ACUរកឃើញឯកសារមិនប្រក្រតីចំនួន១១ករណីក្នុងដំណាក់កាលដាក់ពាក្យប្រឡងជ្រើសរើសមេធាវីជំនាន់ទី២១

អង្គភាពប្រឆាំងអំពើពុករលួយ (ACU) បានរកឃើញឯកសារមិនប្រក្រតីចំនួន១១ ក្នុងដំណាក់កាលដាក់ពាក្យប្រឡងជ្រើសរើសមេធាវីជំនាន់ទី២១។នេះបើតាមរបាយការណ៍របស់អង្គភាពប្រឆាំងអំពើពុករលួយបង្ហាញនៅក្នុងកិច្ចប្រជុំក្រុមប្រឹក្សាជាតិប្រឆាំងអំពើពុករលួយប្រចាំខែតុលា ឆ្នាំ២០២៦។

កិច្ចប្រជុំក្រុមប្រឹក្សាជាតិប្រឆាំងអំពើពុករលួយ លើកទី១៥ អាណត្តិទី៤ បានដំណើរការនៅរសៀលថ្ងៃទី២៨ ខែតុលា ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់សម្តេចកិត្តិសង្គហបណ្ឌិត ម៉ែន សំអន ប្រធានក្រុមប្រឹក្សាជាតិប្រឆាំងអំពើពុករលួយ។ កិច្ចប្រជុំនេះ រៀបចំនៅអង្គភាពប្រឆាំងអំពើពុករលួយ រាជធានីភ្នំពេញ។

នៅក្នុងកិច្ចប្រជុំ ឯកឧត្តមកិត្តិនីតិកោសលបណ្ឌិត ទេសរដ្ឋមន្រ្តី ឱម យ៉ិនទៀង ប្រធានអង្គភាពប្រចាំអំពើពុករលួយ បានបង្ហាញរបាយការណ៍ថា ការចូលរួមសង្កេតការណ៍ចាប់ពីដំណាក់កាលដាក់ពាក្យប្រឡងជ្រើសរើសមេធាវីជំនាន់ទី២១ ដែលតាមឯកឧត្តម កែវ ធីវុធ ឧបការីអង្គភាពប្រឆាំងអំពើពុករលួយ ឱ្យដឹងថា មានបេក្ខជនបានដាក់ពាក្យចំនួន ៧៣៦ នាក់លើចំនួនពាក្យដែលបានលក់ចំនួន ៨១៦ ច្បាប់ ក្នុងនោះក្រុមស៊ើបអង្កេតពិសេស ដឹកនាំដោយលោកជំទាវ អ៊ូ ស៊ីថា ឧបការីអង្គភាពប្រឆាំងអំពើពុករលួយ បានរកឃើញឯកសារមិនប្រក្រតីចំនួន ១១ ករណី សរុបជាលទ្ធផលមានដូចជា៖ បេក្ខជនដាក់ពាក្យ ៥ រូប ប្រើឯកសារក្លែង កំពុងស្ថិតក្នុងនីតិវិធីកសាងសំណុំរឿងបញ្ជូនទៅតុលាការ), បេក្ខជន ១ រូប មានសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០០៩ ហើយកែឈ្មោះ កែឆ្នាំកំណើតដោយខ្លួនឯង ហើយដល់ឆ្នាំ២០១៩ ទើបដាក់ពាក្យទៅតុលាការសុំកែឈ្មោះ ខែឆ្នាំកំណើត, សញ្ញាបត្របាក់ឌុបបេក្ខជន ២ រូប គ្មានឯកសារគល់បញ្ជីនៅក្រសួងអប់រំ យុវជន និងកីឡា តែអង្គភាពប្រឆាំងអំពើពុករលួយបានស្រាវជ្រាវដល់ខេត្ត រកឃើញបេក្ខជន ២ រូបនោះ ពិតជាបានប្រឡងជាប់បាក់ឌុបមែន, បេក្ខជន ១ រូប មិនព្រមចូលមកបំភ្លឺនៅអង្គភាពប្រឆាំងអំពើពុករលួយតាមការកោះហៅ ហើយអង្គភាពប្រឆាំងអំពើពុករលួយនឹងនាំខ្លួនមកស្តាប់ចម្លើយ) និងសញ្ញាបត្របាក់ឌុបបេក្ខជន ១ រូប កំពុងបន្តស្រាវជ្រាវ។ ក្រៅពីនេះ អង្គភាពប្រឆាំងអំពើពុករលួយ បានដំណើរការពិនិត្យ វិភាគ និងធ្វើការសម្រេច លើពាក្យប្ដឹងដែលមានក្នុងខែតុលានេះ សរុបចំនួន ៤០ ពាក្យប្ដឹង និងបានបញ្ជូនសំណុំរឿង ១ ករណីទៅសាលាដំបូងរាជធានីភ្នំពេញ។

គួរបញ្ជាក់ដែរថា អង្គភាពប្រឆាំងអំពើពុករលួយមានបេសកកម្មដឹកនាំការប្រយុទ្ធប្រឆាំងនឹងអំពើពុករលួយគ្រប់រូបភាព គ្រប់វិស័យ និងគ្រប់ជាន់ថ្នាក់នៅទូទាំងព្រះរាជាណាចក្រកម្ពុជា តាមរយៈការចាត់វិ​​ធាន​​ការអប់រំ បង្ការ ទប់ស្កាត់ និងអនុវត្តច្បាប់បង្រ្កាបបទល្មើសពុករលួយ ដោយមានការចូលរួមពីសាធារណៈជន និង ប្រតិបត្តិការ។ អត្ថបទ៖ ទូច សោភ័ណ