ក្រសួងការងារគ្រោងដាក់ឲ្យដំណើរការមជ្ឈមណ្ឌលការងារថ្មីក្នុងផ្សារអ៊ីអន២នៅថ្ងៃសុក្រនេះ

ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១៦ ខែសីហាខាងមុខនេះ នឹង​សម្ពោធ​ដាក់​ឲ្យ​ដំណើរ​ការ​ជាផ្លូវការមជ្ឈមណ្ឌលការងារថ្មីរបស់ខ្លួន ដែលមានទីតាំងស្ថិតនៅផ្សារទំនើបអ៊ីអន ម៉ល សែន​សុខ (អ៊ីអន២) ដើម្បីផ្តល់ភាពកាន់តែងាយស្រួល ក្នុងផ្តល់សេវាការងារ និង​ព័ត៌មាន​ទីផ្សារ​ការងារ​ដល់ប្រជាពលរដ្ឋ។

មានប្រសាសន៍ប្រាប់ព័ត៌មាន ប៊ីធីវី នៅថ្ងៃទី១៣ សីហា ឆ្នាំ២០២៤នេះ ឯកឧត្តម កត្តា អ៊ន រដ្ឋ​លេខា​ធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានប្រាប់ឲ្យដឹងថា មជ្ឈ​មណ្ឌលការងារថ្មីមួយនេះ មានផ្តល់សេវាដូចជា៖ ចុះឈ្មោះស្វែងរកការងារ , ជ្រើស​រើស​បុគ្គលិក និង​ផ្សព្វផ្សាយដំណឹងជ្រើសរើសបុគ្គលិក , ប្រឹក្សាយោបល់អំពីការងារនិងអាជីព ក៏​ដូច​ជា​ផ្តល់​ព័ត៌​មានទីផ្សារការងារ។ ឯកឧត្តម បានបន្តថា ការបើកដំណើរការនៅផ្សារទំនើបនេះដែរ ​គឺ​ជា​ការ​សម្រួលដល់ប្រជាពលរដ្ឋ ជាពិសេសយុវជន សិស្ស ដែលមានបំណងស្វែងរកការងារ ហើយ​ធ្វើ​ដំណើរ​ទៅ​ទីនោះដែលជាទីប្រជុំជន មានភាពងាយស្រួលក្នុង​ការ​ទំនាក់​ទំនង​ជា​មន្រ្តី​ទីភ្នាក់​ងារ​ជាតិ​មុខរបរ និងការងារ (NEA) ដើម្បីផ្គូរផ្គងស្វែងរកការងារជូនប្រជាពលរដ្ឋ។

ពាក់ព័ន្ធមជ្ឈមណ្ឌលការងារថ្មីរបស់ក្រសួងការងារ និងបណ្តុះបណ្តាលវិជ្ជាជីវៈនេះ យុវជន សិស្ស និស្សិត អ្នកស្វែងរកការងារធ្វើ និងសាធារណជនទូទៅ គឺអាចមកទទួលសេវាការងារ និង​ព័ត៌មាន​ទីផ្សារ​ការងារ ដែលមានមន្ត្រី NEA នៅរង់ចាំទទួលស្វាគមន៍ ចាប់ពីម៉ោង៩ និង៣០នាទីព្រឹក ដល់​ម៉ោង ៩យប់។

សូមជម្រាបជូនទៀតថា នៅថ្ងៃដាក់ឲ្យដំណើរការមជ្ឈមណ្ឌលខាងលើនេះ ក្រសួងការងារ និង​បណ្តុះ​បណ្តាល​វិជ្ជាជីវៈ សហការជាមួយសហភាពសហព័ន្ធយុវជនកម្ពុជា (ស.ស.យ.ក) រាជ​ធានី​ភ្នំពេញ និងសមាគមសហព័ន្ធសិស្សនិស្សិតអប់រំបណ្តុះបណ្តាលបច្ចេកទេស និងវិជ្ជាជីវៈ គាំទ្រ​ដោយ​ក្រុមហ៊ុន អ៊ីអន ម៉ល (ខេមបូឌា) ខូ អិលធីឌី នឹងរៀបចំពិព័រណ៍ការងារ និង​មគ្គទេសក៍អាជីព អមដោយការបម្រើសេវាកាហ្វេរ៉ូបូត (Robot Coffee) រយៈពេល ៣ថ្ងៃ ចាប់​ពី​ថ្ងៃ​ទី​១៦ ដល់១៨ ខែសីហា ឆ្នាំ២០២៤ ជាមួយឱកាសការងារជាង ៥ពាន់កន្លែង សម្រាប់​ឲ្យ​យុវជ​ន និងអ្នកស្វែងរកការងារអាច ដាក់ពាក្យស្វែងរកការងារដោយផ្ទាល់ និង​ធ្វើ​ការ​សម្ភាស​ភ្លាមៗ​៕ អត្ថបទ ឈិត បូរ៉ាវី