មូលដ្ឋាន​គឺជា​មូលដ្ឋាន​គ្រឹះដ៏សំខាន់នៃលទ្ធិប្រជាធិបតេយ្យ និងការអភិវឌ្ឍប្រកបដោយចីរភាព។ ឃុំ សង្កាត់ ជារដ្ឋបាលដែលនៅជិតស្និទ្ធបំផុតជាមួយប្រជាពលរដ្ឋ ដូច្នេះការចូលរួម​របស់ស្ត្រីក្នុង​តួនាទីជា​អ្នកដឹកនាំមូលដ្ឋាន មានសារៈសំខាន់ក្នុងការឆ្លើយតបនឹងតម្រូវការ និងបញ្ហា​ប្រឈមជាក់​ស្តែង​របស់សហគមន៍ ព្រមទាំងជំរុញការអភិវឌ្ឍប្រកបដោយបរិយាបន្ន»។

លោកជំទាវ បានបន្តលើកឡើងថា ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិ​ទី៥ ​ឆ្នាំ២០២២ បេក្ខភាពស្ត្រីមានចំនួន ៣២,៣% ប៉ុន្តែស្ត្រីដែលមានឈ្មោះ​ក្នុង​លំដាប់លេខ​រៀង​ទី១ មានត្រឹមតែ ១២% ប៉ុណ្ណោះ។ បច្ចុប្បន្ន ស្ត្រីមានចំនួន ២២% ក្នុងចំណោមសមាជិកក្រុម​ប្រឹក្សាឃុំ សង្កាត់ និងមានត្រឹម ១២,៦% ជាមេឃុំ ចៅសង្កាត់។ តួលេខនេះបង្ហាញថា ការចូលរួម​របស់ស្ត្រីក្នុងតួនាទីធ្វើសេចក្តីសម្រេចនៅមូលដ្ឋាននៅមានកម្រិតនៅឡើយ បើប្រៀបធៀប​នឹង​គោល​ដៅសមភាពតំណាងស្ត្រីយ៉ាងតិច ៥០% ដែលមានចែងក្នុងអនុសាសន៍ទូទៅលេខ៤០ របស់គណៈកម្មាធិការ CEDAW។

ដើម្បីលើកកម្ពស់ការចូលរួមរបស់ស្ត្រីក្នុងភាពជាអ្នកដឹកនាំមូលដ្ឋាន លោកជំទាវបានផ្តល់​អនុសាសន៍សំខាន់ៗចំនួន៣ រួមមាន៖១. ចំពោះគណបក្សនយោបាយ៖ ត្រូវបង្កើនឱកាសនិងផ្តល់ការគាំទ្រដល់បេក្ខភាពស្ត្រី ព្រម​ទាំង​​បង្កើត ឱកាសឱ្យស្ត្រីដែលមានសមត្ថភាពទទួលបានការបណ្តុះបណ្តាល ការណែនាំ និងបទ​ពិសោធក្នុងកិច្ចការសាធារណៈ។ ជាពិសេស ត្រូវលើកទឹកចិត្តឱ្យដាក់បេក្ខភាពស្ត្រីក្នុង​លំដាប់​លេខរៀងដែលមានឱកាសទទួលបានការបោះឆ្នោតគាំទ្រ។

២. ចំពោះស្ត្រីខ្លួនឯង៖ ត្រូវបន្តពង្រឹងចំណេះដឹង ជំនាញ និងសមត្ថភាពជាអ្នកដឹកនាំ ទាំងជំនាញបច្ចេកទេស និងជំនាញទន់ ដូចជា ការនិយាយជាសាធារណៈ ការចរចា ការ​សម្របសម្រួល ការដោះស្រាយជម្លោះ និងការសម្រេចចិត្តដោយផ្អែកលើភស្តុតាង។

៣. ចំពោះគ្រួសារ និងសហគមន៍៖ ត្រូវចូលរួមគាំទ្រ និងលើកទឹកចិត្តស្ត្រី​ឱ្យហ៊ាន​ចូលរួម​ក្នុង​កិច្ចការសាធារណៈ ដោយបុរសត្រូវដើរតួនាទីជាដៃគូក្នុងការលើកកម្ពស់សមភាពយេនឌ័រ និងចែករំលែកបន្ទុកការងារក្នុងគ្រួសារ។ ជាមួយគ្នានេះ សហគមន៍ត្រូវវាយតម្លៃ​បេក្ខភាព​ស្ត្រី​ដោយផ្អែកលើសមត្ថភាព ការទទួលខុសត្រូវ និងការប្តេជ្ញាចិត្តបម្រើប្រជាពលរដ្ឋ។

លោកជំទាវបានសង្កត់ធ្ងន់ថា ការបង្កើនការចូលរួមរបស់ស្ត្រីក្នុងភាពជាអ្នកដឹកនាំ មិនមែន​ជាភារកិច្ចរបស់ស្ត្រីតែម្នាក់ឯងនោះទេ ប៉ុន្តែត្រូវការការប្តេជ្ញាចិត្ត និងកិច្ចសហការពីគ្រប់ភាគី រួមមាន ស្ថាប័នរដ្ឋ គណបក្សនយោបាយ អាជ្ញាធរមូលដ្ឋាន ដៃគូអភិវឌ្ឍន៍ អង្គការសង្គមស៊ីវិល សហគមន៍ និងក្រុមគ្រួសារ។

ជាមួយគ្នានេះ លោកជំទាវបានរំលឹកប្រសាសន៍របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានលើកឡើងថា៖ «ពិភពលោកនឹង​កាន់តែ​មានសុវត្ថិភាព ស្រស់បំព្រង និងកក់ក្តៅជាងមុន ប្រសិនបើមានស្ត្រីក្លាយ​ជាអ្នកដឹកនាំ​កាន់តែ​ច្រើន»។

ជាទីបញ្ចប់ លោកជំទាវ ឡោក ខេង សង្ឃឹមថា សិក្ខាសាលានេះនឹងផ្តល់នូវធាតុចូល និងអនុ​សាសន៍មានតម្លៃ ដើម្បីបង្កើតផែនការសកម្មភាពជាក់ស្តែង ក្នុងការពង្រឹងសមត្ថភាព និងជំរុញ​ឱ្យស្ត្រីកម្ពុជាកាន់តែច្រើនចូលរួមឈរឈ្មោះបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិ​ទី​៦ ឆ្នាំ២០២៧ ប្រកបដោយទំនុកចិត្ត និងជោគជ័យ ព្រមទាំងរួមចំណែកលើកកម្ពស់​អភិបាល​កិច្ចមូលដ្ឋានប្រកបដោយបរិយាបន្ននិងសមភាពយេនឌ័រ ៕