​នគរបាល នៅតែបន្តឹងការបង្ក្រាប ក្រុមជនបង្កបទល្មើសអសន្តិសុខសង្គមនានា ក្នុងរាជធានីភ្នំពេញ

ភ្នំពេញ ៖ កម្លាំងនគរបាល នៃស្នងការដ្ឋាននគរបាលរាជធានីភ្នំពេញ នៅតែបន្តឹងសកម្មភាពរបស់ខ្លួន ក្នុងការបង្ក្រាបរាល់សកម្មភាពរបស់ក្រុមជនទាំងឡាយ ដែលបង្ក ឬប្រព្រឹត្តិអំពើអសន្តិសុខសង្គមនានា ដោយមិនបន្ធូរបន្ថយដៃនោះឡើយ ។

ជាក់ស្តែង នាព្រឹកថ្ងៃទី២១ ខែធ្នូ ឆ្នាំ២០២៤នេះ ស្នងការដ្ឋាននគរបាលរាជធានីភ្នំពេញ បានធ្វើការបង្ហាញមុខក្រុមជនសង្ស័យចំនួន២២នាក់ ពាក់ព័ន្ធនឹង០៤បទល្មើសផ្សេងៗ ដែលប្រព្រឹត្តិទៅក្នុងខណ្ឌចំនួន០៥ មានខណ្ឌចំការមន , មានជ័យ , កំបូល , ៧មករា និងខណ្ឌដូនពេញ ។

ជនសង្ស័យទាំង២២នាក់ ត្រូវបានកម្លាំងសមត្ថកិច្ចព្រហ្មទណ្ឌកម្រិតស្រាល សហការជាមួយកម្លាំងនគរបាលតាមបណ្តាអធិការដ្ឋាននគរបាលខណ្ឌនីមួយៗខាងលើ ធ្វើការបង្ក្រាបបានជាបន្តបន្ទាប់ និងនៅតាមទីតាំងផ្សេងៗផ្សេងៗគ្នា បន្ទាប់ពីក្រុមទាំងនោះ បានប្រព្រឹត្តិបទល្មើសរួច ។

ជនទាំង២២នាក់ ពាក់ព័ន្ធករណី ៖ ធាក់ប្លន់យកម៉ូតូ , ករណីលួចទ្រព្យសម្បត្តិ , ករណីឆក់ទ្រព្យសម្បត្តិ និងករណីហិង្សាកាប់គ្នាបង្ករបួសស្នាម ។ ក្រោយធ្វើការបង្ហាញមុខជាសាធារណះរួចមក កម្លាំងសមត្ថកិច្ចបានបញ្ចូនខ្លួនក្រុមជនសង្ស័យទាំង២២នាក់ ទៅកានយ្យការអមសាលាដបូងរាជធានីភ្នំពេញ ដើម្បីចាត់ការទៅតាមផ្លូវច្បាប់ ។

សូមបញ្ជាក់ថា ៖ នៅព្រឹកថ្ងៃខែដដែលនេះ ឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ បានដឹកនាំកិច្ចប្រជុំដាក់ផែនការបន្តពង្រឹងកិច្ចការងារការពារសន្តិសុខ រក្សាសណ្តាប់ធ្នាប់ សុវត្ថិភាពសង្គម ផងដែរ ។ កិច្ចប្រជុំនោះ មានការចូលរួមពីលោកស្នងការរង ជំនួយការឯកឧត្តមស្នងការ លោកអនុប្រធានផែនការងារ លោក-លោកស្រីនាយការិយាល័យជំនាញទាំង៣៣ លោកអធិការខណ្ឌទាំង១៤ និងមន្រ្តីពាក់ព័ន្ធផងដែរ ៕

អត្ថបទ ៖ លីហេង