សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បានផ្ដល់ផ្ទះថ្មី ជូនក្រុមគ្រួសារ​អតីត​យុទ្ធជន​សោធននិវត្តន៍ មានជីវភាពលំបាកខ្វះខាត ដែលរងគ្រោះដោយអគ្គិភ័យឆាបឆេះផ្ទះអស់គ្មានសល់ នៅឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ

ខេត្តកំពង់ធំ៖ នៅព្រឹកថ្ងៃទី២ ខែវិច្ឆិកា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករង អនុប្រធានប្រចាំការ និងជាប្រធានលេខាធិការដ្ឋាន តំណាងឯកឧត្ដម នួន ផារ័ត្ន អភិបាលខេត្ត ប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ អមដំណើរដោយលោក ជួន សិលាវិត ប្រធានសាខាមូលនិធិជាតិជំនួយសង្គមខេត្ត អនុប្រធានសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ និងលោក អ៊ុត វណ្ណរ៉ា អភិបាលស្រុក និងជាប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជា ស្រុកកំពង់ស្វាយ បានដឹកនាំសហការី ទៅប្រគល់ផ្ទះថ្មីមួយខ្នង ដែលជាខ្នងទី ៧៨ ក្នុងស្រុកកំពង់ស្វាយ អំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ប្រធានសមាគមអតីតយុទ្ធជន និងនិវត្តជនកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនអតីតយុទ្ធជនពិការ ដែលត្រូវបានរងគ្រោះដោយអគ្គិភ័យឆាបឆេះផ្ទះអស់គ្មានសល់ ស្ថិតនៅភូមិពាមគ្រែង ឃុំក្ដីដូង ស្រុកកំពង់ស្វាយ ខេត្តកំពង់ធំ ។

លោក សុទ្ធ ហ៊ន បានបញ្ជាក់ថា៖ លោកមានអាយុ ៦៦ឆ្នាំមានឋានន្តរសក្ដិ ព្រឹន្ទបាលទោ បានចូលបម្រើការក្នុងជួរកងទ័ពនៅឆ្នាំ ១៩៨៧ នៅអង្គភាព វរសេនាតូចលេខ៥៥ ចាស់ យោធាខេត្តកំពង់ធំ ហើយបានត្រូវរបួសខ្លួន នៅក្នុងសមរភូមិស្រុកស្ទោង នៅឆ្នាំ ១៩៩២ ។ លោកមានភរិយាឈ្មោះ សុខ សឿន អាយុ ៧១ ឆ្នាំ ។ លោក សុទ្ធ ហ៊ន បានបញ្ជាក់បន្ថែមទៀតថា ផ្ទះរបស់គាត់ ត្រូវបានអគ្គិភ័យឆាបឆេះអស់គ្មានសល់ នៅវេលាម៉ោង ១៤:៣០នាទីរសៀល ថ្ងៃទី២៥ ខែតុលា ឆ្នាំ២០២៦ ដោយសារឆ្លងចរន្តអគ្គិសនី។ បច្ចុប្បន្នគាត់មានសមាជិកគ្រួសារចំនួន ៨ នាក់ ហើយមានជីវភាពលំបាកខ្វះខាត ។

ឧត្តមសេនីយ៍ទោ សោម ស៊ុន បានបញ្ជាក់ថា៖ ផ្ទះថ្មី ដែលទើបសាងសង់រួចនេះ មានទំហំ ៥ម៉ែត្រ គុណនិង ៧ម៉ែត្រ សាងសង់ពីសសរបេតុង ឆ្អឹងដែក ដំបូលប្រក់ស័ង្កសីកិនភ្លី ជញ្ជាំងស្មាតប៊ត រនាបក្រាលក្តារ ដោយមានតសំយ៉ាបផ្ទះបាយទៅក្រោយប្រវែង ៣ម៉ែត្រ ព្រមទាំងមានបង្គន់អនាម័យសម្រាប់ប្រើប្រាស់ផងដែរ ។ ហើយកន្លងទៅនេះ នៅស្រុកកំពង់ស្វាយ ខេត្តកំពង់ធំ បានសាងសង់ផ្ទះចំនួន ៧៨ខ្នង ជូនក្រុមគ្រួសារអតីតយុទ្ធជនរួចមកហើយ ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា និងសម្ដេចមហាបវរធិបតី ហ៊ុន ម៉ាណែត តាមរយៈឯកឧត្តមទេសរដ្ឋមន្ត្រី នាយឧត្តម សេនីយ៍កិត្តិសង្គហបណ្ឌិត គន់ គីម អនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា ។ ជាមួយននេះដែរ ឧត្តមសេនីយ៍ទោ សោម ស៊ុន បានណែនាំដល់ប្រជាពលរដ្ឋទាំងអស់ ត្រូវតែប្រុងប្រយ័ត្នខ្ពស់ ដើម្បីការពារអគ្គិភ័យកុំឱ្យឆាបឆេះផ្ទះ ដែលបានសាងសង់ឡើងដោយញើសឈាម និងប្រាក់សន្សំរាប់ឆ្នាំទើបបានផ្ទះមួយខ្នង ។ ដូច្នេះ ពេលចេញដំណើរទៅក្រៅផ្ទះ ត្រូវពន្លត់ភ្លើងធូប ទៀន ឬភ្លើងចង្ក្រាន និងបិទប្រព័ន្ធអគ្គិសនីនៅក្នុងផ្ទះឲ្យបានត្រឹមត្រូវ។

លោក អ៊ុត វណ្ណរ៉ា អភិបាលស្រុក និងជាប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជា ស្រុកកំពង់ស្វាយ តំណាងឱ្យលោកព្រឹន្ទបាលទោ សុទ្ធ ហ៊ន ដែលជាអតីតយុទ្ធជនពិការ និងតំណាងឱ្យប្រជាពលរដ្ឋនៅស្រុកកំពង់ស្វាយទាំងអស់ បានសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ដែលបានផ្ដល់ផ្ទះថ្មីចំនួន ១ខ្នង និងស្បៀងអាហារ គ្រឿងឧបភោគបរិភោគ សម្ភារប្រើប្រាស់ និងថវិកាមួយចំនួន សម្រាប់ឡើងផ្ទះថ្មី ជូនដល់ក្រុមគ្រួសារអតីតយុទ្ធជនដែលរងគ្រោះដោយអគ្គិភ័យឆាបឆេះផ្ទះនៅពេលកន្លងទៅនេះ និងសូមគោរពជូនពរសម្ដេច ឯកឧត្តម លោកជំទាវ និងថ្នាក់ដឹកនាំគណៈកម្មាធិការសមាគមអតីតយុទ្ធជន និងនិវត្តជនកម្ពុជា នៅគ្រប់ថ្នាក់ សូមទទួលបាននូវពុទ្ធពរទាំង ៤ប្រការ កុំបីឃ្លៀងឃ្លាតឡើយ ៕