ប្រជាពលរដ្ឋ ៧១៨គ្រួសារ នៅភូមិតាកឹងបៃតង ទទួលបានអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត!

នារសៀលថ្ងៃទី២៧ ខែតុលា ឆ្នាំ២០២៦នេះ ឯកឧត្តម នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាអ្នកទទួលបន្ទុកដឹកនាំការងារការពារសន្តិសុខ សណ្ដាប់ធ្នាប់ និងទប់ស្កាត់បទល្មើសនៅតាមតំបន់ព្រំដែន រួមដំណើរដោយឯកឧត្តម គីម រិទ្ធី អភិបាលខេត្តព្រះវិហារ បានអញ្ជើញចុះសួរសុខទុក្ខ និងនាំយកថវិកា ជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ទៅប្រគល់ជូនដោយផ្ទាល់ដៃដល់បងប្អូនជនភៀសសឹក និងគ្រួសារអតីតយុទ្ធជន ចំនួន ៧១៨គ្រួសារ ដែលកំពុងរស់នៅភូមិតាកឹងបៃតង ឃុំថ្មី ស្រុកគូលែន ខេត្តព្រះវិហារ។

នាឱកាសនោះ ឯកឧត្តម គីម រិទ្ធី អភិបាលខេត្តព្រះវិហារ បានសម្តែងនូវការគោរពដឹងគុណយ៉ាងជ្រាលជ្រៅបំផុតជូនចំពោះ សម្តេចមហាបវរធិបតី ហ៊ុន ម៉ាណែត ដែលជានិច្ចកាលតែងតែយកចិត្តទុកដាក់ ដោះស្រាយ និងគិតគូរខ្ពស់ពីសុខទុក្ខ និងជីវភាពរស់នៅរបស់ប្រជាពលរដ្ឋភៀសសឹក។

ជាមួយគ្នានេះ ឯកឧត្តមអភិបាលខេត្ត ក៏បានថ្លែងអំណរគុណចំពោះ ឯកឧត្តម នាយឧត្តមសេនីយ៍ ខេង សុមេធ ដែលបានចំណាយពេលវេលាដ៏មានតម្លៃនាំយកនូវអំណោយដ៏ឧត្តុង្គឧត្តម មកប្រគល់ជូនដល់មូលដ្ឋានដោយផ្ទាល់។

បន្ថែមពីលើនេះ ឯកឧត្តមអភិបាលខេត្ត បានជម្រាបជូនដំណឹងដ៏រីករាយអំពីការដាក់ឱ្យប្រើប្រាស់បណ្តាញទឹកស្អាតដោយឥតគិតថ្លៃ ដែលជាការឧបត្ថម្ភដ៏ថ្លៃថ្លារបស់ សម្តេចធិបតី ហ៊ុន ម៉ាណែត ដោយក្នុងមួយខ្នងផ្ទះទទួលបានការប្រើប្រាស់ទឹកស្អាតដោយមិនបង់ប្រាក់ចំនួន ៨ម៉ែត្រគូបក្នុងមួយខែ ដើម្បីជួយសម្រាលបន្ទុកជីវភាពប្រចាំថ្ងៃរបស់បងប្អូន។

មានប្រសាសន៍សំណេះសំណាល ឯកឧត្តម នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ បានពាំនាំនូវប្រសាសន៍ផ្តាំផ្ញើសួរសុខទុក្ខ និងក្តីនឹករលឹក ប្រកបដោយមនោសញ្ចេតនាដ៏ជ្រាលជ្រៅ និងការគិតគូរជាប្រចាំពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ជូនចំពោះបងប្អូនជនភៀសសឹក និងគ្រួសារអតីតយុទ្ធជនទាំងអស់។

ឯកឧត្តមបានសម្តែងនូវការសោកស្តាយ និងយល់ចិត្តយ៉ាងជ្រាលជ្រៅចំពោះការលំបាកនានាដែលបងប្អូនបានឆ្លងកាត់ និងបានលើកទឹកចិត្តឱ្យបងប្អូនបន្តរក្សាស្មារតីរឹងមាំ មានភាពអត់ធ្មត់ និងជឿជាក់យ៉ាងមុតមាំលើការដឹកនាំរបស់រាជរដ្ឋាភិបាលកម្ពុជា ខណៈដែលរាជរដ្ឋាភិបាល ក៏ដូចជារដ្ឋបាលខេត្ត និងកងកម្លាំងសមត្ថកិច្ចគ្រប់លំដាប់ថ្នាក់ ប្តេជ្ញាបន្តខិតខំដោះស្រាយបញ្ហាប្រឈម អភិវឌ្ឍហេដ្ឋារចនាសម្ព័ន្ធ និងផ្តល់ការគាំពារចាំបាច់គ្រប់បែបយ៉ាង ដើម្បីធានាឱ្យបងប្អូនមានស្ថិរភាពជីវភាព និងភាពកក់ក្តៅ។