សាលាភូមិន្ទរដ្ឋបាល និងសាកលវិទ្យាល័យការពារជាតិចុះMOU លើកកម្ពស់ការគាំទ្រគ្នាទៅវិញទៅមក

សាលាភូមិន្ទរដ្ឋបាល នៃក្រសួងមុខងារសាធារណៈ និងសាកលវិទ្យាល័យការពារជាតិ នៃក្រសួងការពារជាតិ នៅព្រឹកថ្ងៃទី០៤ ខែកញ្ញានេះ បានចុះហត្ថលេខាលើ​អនុស្សរណៈនៃ​ការយោគយល់គ្នា ដែលមានការអញ្ជើញជាគណៈអធិបតីពីឯកឧត្តម នាយឧត្តមសេនីយ៍ ចាយ សាំងយុន រដ្ឋលេខាធិការក្រសួងការពារជាតិ តំណាងរដ្ឋមន្ត្រីក្រសួងការពារជាតិ និងឯកឧត្តម យក់ ប៊ុនណា រដ្ឋលេខាធិការប្រចាំការ និងជានាយកសាលាភូមិន្ទរដ្ឋបាល តំណាងរដ្ឋមន្ត្រីក្រសួងមុខងារសាធារណៈ។ ពិធីចុះអនុស្សារណៈនេះ រៀបចំឡើងនៅសាលាភូមិន្ទរដ្ឋបាល ស្ថិតនៅរាជធានីភ្នំពេញ។

ថ្លែងក្នុងពិធីចុះអនុស្សរណៈនៃការយោគយល់គ្នា ឯកឧត្តម យក់ ប៊ុនណា រដ្ឋលេខាធិការប្រចាំការ និងជានាយកសាលាភូមិន្ទរដ្ឋបាល នៃក្រសួងមុខងារសាធារណៈ បានមានប្រសាសន៍ថា ពិធីចុះអនុស្សរណៈ នៃការយោគយល់គ្នានាថ្ងៃនេះ​ បានឆ្លុះបញ្ចាំងឱ្យឃើញថា សាកលវិទ្យាល័យ​ការពារជាតិ នឹងក្លាយជាដៃគូរយុទ្ធសាស្ត្រដ៏សំខាន់មួយទៀត​របស់សាលាភូមិន្ទរដ្ឋបាល ក្នុងការ​ចូលរួម​រៀបចំឥរិយាបថ ​របស់ពលទាហ៊ាន​ ឱ្យបានសមជាមន្ត្រីដែលបម្រើជាតិ និងប្រជាជន ដែល​អាច​ឆ្លើយតបទាន់ពេលវេលា ​និងតម្រូវការពិតប្រាកដរបស់ក្រសួង និងស្របតាមគោលនយោបាយ និងកម្មវិធី​កែទម្រង់ទាំងឡាយរបស់រាជរដ្ឋាភិបាល​ ស្របតាមការតម្រង់ទិស នៃផែនការយុទ្ធសាស្ត្រ​បញ្ចាកោណ ដំណាក់ការទី១ ដែលដាក់ចេញដោយសម្តេច​មហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តម ឧត្តមសេនីយឯក បណ្ឌិត ដោក សុផា សាកលវិទ្យាធិការ នៃសាកលវិទ្យាល័យការពារជាតិ មាន​ប្រសាសន៍ដែរថា ពិធីចុះអនុស្សារណៈនាពេលនេះ ធ្វើឡើងក្នុងគោលបំណងសំខាន់ គឺ​ការផ្តោត​លើការបង្កើតកិច្ចសហប្រតិបត្តិការ ​និងការលើកកម្ពស់ការគាំទ្រគ្នាទៅវិញទៅមក ដែល​ពាក់ព័ន្ធ​នឹងការអភិវឌ្ឍ​សមត្ថភាពយោធិននៃកងយោធពលខេមរភូមិន្ទលើកការអប់រំ​បណ្តុះបណ្តាល ការស្រាវជ្រាវ និងគម្រោងកម្មវិធីផ្សេងៗ ដោយផ្តោតលើគោលការណ៍ពិគ្រោះយោបល់ ឯកភាព សមភាព យុត្តិធម៌ និងផ្តល់ផលប្រយោជន៍ជូនគ្នាទៅវិញទៅមក។

បន្ទាប់ពីចុះអនុស្សារណៈយោគយល់គ្នារវាងសាលាភូមិន្ទរដ្ឋបាល ​និងសាកលវិទ្យាល័យការពារជាតិ នាយ​ទាហានជានិស្សិត និងសិក្ខាមមកពីសាលកវិទ្យាល័យការពារជាតិចំនួន៩០រូប នឹងចូលសិក្សា​វគ្គរដ្ឋបាលទូទៅរយៈពេល៤សប្តាហ៍ដែលចាប់ផ្តើមបើកពីថ្ងៃនេះតទៅ៕ អត្ថបទ៖ទូច សោភ័ណ