សម្ដេចធិបតី ណែនាំឱ្យគិតគូររៀបចំកន្លែងតម្កល់ស្នាដៃស្រាវជ្រាវរបស់និស្សិត ទុកជាកន្លែងស្រាវជ្រាវ

ក្នុងឱកាសអញ្ជើញជាអធិបតី ចែកវិញ្ញាបនបត្រ និងសញ្ញាបត្រជូនសិស្សថ្នាក់វិជ្ជាជីវៈ និងនិស្សិតជ័យលាភីសាកលវិទ្យាល័យធនធានមនុស្ស នាព្រឹកថ្ងៃទី២៦ ខែធ្នូនេះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំដល់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ឱ្យគិតគូររៀបចំកន្លែងតម្កល់ស្នាដៃស្រាវជ្រាវរបស់និស្សិតទុកជាកន្លែងស្រាវជ្រាវសម្រាប់និស្សិត និងកូនខ្មែរជំនាន់ក្រោយ។

សម្ដេចធិបតី នាយករដ្ឋមន្រ្ដី បានមានប្រសាសន៍ថា ការសិក្សាស្រាវជ្រាវនឹងជួយរួមចំណែកដល់ការប្រែក្លាយទ្រឹស្ដី ដែលបានសិក្សានៅក្នុងថ្នាក់រៀនទៅជាការអនុវត្តជាក់ស្ដែងនៅកន្លែងការងារទាំងវិស័យសាធារណៈ និងឯកជន។ ហើយលទ្ធផលនៃការសិក្សាស្រាវជ្រាវអាចជាធាតុចូលដ៏សំខាន់ សម្រាប់គោលនយោបាសង្គមសេដ្ឋកិច្ចរបស់ជាតិហើយលទ្ធផលនៃការសិក្សាស្រាវជ្រាវទាំងនេះ ត្រូវបានលើកទឹកចិត្តឱ្យបោះពុម្ពនៅក្នុងទស្សនាវដ្ដីវិទ្យាសាស្រ្ដ ជាពិសេសទស្សនាវដ្ដីវិទ្យាសាស្រ្ដទាំងនៅក្នុងតំបន់ និងអន្តរជាតិនាថ្ងៃអនាគត។

ក្នុងឱកាសនោះសម្ដេចធីបតី បានណែនាំដល់និស្សិតជ័យលាភីទាំងអស់ បន្តខិតខំសិក្សាស្រាវជ្រាវបន្ថែមទៀត ទាំងចំណេះដឹង ជំនាញ បទពិសោធន៍ សីលធម៌ និងការទទួលខុសត្រូវដែលជាសសរស្ដម្ភដ៏រឹងមាំសម្រាប់អនាគតរបស់និស្សិតគ្រប់រូប។ ហើយនិស្សិតជ័យលាភីទាំងអស់គួរចាំថាចំណេះដឹងដែលទទួលបាននៅក្នុងការសិក្សាមិនទាន់គ្រប់គ្រាន់នៅឡើយ គឺចាំបាច់ត្រូវគួបផ្សំជាបទពិសោធការងារជាក់ស្ដែងនៅក្នុងគំនិតច្នៃប្រឌិត នវានុវត្តន៍ស្របតាមស្ថានភាព និងកាលៈទេសៈថែមទៀតទើបមានលក្ខណៈសម្បត្តិគ្រប់គ្រាន់ក្លាយទៅជាបុគ្គលដ៏មានតម្លៃសម្រាប់ការងារនៅក្នុងស្ថាប័ន និងមានប្រយោជន៍សម្រាប់សង្គមជាតិ៕អត្ថបទ៖ វ៉ន ដារ៉ា