ទូកង ឌី សែនជ័យបារមីបូរណព៌ា និងសាឯម សែនជ័យបារមីស្វាយជ្រុំ ខេត្តស្វាយរៀង ជប់លៀងអបអរសាទរជ័យជម្នះ

ស្វាយរៀង ៖ ទូកង ឌី សែនជ័យបារមីបូរណព៌ា និងសាឯម សែនជ័យបារមីស្វាយជ្រុំ ខេត្តស្វាយរៀង បានរៀបចំធ្វើពិធីជប់លៀងដល់មូលដ្ឋានចំណុះ នៅភូមិឃុំ ស្រុកកំណើតរបស់កីឡារ ថ្ងៃទី២៦ ខែវិច្ឆិកា ឆ្នាំ២០២៤ បន្ទាប់ពីទទួលបានជ័យជម្នះបីថ្ងៃជាប់គ្នា នៅក្នុងការប្រណាំងទូកង នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅរាជធានីភ្នំពេញនាពេលថ្មីៗកន្លងទៅ។

នៅក្នុងពិធីជប់លៀងនេះ លោក សេង ម័រ ប្រធានគណៈកម្មកាទូកងតំណាង ឯកឧត្តម ឌី វិជ្ជា និងលោកជំទាវ ហ៊ុន ម៉ាណា សូមថ្លែងការអបអរសាទរ និងការកោតសរសើរដល់ក្រុមកីឡាករចំណុះទូក ឌី សែនជ័យបារមីបូរណព៌ា និងសាឯម សែនជ័យបារមីស្វាយជ្រុំទាំងអស់ ដែលបានខិតខំប្រឹងប្រែងរហូតទទួលបានជ័យបីថ្ងៃជាប់គ្នា។

លោក សេង ម័រ បានបញ្ជាក់ដែរថា ជានិច្ចកាល ឯកឧត្តម ឌី វិជ្ជា និងលោកជំទាវ ហ៊ុន ម៉ាណា តែងបានពាំនាំនូវការសាកសួរសុខទុក្ខ និងដាស់តឿន ជាពិសេសការឧបត្ថមគាំទញរ ដល់បងប្អូនក្រុមកីឡាករចំណុះទូកទាំងពីរនេះជាប្រចាំ និងបានកោតសរសើរចំពោះស្មារតី និងទឹកចិត្តដ៏មោះមុត រួមកម្លាំងសាមគ្គីភាពគ្នាបានយ៉ាងល្អ ប្រឹងប្រែងរហូតទទូលបានជោគជ័យ។

ចំណែកភាពជោកជ័យ និងភាពសប្បាយរីករាយក្នុងពិធីអបអរសាទរជ័យជម្នះ ដែលយើងមាននាពេលនេះគឺកើតចេញពីកត្តាសុខសន្តិភាព និងការអភិវឌ្ឍរបស់ប្រទេសជាតិ រួមជាមួយការខិតខំប្រឹងប្រែងរបស់បងប្អូន ហើយភាពសប្បាយរីករាយនេះ សបញ្ជាក់ឲ្យឃើញថា ប្រទេសជាតិដែលដឹកនាំដោយសម្តេចតេជោ ហ៊ុន សែន អតីតនាយករដ្ឋមន្ត្រី និងសម្តេចមហាបវរធិបតី ហ៊ុន ម៉ណែត នាយករដ្ឋមន្ត្រី អាណត្តិទី៧នេះ មានសេរីភាព និងភាពសម្បូរសប្បាយ ដូច្នេះយើងទាំងអស់គ្នាត្រូវបន្តការខិតខំប្រឹងប្រែង និងចូលរួមថែរក្សសន្តិភាពជាបន្តទៀត។

ទន្ទឹមនោះ លោក សេង ម៉័រ ក៏បានថ្លែងអរគុណផងដែរ ដល់ក្រុមកីឡាករទាំអស់ដែលរក្សាបាននូវវិន័យ និងសីលធម៌បានយ៉ាងល្អ នៅក្នុងអំឡុងពេលដែលបំពេញការងារ នៅក្នុងព្រះរាជពិធីបុណ្យអុំទូកនេះ ហើយជាមួយគ្នានោះ លោក ក៏បាននាំយកអំណោយដ៏ថ្លៃថ្លារបស់លោកជំទាវ ម៉ែន ភក្តី ហុកឡង់ឌី ឯកឧត្តម ឌី វិជ្ជា និងលោកជំទាវ ហ៊ុន ម៉ាណា ដល់ក្រុមគីឡាករចំណុះទូកផងដែរដែលរួមមាន អង្ករចំនួន ១២៤៥០ តោន និងថវិការសរុប ២១៩០០ដុល្លា ក្នុងនោះក្រុមកីឡាករម្នាក់ៗទទួលបាថវិកា ១០០ដុល្លា អង្ករ ៧៥ kg និងឃីត១កញ្ចប់ និងឧបត្ថម្ភដល់គណៈកម្មការទូកម្នាក់ៗទទួលបាន ២៥០ដុល្លា។

សូមជម្រាបដែរថា ក្នុងពិធីជប់លៀងនេះ ក៏មានការអញ្ជើញចូលរួមពីលោកអភិបាលស្រុក និងអាជ្ញាធរមូលដ្ឋាន រួមទាំងក្រុមគ្រួសារចំណុះទូកច្រើនកុះករ និងបង្កភាពសប្បាយរីករាយយ៉ាងខ្លាំងផងដែរ៕

ដោយ ៖ សេង ម័រ