ពលរដ្ឋខ្មែរអ៊ិស្លាម២០០គ្រួសាររស់នៅសង្កាត់ដងទង់ ទទួលបានការព្យាបាលជំងឺដោយឥតគិតថ្លៃ

ប្រជាពលរដ្ឋខ្មែរអ៊ិស្លាម ២០០គ្រួសារដែលមានជីវភាពខ្វះខាតនៅភូមិ៤ សង្កាត់ដងទង់ ក្រុង​ខេមរ​ភូមិន្ទ ខេត្តកោះកុង បានទទួលការពិគ្រោះពិនិត្យព្យាបាលជំងឺដោយឥតគិតថ្លៃ និងមាន​ស្បៀង​អាហារ​ទៀតផង។

ដើម្បីជួយឧបត្ថម្ភ​គាំទ្រដល់ប្រជាពលរដ្ឋមានជីវភាពខ្វះខាតក្រីក្រ និងលើកកម្ពស់សុខភាព ក្រសួងការងារ និងបណ្តុះបណ្តាល​វិជ្ជាជីវ​បាន​សហការ​ជាមួយ​សមាគម​សម្ព័ន្ធ​យុវជន​មុស្លិម​កម្ពុជា​ខេត្ត​កោះកុង ចាត់ក្រុមការងារគ្រូពេទ្យចុះពិនិត្យព្យាបាលជំងឺដល់ពលរដ្ឋខ្មែរឥស្លាម ដោយ​អាច​សម្រាល​ទុក្ខលំបាកកាត់បន្ថយការចំណាយផ្សេងៗ។បានមួយកម្រិត។

ឯកឧត្តម ម៉ន គ្រីយ៉ា រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវ ឱ្យដឹងនៅថ្ងៃទី២២ ខែកញ្ញា ឆ្នាំ២០២៤ថា ពលរដ្ឋមានសុខុមាលភាព និងជីវភាពសមរម្យល្អ សង្គមជាតិ​នឹង​អភិវឌ្ឍន៍​រីក​ចម្រើន​ទៅ​មុខ​តាមស្ថានការណ៍នោះដែរ ដូច្នេះទើបមានការយក​ចិត្តទុក​ដាក់​អំពី​សុខទុក​របស់​ពលរដ្ឋ​នៅ​ពេល​នេះ។

ឯកឧត្តមអំពាវនាវដល់ប្រជាពលរដ្ឋបន្តចូលរួមថែរក្សាសុខភាពអំឡុងពេលរដូវវស្សាឱ្យបានរឹងមាំ ចៀសវាងឆ្ងាយពីជំងឺផ្សេងៗ ពិសេស​បន្ត​ថែ​រក្សា​ការពារ​អនាម័យ​បរិស្ថាន​ផង​ដែរ​ដោយ​មិន​បោះ​ចោល​សំរាម​នៅទីសាធារណៈដែលធ្វើប៉ះពាល់ដល់សោភ័ណ្ឌទីក្រុង ក៏ដូចជាមូលដ្ឋាន​រស់​នៅ​របស់​ខ្លួន​។

ដោយឡែកលោកស្រី ឈី វ៉ា អភិបាលរងខេត្តកោះកុង ចាត់ទុកសកម្មភាពខាងលើថា ជាសកម្ម​ភាព​​មនុស្ស​ធម៌​ដ៏​មាន​គុណត​ម្លៃ​បំផុត​សម្រាប់​ពលរដ្ឋដែលកំពុងជួបប្រទះខ្វះខាត​ផ្នែក​ជីវភាព​រស់​នៅ​​ក្នុងមូលដ្ឋានភូមិ៤ សង្កាត់ដងទង់ អោយវិលមករកជីវភាពល្អប្រសើរ។

លោ​ក​ស្រីបន្តថា សកម្មភាព​មនុស្សធម៌​នេះ​ស្រប​តាម​គោល​នយោបាយ​របស់​រដ្ឋាភិបាល​កម្ពុជា​ដែល​បាន​យកចិត្តទុកដាក់ខ្ពស់ដូចជា ការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និង​ងាយ​រងគ្រោះក្នុងអំឡុងពេលប្រយុទ្ធនឹងជំងឺកូវីដ១៩ កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និង​កុមារអាយុក្រោម២ឆ្នាំ និងកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យជាដើម។

លោកស្រី ឈី វ៉ា ជឿជាក់ថា ក្រសួងការងារ និងបណ្តុះបណ្តាលវិជ្ជាជីវៈ និងសមាគម​សម្ព័ន្ធ​យុវជន​មុស្លិម​កម្ពុជាខេត្តកោះកុង នឹងបន្តខិតខំកៀរគរ​សប្បុរស​ជន​នៃ​ប្រទេស​ម៉ាឡេ​ស៊ី​បន្ថែម​ទៀត ដើម្បីចូលរួមចំណែកក្នុងការងារមនុស្សធម៌នេះ៕ អត្ថបទៈ ឈឹម មករា