ការបង្កើតរដ្ឋធម្មនុញ្ញនៅឆ្នាំ១៩៩៣ បានរួមចំណែកជាសារវន្តក្នុងការបង្រួបបង្រួមជាតិ និងការអភិវឌ្ឍ

អ្នកសិក្សាស្រាវជ្រាវ និងអ្នកនយោបាយនៅកម្ពុជា យល់ឃើញថា ការបង្កើតរដ្ឋធម្មនៅឆ្នាំ១៩៩៣ បាន​រួមចំណែកជាសារវន្តក្នុងការបង្រួបបង្រួមជាតិ និងការអភិវឌ្ឍរីកចម្រើនមកដល់សព្វថ្ងៃ ។

ក្នុងកិច្ចសម្ភាសជាមួយBTV នៅថ្ងៃទី២៤ ខែកញ្ញា នេះ លោកបណ្ឌិត គិន ភា ប្រធានវិទ្យាស្ថានទំ នាក់​ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា បានមានប្រសាសន៍ថា ការ​បង្កើត​រដ្ឋធម្មនុញ្ញនៅ ឆ្នាំ១៩៩៣ មានសារសំខាន់ ដូចជា៖ បានផ្លាស់​ប្ដូរ​នៃ​ដំណាក់​កាល​ប្រវត្តិសាស្រ្ត​ដ៏​សំខាន់​មួយ ដោយបាន បង្កើតឡើងវិញ​នៃ​របប​រាជានិយម​ដែល​ជា​គ្រឹះរបប​នយោបាយ​នៃ​ប្រទេស​កម្ពុជា, ជាគ្រឿងទប់អំណាច ទាំងបីនៅក្នុងព្រះរាជាណាចក្រកម្ពុជា ដោយបានបែងចែកដាច់ពីគ្នា និង​ជា​សារវន្តសម្រាប់ការរក្សាសុខ សន្តិភាពប្រទេសជាតិ ជាដើម ។

លោក អ៊ុន វិសិទ្ធគុន ប្រធានគណបក្សកម្លាំងប្រជាធិបតេយ្យ បានឱ្យដឹងដែរថា បច្ចុប្បន្ន ប្រទេស កម្ពុជា​មានសុខសន្តិភាព ដោយគោរពទៅតាមរដ្ឋធម្មនុញ្ញ ដែលបានបង្កើតឡើងនៅឆ្នាំ១៩៩៣។ រដ្ឋធម្មនុញ្ញ គឺជាច្បាប់កំពូលរបស់រដ្ឋ ដែលប្រជាពលរដ្ឋគ្រប់រូប រាប់បញ្ចូល​ទាំងអ្នក​នយោបាយ​ដែរ​នោះ ត្រូវគោរពតាម។ ម្យ៉ាងវិញទៀត ការបង្កើតរដ្ឋធម្មនុញ្ញនេះ បានធ្វើឱ្យ​មាន​ការ​បង្រួប​បង្រួម​ជាតិ​ផង​ដែរ​។

គួររម្លឹកដែរថា រដ្ឋធម្មនុញ្ញនៃព្រះរាជាណាចក្រកម្ពុជា ត្រូវបានសភាធម្មនុញ្ញអនុម័ត នៅថ្ងៃទី២១ ខែកញ្ញា ឆ្នាំ១៩៩៣ ហើយត្រូវ​បាន​ព្រះមហាក្សត្រ​ឡាយ​ព្រះហស្ថ​លេខា​លើ​ព្រះរា​ជ​ក្រម​ប្រកាស​ឱ្យ​ប្រើប្រាស់ជាផ្លូវការ នៅថ្ងៃទី២៤ ខែកញ្ញា ឆ្នាំ១៩៩៣។ រដ្ឋធម្មនុញ្ញ គឺជាច្បាប់​កំពូល​នៃ​ព្រះរាជា​ណា​ចក្រកម្ពុជា។ ច្បាប់ និងសេចក្តីសម្រេចទាំងឡាយ និងស្ថាប័ននានារបស់រដ្ឋ ត្រូវស្របនឹង​រដ្ឋធម្មនុញ្ញ​ជា​ដាច់ខាត។ គិតត្រឹមថ្ងៃទី២៤ ខែកញ្ញា ឆ្នាំ២០២៤នេះ រដ្ឋធម្មនុញ្ញា​នៃ​ព្រះរាជាណា​ចក្រ​កម្ពុជា មានអាយុ កាល ៣១ឆ្នាំហើយ៕ អត្ថបទ៖ សោភ័ណ