ឯកឧត្តម ហ៊ុន ម៉ានី៖ ការចូលរួមពិព័រណ៍ផលិតផលខ្មែរ បង្ហាញយ៉ាងច្បាស់ នូវកម្លាំងសាមគ្គីជាតិខ្មែរ

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានគណៈកម្មការរៀបចំពិព័រណ៍ផលិតផលខ្មែរ ឆ្នាំ២០២៦ មានប្រសាសន៍ថា ការចូលរួមរបស់ប្រជាពលរដ្ឋក្នុងពិព័រណ៌ខ្មែរ ជាការបង្ហាញយ៉ាងច្បាស់នូវកម្លាំងសាមគ្គីឯកភាពជាតិខ្មែរ ជឿជាក់ គាំទ្រ និងចូលរួមជាមួយរាជរដ្ឋាភិបាល និងកងកម្លាំងជួរមុខ ក្នុងការការពារ កសាង អភិវឌ្ឍជាតិមាតុភូមិកម្ពុជា។

ថ្លែងនៅក្នុងឱកាស ពិធីបើកពិព័រណ៍ផលិតផលខ្មែរ ឆ្នាំ២០២៦ នាថ្ងៃទី៦ ខែវិច្ឆិកា នេះ ឯកឧត្តម ហ៊ុន ម៉ានី មានប្រសាសន៍ថា ​នេះជាលើកទី២ ដែល សហភាពសហព័ន្ធយុវជនកម្ពុជា រៀបចំពិព័រណ៍ផលិតផលខ្មែរបន្ទាប់ពី​​​ទទួលបានការគាំទ្រ និងការចូលរួមយ៉ាងច្រើនកុះករពីសំណាក់ប្រជាពលរដ្ឋក្នុងពិព័រណ៍កាលពីឆ្នាំមុន។

ឯកឧត្ដម មានប្រសាសន៍បន្តថា ពិព័រណ៍ផលិតផលខ្មែរ ក្រោមប្រធានបទ «ខ្មែរធ្វើបាន៖ ចូលរួម ជំរុញ គាំទ្រផលិតផលក្នុងស្រុក» បានឆ្លុះបញ្ចាំងពីគោលបំណងសំខាន់នៃពិព័រណ៍ផលិតផលខ្មែរ ការប្រមូលផ្ដុំពង្រឹងស្មារតី សាមគ្គីភាព ភាពស្នេហាជាតិ រួមគ្នាជាសំឡេងតែមួយ ចូលរួមគាំទ្រការពង្រឹងសមត្ថភាពផលិផលក្នុងស្រុក​​​ ​តាមរយៈការចូលរួមជំរុញ និងគាំទ្រការប្រើប្រាស់ផលិតផលក្នុងស្រុក ដើម្បីបង្កើតមុខរបរ និងបង្កើនឱកាសការងារសម្រាប់ប្រជាពលរដ្ឋខ្មែរ។

ឯកឧត្តម ហ៊ុន ម៉ានី លើកឡើងថា ពិព័រណ៍នេះ មានស្តង់បង្ហាញផលិតផលខ្មែរចម្រុះប្រភេទ ដើម្បីផ្តល់ឱកាសដល់សាធារណជនចូលរួមទស្សនា ឈ្វេងយល់ពីស្នាដៃ និងសមត្ថភាពផលិតរបស់កូនខ្មែរ ព្រមទាំងចូលរួមគាំទ្រផលិតផលក្នុងស្រុក។ ការរៀបចំនេះមានគោលបំណងពង្រឹងសមត្ថភាពផលិតកម្មក្នុងស្រុក ជំរុញការប្រើប្រាស់ផលិតផលជាតិ និងរួមចំណែកជំរុញកំណើនសេដ្ឋកិច្ចកម្ពុជា។

គួរបញ្ជាក់ថា សហភាពសហព័ន្ធយុវជនកម្ពុជា (ស.ស.យ.ក.) រៀបចំពិព័រណ៍ផលិតផលខ្មែរ «ខ្មែរធ្វើបាន» លើកទី២ រយៈពេល ៣ថ្ងៃ ចាប់ពីថ្ងៃទី៦ ដល់ថ្ងៃទី៨ ខែវិច្ឆិកា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ (អគារ G-L) ដើម្បីជំរុញការប្រើប្រាស់ និងគាំទ្រផលិតផលក្នុងស្រុក ព្រមទាំងរួមចំណែកលើកស្ទួយសេដ្ឋកិច្ចជាតិ៕