NEA បង្កើនកិច្ចសហការជាមួយសាកលវិទ្យាល័យនានា ដើម្បីផ្សព្វផ្សាយព័ត៌មាន​ការងារដល់យុវជន

ភ្នំពេញ៖ គិតរហូតមកពេលនេះ មជ្ឈមណ្ឌលការងារចល័តរបស់ទីភ្នាក់ងារជាតិមុខរបរ និង​ការងារ (NEA) នៅតែបន្តសកម្មភាពចុះផ្សព្វផ្សាយឱកាសការងារនៅតាមសាកលវិទ្យាល័យនានា ដើម្បី​ផ្តល់ព័ត៌មានអំពីទីផ្សារការងារ និងនាំយកឱកាសការងារឲ្យខិតជិតដល់យុវជន សិស្ស និស្សិត បំណងបង្កើនលទ្ធភាពនៃការទទួលបានការងារកាន់តែឆាប់រហ័ស។

ក្នុង​បទសម្ភាសន៍ជាមួយព័ត៌មាន ប៊ីធីវី នៅព្រឹកថ្ងៃទី២៦ ខែធ្នូនេះ លោក ជិន ខិ អនុ​ប្រធាន​មជ្ឈ​មណ្ឌលការងាររាជធានីភ្នំពេញ នៃទីភ្នាក់ងារជាតិមុខរបរ និងការងារ នៃក្រសួងការងារ និង​បណ្ដុះ​បណ្ដាល​វិជ្ជាជីវៈ បានលើកឡើងថា ការផ្សព្វផ្សាយរហូតមកដល់ពេលនេះ កត់សម្គាល់ឃើញថា ពិត​ជាមានការចាប់អារម្មណ៍យ៉ាងច្រើន ពីសំណាក់យុវជន សិស្ស និស្សិត ក៏ដូចជា​អ្នក​កំពុង​ស្វែង​រក​ការងារ​ល្អ​ធ្វើ។ លើសពីនេះទៀត ក៏ទទួលបានការ​សាកសួរ​ព័ត៌មាន​អំពី​ឱកាស​ការងារ​ក្នុង​វិស័យ​ផ្សេង​ៗ​ជា​ច្រើនផងដែរ។

លោកបានឲ្យដឹងទៀតថា នៅឆ្នាំ២០២៥ខាងមុខនេះ ភ្នាក់ងារជាតិមុខរបរ និងការងារ (NEA) នឹង​ពង្រីកការផ្សព្វផ្សាយឲ្យកាន់តែច្រើនជាងនេះថែមទៀតទាំងនៅរាជធានីភ្នំពេញ ក៏ដូច​ជា​តាម​បណ្តា​ខេត្ត។ ក្នុងនោះ​ក៏នឹង​មាន​បន្ថែម​ទៀត​នូវ​ការ​ចុះផ្សព្វ​ផ្សាយ​ដល់​មូលដ្ឋាន​រស់នៅ​របស់​ប្រជា​ពលរដ្ឋ និងកម្មករនិយោជិត។ ដោយឡែក សម្រាប់សាលារៀនថ្នាក់អនុវិទ្យាល័យ និងវិទ្យាល័យ​ផ្សេង​ៗ​ទៀត NEA ក៏គ្រោងនឹងពង្រីកដូចគ្នា ដើម្បីឲ្យសិស្សានុសិស្ស ទទួលដឹង​អំពី​របៀប​ក្នុង​ការ​ត្រៀម​ខ្លួន​យ៉ាងណា ដើម្បីបន្តការសិក្សាទៅថ្ងៃខាងមុខឲ្យស្របទៅនឹងខ្លួនពួកគាត់ជាដើម។

លោក ជិន ខិ បានបន្ថែមថា ចំពោះកិច្ចសហការក្នុងការផ្សព្វផ្សាយខាងលើនេះដែរ គិត​មក​ទល់​បច្ចុប្បន្ន​មាន​កិច្ចសហការជាមួយបណ្តាសាកលវិទ្យាល័យ និងគ្រឹះស្ថានសិក្សាចំនួនប្រមាណ២០ ហើយ​ក៏​បានកត់សម្គាល់ឃើញទៀតថា មានក្រុមហ៊ុនជាច្រើនផ្សេងៗទៀត បានស្នើ​សុំ​កិច្ច​សហការ​ជាមួយ NEA ដើម្បីបង្ហាញអំពីតម្រូវការកម្លាំងពលកម្មគ្រប់វិស័យ និងគ្រប់​មុខ​តំណែង​ផង​ដែរ​។

យោងតាមកាលវិភាគរបស់ទីភ្នាក់ងារជាតិមុខរបរ និងការងារ ការផ្សព្វផ្សាយ​ឱកាស​ការងារ​នៅ​តាម​សាកលវិទ្យាល័យ និងគ្រឹះស្ថានសិក្សានានា នៅរាជធានីភ្នំពេញ សម្រាប់ថ្ងៃទី២៦ ខែធ្នូ ឆ្នាំ​២០២៤នេះ រួមមាន៖ សាកលវិទ្យាល័យភូមិន្ទនិតិសាស្ត្រ និងវិទ្យាសាស្ត្រសេដ្ឋកិច្ច , សាកល​វិទ្យាល័យ​ភូមិន្ទ​វិចិត្រសិល្បះ , សាកលវិទ្យាល័យអន្តរជាតិ និងសាកល​វិទ្យាល័យ​បញ្ញា​សាស្រ្ត​កម្ពុជា​។ ដោយឡែក នៅថ្ងៃទី២៧ ខែធ្នូស្អែកនេះ NEA នឹងបន្ត សកម្មភាព​ចុះ​ផ្សព្វ​ផ្សាយ​ឱកាស​ការងារ​នៅ​តាម​សាកលវិទ្យាល័យ និងគ្រឹះស្ថានសិក្សានានាបន្ថែមទៀត ដែលរួមមាន៖ សាកល​វិទ្យាល័យភ្នំពេញអន្តរជាតិ , សាកលវិទ្យាល័យភូមិន្ទកសិកម្ម , សាកលវិទ្យាល័យបៀលបា្រយ , វិទ្យាស្ថាន​ជាតិ​ពាណិជ្ជសាស្ត្រ និងសាកលវិទ្យាល័យវិទ្យាសាស្ត្រសុខាភិបាល។

សូមបញ្ជាក់ថា ដើម្បីឆ្លើយតបតម្រូវការការងារ ក៏ដូចជាផ្តល់នូវដំណោះស្រាយបញ្ហាទីផ្សារការងារ រាជរដ្ឋាភិបាលកម្ពុជា បានបង្កើតទីភ្នាក់ងារជាតិមុខរបរនិងការងារ(NEA) ដើម្បីផ្តល់សេវាការងារ និង​ព័​ត៌មានទីផ្សារការងារជាសាធារណៈនៅមួយកន្លែង និងងា​យ​ស្រួល​តាមរយៈ​ប្រព័ន្ធ​ផ្សព្វ​ផ្សាយ​នានា ដូចជា តាមរយៈគេហទំព័រ www.nea.gov.kh, ហ្វេសប៊ុក , តេឡេក្រាម និងនៅតាម​មជ្ឈ​មណ្ឌល​​ការងារនៅរាជធានី-ខេត្ត និងរថយន្តចល័ត។ បន្ថែមពីនេះ មជ្ឈមណ្ឌលការងារចល័ត NEA បានបង្កើនការចុះផ្សព្វផ្សាយឱកាសការងារនៅតាមសាកលវិទ្យាល័យ និង​គ្រឹះស្ថាន​សិក្សា​នានា ឲ្យកាន់តែខិតជិតដល់យុវជន និងអ្នកស្វែងរកការងារ ដើម្បីបង្កើន​លទ្ធភាព​នៃ​ការ​ទទួល​បាន​ការងារកាន់តែឆាប់រហ័ស៕ អត្ថបទ៖ ឈិត បូរ៉ាវី