នាយឧត្តមសេនីយ៍ សៅ សុខា រំលឹកដល់កងរាជអាវុធហត្ថទាំងអស់ ត្រូវថែរក្សាឲ្យបាននូវសុខសន្តិភាព

នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជ អាវុធហត្ថលើផ្ទៃប្រទេស បានរំលឹកដល់នាយទាហាន នាយទាហានរង ពលទាហាននៃកងរាជអាវុធហត្ថ ទាំងអស់ត្រូវតែថែរក្សា ការពារឲ្យបានដាច់ខាតនូវសុខសន្តិភាព ខណៈសន្តិភាពនេះ ហើយដែលបានធ្វើឲ្យប្រទេសមានការអភិវឌ្ឍរហូតដល់សព្វថ្ងៃនេះ។

ក្នុងឱកាសអញ្ជើញចុះត្រួតពិនិត្យដោយផ្ទាល់នូវការ ហាត់សមរបស់កងអន្តរាគមន៍នៃកងរាជ​អាវុធ​ហត្ថលើផ្ទៃ​ប្រទេសសម្រាប់ធ្វើការទប់ស្កាត់​ និងបង្រ្កាបបាតុកម្ម ឬកុបកម្មដោយខុសច្បាប់ណាមួយ នៅភ្នំជុំសែនរីករាយ ខេត្តកំពង់ឆ្នាំង នាថ្ងៃទី១៧ ខែសីហា ឆ្នាំ២០២៤នេះ នាយឧត្តមសេនីយ៍ សៅ សុខា បានលើកឡើងថា ក្នុងនាមជាកងទ័ពដាច់ខាតត្រូវតែត្រៀម និងស្តាប់រាល់បទបញ្ជា​របស់​រាជរដ្ឋាភិបាល ស្របច្បាប់ដែលកើតចេញពីការបោះឆ្នោតតាមគន្លងប្រជាធិបតេយ្យ សេរីពហុបក្ស ហើយត្រូវតែចាត់វិធាន ការភ្លាមៗរាល់ជនអគតិណា ​ដែលធ្វើឲ្យប្រទេសមានចលាចលក្រោម​ការញុះញង់​ពីជនខាងក្រៅនោះ។

ជាមួយគ្នានោះដែរ នាយឧត្តមសេនីយ៍ សៅ សុខា ក៏បានអំពាវនាវដល់បងប្អូនប្រជាពលរដ្ឋ ចូលរួម​ថែរក្សាសន្តិភាព ព្រោះថាប្រទេសកម្ពុជាធ្លាប់បានឆ្លងកាត់រួចទៅហើយ ​ក្នុងការបែកបាក់ជាតិ ការ​លាបពណ៌​គ្នាជាដើមនោះ ​បាន​ធ្វើ​ប្រជាជនកម្ពុជា​រង់ទុក្ខលំបាក​យ៉ាងច្រើន ទម្រាំនិងទទួល​បាន​សន្តិភាពដូចសព្វថ្ងៃនេះ​ ដូច្នេះសូមបងប្អូន ​ប្រជាពលរដ្ឋខ្មែរទាំងអស់កុំស្តាប់​តាមការអុចអាល ចាក់រុក ​និង​ឆ្កឹះឆ្កៀល​ពីជន​អគតិមួយក្តាប់​តូចដែលកំពុងរត់ចោលស្រុកទាំងនោះ​ឲ្យសោះ ខណៈកង​កម្លាំង​មានសមត្ថកិច្ចមិនបណ្តែតបណ្តោយ​ឲ្យ​ជនណា​ប្រព្រឹត្ត​អនាធិបតេយ្យ ​ដែល​នាំឲ្យ​អសន្តិសុខ​ដល់ប្រទេសជាតិនោះឡើយ៕

អត្ថបទ៖ បាន ចក់