អនុប្រធាន គ.ជ.គ.ម. អញ្ជើញចូលរួមពិធីចែកកញ្ចប់សម្ភារចាំបាច់ចំនួន ៣,៣១៨កញ្ចប់ ជូនស្ត្រី និងក្មេងស្រីរងគ្រោះ នៅភូមិរង់ចាំ

បន្ទាយមានជ័យ៖នៅថ្ងៃទី២ ខែវិច្ឆិកា ឆ្នាំ២០២៦ ឯកឧត្តម អ៊ុក ឃ្នួច អនុប្រធាន គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) តំណាងដ៏ខ្ពង់ខ្ពស់ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គ.ជ.គ.ម. និងថ្នាក់ដឹកនាំ អគ្គលេខាធិការដ្ឋាន គ.ជ.គ.ម. បានអញ្ជើញចូលរួមពិធីចែកកញ្ចប់សម្ភារចាំបាច់ចំនួន ៣,៣១៨កញ្ចប់ ជូនស្ត្រី និងក្មេងស្រីរងគ្រោះនៅភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ។

ពិធីនេះប្រព្រឹត្តទៅក្រោមអធិបតីភាព លោកជំទាវកិត្តិបណ្ឌិត អ៉ឹង កន្ថាផាវី រដ្ឋមន្ត្រីក្រសួងកិច្ចការនារី និង ឯកឧត្តម ISHIZUKI Hideo ឯកអគ្គរាជទូតជប៉ុនប្រចាំកម្ពុជា ព្រមទាំងមានការចូលរួមពី ឯកឧត្តម អ៊ុ រាត្រី អភិបាលខេត្តបន្ទាយមានជ័យ, លោកស្រី Sandra Bernklau តំណាង UNFPA និងលោកស្រី តាំង សុភាព នាយិការងអង្គការ TPO។

ជំនួយនេះរៀបចំឡើងក្រោមកិច្ចសហការរវាង ក្រសួងកិច្ចការនារី សហការជាមួយជាមួយមូលនិធិប្រជាជនសហប្រជាជាតិ (UNFPA) ព្រមទាំងស្ថានទូតជប៉ុនប្រចាំកម្ពុជា និងអង្គការចិត្តសង្គមអន្តរវប្បធម៌ (TPO) ខណៈជំនួយសរុបចំនួន ៥,០០០ កញ្ចប់ ផ្តល់ជូនដល់ប្រជាពលរដ្ឋរងគ្រោះដោយសារផលប៉ះពាល់នៃសង្គ្រាម និងគ្រោះមហន្តរាយ ក្នុងខេត្តចំនួនបី រួមមាន ខេត្តបន្ទាយមានជ័យ ឧត្តរមានជ័យ និងព្រះវិហារ៕