ឯកឧត្ដមបណ្ឌិត ជាម យៀប ជួបសម្តែងការគួរសម និង ពិភាក្សាការងារ​ជាមួយប្រធានរដ្ឋសភា​នៃសាធារណរដ្ឋប្រជាធិបតេយ្យប្រជាមានិតឡាវ

កាលពីរសៀលថ្ងៃទី៩ ខែតុលា ឆ្នាំ២០២៤ នៅទីក្រុងវៀងច័ន្ទន៍ ប្រទេសឡាវ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភានៃព្រះរាជាណាចក្រកម្ពុជា និងជាប្រធានក្រុមរដ្ឋសភាជាតិកម្ពុជា-AIPA បានជួបសម្តែងការ​គួរសម និងពិភាក្សា​ការងារ​ជាមួយ​ឯកឧត្តម Xaysomphone Phomvihane ប្រធានរដ្ឋសភានៃសាធារណរដ្ឋ​ប្រជាធិបតេយ្យ​ប្រជាមានិតឡាវ។

ឯកឧត្តមកិត្តិសេដ្ឋាបណ្ឌិត ជាម យៀប បានវាយតម្លៃខ្ពស់ចំពោះទំនាក់ទំនងកិច្ច​សហប្រតិបត្តិការ​ទ្វេភាគី កម្ពុជា-ឡាវ នាពេលកន្លងមក និងបន្តពង្រឹងពង្រីកទំនាក់ទំនង​ជាប្រពៃណី​ឱ្យកាន់​តែរឹង​មាំ​ថែមទៀត ដើម្បីជំរុញការអភិវឌ្ឍលើគ្រប់វិស័យ ដែលបម្រើដល់ឧត្តមប្រយោជន៍​របស់​ប្រជាជន នៃប្រទេសទាំងពីរ។

ឯកឧត្តម Xaysomphone Phomvihane បានថ្លែងនូវការកោតសរសើរ​ចំពោះ​តួនាទីដ៏​សំាន់​របស់កម្ពុជា ក្នុងការពង្រឹងទំនាក់ទំនងនិងកិច្ចសហប្រតិបត្តិការនៃបណ្តាប្រទេសក្នុងតំបន់ និង​ពិភពលោក​។ ភាគីឡាវនឹងបន្តលើកកម្ពស់កិច្ចសហប្រតិបត្តិការទ្វេភាគីលើវិស័យសំខាន់ៗ មាន​ជាអាទិ៍ ពាណិជ្ជកម្ម ការវិនិយោគ ទេសចរណ៍ ការដឹកជញ្ជូន និងការអប់រំ ដើម្បីលើកកម្ពស់​វឌ្ឍនភាព និងវិបុលភាពនៃប្រជាជាតិទាំងពីរ។