ក្រុមមន្ត្រីជាន់ខ្ពស់ស្ថានទូតជប៉ុនប្រចាំកម្ពុជា ធ្វើទស្សនកិច្ចសិក្សាស្វែងយល់ពីការងារបោសសម្អាតមីនរបស់អង្គភាពស៊ីម៉ាក់

(ភ្នំពេញ) ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ អនុញ្ញាតជូនលោក NAGASE Kensuke អនុប្រធានបេសកកម្ម (អនុទូត)និងសហការី នៃស្ថានទូតជប៉ុនប្រចាំកម្ពុជា ចូលជួបសម្ដែងការគួរសម និង ទស្សនាសាលពិព័រណ៍គ្រាប់ មីននិងគ្រាប់យុទ្ធភណ្ឌមិនទាន់ផ្ទុះ ដើម្បីស្វែងយល់បន្ថែមពីការងារបោសសម្អាតមីនរបស់អង្គភាពស៊ីម៉ាក់ នាថ្ងៃទី១១ ខែតុលា ឆ្នាំ ២០២៤ នៅទីបញ្ជាការកណ្តាលCMACភ្នំពេញ។

ក្នុងជំនួបពិភាក្សាការងារនេះ ឯកឧត្តមប្រតិភូ បានជម្រាបជូនលោក NAGASE Kensuke អំពីបញ្ហាប្រឈមដោយសំណល់ជាតិផ្ទុះពីសង្រ្គាមនៅក្នុងប្រទេសកម្ពុជាដែលបន្សល់ទុកដោយសង្រ្គាមរយៈជាង៣ទសវត្សរ៍ រួមមានគ្រាប់មីនប្រឆាំងមនុស្ស គ្រាប់ មីនប្រឆាំងរថក្រោះ គ្រាប់បែកទម្លាក់ពីលើយន្តហោះ គ្រាប់បែកចង្កោម គ្រាប់បែកគីមី និងគ្រាប់យុទ្ធភណ្ឌមិនទាន់ផ្ទុះផ្សេងៗទៀតជាដើម និងផែនការយុទ្ធសាស្ត្រ២០២៦-២០៣០ សម្រាប់ដោះ ស្រាយបញ្ហាដែលនៅសេសសល់។

នៅក្នុងជំនួបពិភាក្សាការងារនេះផងដែរ ឯកឧត្តម ហេង រតនា ក៏បានជម្រាបលោក NAGASE Kensuke ពីសមិទ្ធផលបោស សម្អាតមីនដោយអង្គភាពស៊ីម៉ាក់ដែលសម្រេចបានរយៈពេលជាង៣២ឆ្នាំ ដោយមានការចូលរួមគាំទ្រពីប្រទេសជប៉ុនចាប់តាំងពីទសវត្សរ៍១៩៩០ ទាំងថវិកា និងសម្ភារៈបោសសម្អាតមីន ដោយរុករកឃើញ និងកម្ទេចចោលគ្រាប់គ្រប់ប្រភេទជាង៣លានគ្រាប់។ បន្ថែមពីនេះ ឯកឧត្តម ក៏បានលើកឡើងពីកិច្ចសហប្រតិបត្តិការជាមួយប្រទេសជប៉ុន ក្នុងបណ្តុះបណ្តាលការហ្វឹកហ្វឺនសកម្មភាពមីនដល់ប្រទេសនានាដែលរងផលប៉ះពាល់ដោយសារគ្រាប់មីន និងសំណល់យុទ្ធភណ្ឌមិនទាន់ផ្ទុះ ហើយបច្ចុប្បន្ននេះកំពុងបន្តការបណ្តុះបណ្តាលដល់ប្រទេសកូឡុំប៊ី និងប្រទេសអ៊ុយក្រែន ដែលកំពុងញាំញីដោយសារសង្រ្គាម។

ជាការឆ្លើយតបលោក NAGASE Kensuke បានកោតសរសើរដល់ អង្គភាពស៊ីម៉ាក់ដែលបានសហការយ៉ាងល្អជាមួយប្រទេសជប៉ុន ជាពិសេសគម្រោងនានាតាមយៈទីភ្នាក់ងារសហប្រតិបត្តិការអន្តរជាតិជប៉ុន (JICA) ហើយលោកបានបញ្ជាក់ជំហររបស់រដ្ឋាភិបាលជប៉ុនក្នុងការបន្តជំរុញអនុវត្តន៍ទស្សនវិស័យរបស់អតីតរដ្ឋមន្ត្រីការបរទេសជប៉ុនលើគំនិតផ្តួចផ្តើមជប៉ុន-កម្ពុជានៃយុទ្ធសាស្ត្រថ្មីក្នុងវិស័យសកម្មភាពមីន។ ក្នុងន័យនេះ លោក NAGASE Kensuke ក៏បានពាំនាំការបញ្ជាក់ពីការឆ្លើយតបជាវិជ្ជមាននៃសំណើរបស់អង្គភាពស៊ីម៉ាក់សម្រាប់ជំនួយឥតសំណងសម្រាប់ឆ្នាំបន្តទៅមុនទៀត។ លោកក៏បានកោតសរសើរចំពោះការចែករំលែកជំនាញបោសសម្អាតមីនដល់ដល់ប្រទេសនានា ជាពិសេសប្រទេសដែលជប៉ុនបានផ្តល់សម្ភារៈបោសសម្អាតមីនដើម្បីសកម្មភាពបោសសម្អាតមីនមនុស្សធម៌ផងដែរ។

បន្ទាប់ពីកិច្ចប្រជុំ លោក NAGASE Kensuke បានអញ្ជើញទស្សនាសាលពិព័រណ៍គ្រាប់មីន/យុទ្ធភណ្ឌមិនទាន់ផ្ទុះ ដើម្បីស្វែងយល់បន្ថែមពីការងារបោសសម្អាតមីនរបស់អង្គភាពស៊ីម៉ាក់៕

អត្ថបទ,ភារម្យ