អ្នកនាំពាក្យ៖ ជំនន់ទឹកភ្លៀងនៅតំបន់ខ្លះក្នុងរាជធានីភ្នំពេញ ប៉ុន្មានថ្ងៃនេះ មិនធ្ងន់ធ្ងរនោះទេ ទោះជាយ៉ាងណាអាជ្ញាធរ និងមន្ទីរជំនាញបានខិតខំដោះស្រាយបន្តបន្ទាប់

ភ្នំពេញ៖ ការជន់លិចដោយជំនន់ទឹកភ្លៀងនៅតំបន់ខ្លះក្នុងរាជធានីភ្នំពេញប៉ុន្មានថ្ងៃនេះ មិនធ្ងន់ធ្ងរនោះទេ ដោយសារចុងរដូវវស្សាអាចនៅមានស្ថានភាពភ្លៀងជាប់ៗគ្នាជាច្រើន និងបន្តបន្ទាប់ ទោះបីជាយ៉ាងណាអាជ្ញាធររាជធានី មន្ទីរជំនាញ និងអាជ្ញាធរខណ្ឌបានខិតខំដោះស្រាយបន្តបន្ទាប់។

នេះគឺជាការបញ្ជាក់របស់លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ នារសៀលថ្ងៃទី២៣ ខែតុលា ឆ្នាំ២០២៦។

អ្នកនាំពាក្យរដ្ឋបាលរាជធានីភ្នំពេញបានបញ្ជាក់ថា ក្រោមការដឹកនាំរបស់ឯកឧត្ដម ឃួង ស្រេង អភិបាលរាជធានីភ្នំពេញការងារស្តារប្រឡាយ ស្ដារប្រព័ន្ធលូ និងការស្ថាបនាស្ថានីយ៍បូមទឹកថ្មីត្រូវបានរដ្ឋបាលរាជធានីភ្នំពេញ អាជ្ញាធរខណ្ឌ និងមន្ទីរជំនាញសម្រុកធ្វើយុទ្ធនាការស្ដារតាំងពីរដូវប្រាំងមកម៉្លេះ ហើយស្ដារបានជាច្រើនខ្សែ និងជាបន្តបន្ទាប់ហើយ ដោយមានទាំងគម្រោងហិរញ្ញប្បទានរបស់រាជរដ្ឋាភិបាលតាមរយៈក្រសួងពាក់ព័ន្ធផងដែរ។ ជាលទ្ធផលនៃការអនុវត្តគម្រោងទាំងនោះ ឃើញថា ស្ថានភាពនៃការជន់លិចក៏មិនមានរយៈពេលយូរថ្ងៃដូចឆ្នាំកន្លងមកដែរ។

លោកស្រីបន្តថា ជាក់ស្ដែងដោយមានការណែនាំពីឯកឧត្ដម ឃួង ស្រេង អភិបាលរាជធានីភ្នំពេញ លោក ឯក ឃុនដឿន អភិបាលរងរាជធានីភ្នំពេញ និងលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញនៅព្រឹកថ្ងៃទី២៣ ខែតុលា ឆ្នាំ២០២៦ បានដឹកនាំក្រុមការងារចុះពិនិត្យ និងបើកទ្វារទឹកប្រឡាយអមផ្លូវដែក ដើម្បីរំដោះជំនន់ទឹកភ្លៀងដែលលិចផ្លូវជាតិលេខ៤ ក្នុងភូមិសាស្ត្រខណ្ឌកំបូល។ បន្ថែមពីនេះកាលពីម្សិលម៉ិញ ថ្ងៃទី២២ តុលា លោក ឯក ឃុនដឿន ក៏បានចុះពិនិត្យស្ថានភាពទឹកជន់លិចនៅម្តុំវត្តសំរោងអណ្តែត ស្ថិតក្នុងខណ្ឌសែនសុខ រួមជាមួយលោក ចេង មុនីរ៉ា អភិបាលនៃគណៈអភិបាលខណ្ឌសែនសុខ ដើម្បីធ្វើយ៉ាងណារកមធ្យោបាយ ដើម្បីរំដោះជំនន់ទឹកភ្លៀងកុំឱ្យលិចលង់លំនៅដ្ឋានប្រជាពលរដ្ឋ។

លោកស្រីអ្នកនាំពាល្យបានអំពាវនាវឱ្យមានការសហការពីបងប្អូនប្រជាពលរដ្ឋនៅតាមមូលដ្ឋាន ដោយជួយទុកដាក់វិចខ្ចប់សំរាមឱ្យបានត្រឹមត្រូវ ពិសេសកុំនាំគ្នាបោះចូលក្នុងប្រឡាយ ឬលូបង្ករឱ្យស្ទះចរន្ធទឹកហូរ៕អត្ថបទ ៖ ប្រាក់ វ៉ាន់ដា