ឯកឧត្តម ឌិត ទីណា ស្នើដៃគូពាក់ព័ន្ធឲ្យចូលរួមសហការក្នុងការ​បង្រ្កាប​បទល្មើស​ខុសច្បាប់​នានា​ដើម្បី​អភិរក្សសត្វកម្រ

ភ្នំពេញ៖ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បាន​លើក​ទឹក​ចិត្ត​ដល់​ថ្នាក់​ដឹកនាំថ្នាក់ជាតិ ថ្នាក់ក្រោមជាតិ និងដៃគូភាគីពាក់ព័ន្ធទាំងអស់ ត្រូវចូលរួម​សហការ​គ្នា​ក្នុង​ការ​បង្រ្កាបបទល្មើសខុសច្បាប់នានាទាំងសកម្មភាពជាក់ស្តែង និងនៅតាមទីផ្សារ ដើម្បី​និរន្តរភាព​ធនធានជលផល និងជាគុណប្រយោជន៍ទាំងមូលរបស់ប្រទេសជាតិ។

ក្នុងឱកាសអញ្ជើញបិទកិច្ចប្រជុំបូកសរុបការងារអនុវិស័យជលផល កាលពីរសៀលថ្ងៃទី២៥ ធ្នូ ឆ្នាំ​២០២៤នេះ ឯកឧត្តមរដ្ឋមន្រ្តី បាន​លើក​ឡើង​ពី​គោល​នយោបាយ​អាទិភាព​ក្នុង​វិស័យ​កសិកម្ម​ក្នុង​ធានា​ឱ្យ​បាននូវសន្តិសុខស្បៀង និងនិរន្តរភាពសេដ្ឋកិច្ច និងបរិស្ថាន ធ្វើយ៉ាងណាឱ្យប្រជាពលរដ្ឋ មាន​ហូប មានប្រើ មានបន ិងមានហូត។ ក្នុងនោះដែរ ឯកឧត្តម បានជំរុញ​ឲ្យ​រដ្ឋបាល​ជល​ផល​ត្រូវ​ស្វែងយល់ និងកំណត់ទិសដៅពីដំណាក់កាលនីមួយៗឱ្យបានច្បាស់លាស់ និងត្រូវចេះ​ច្នៃ​ប្រឌិត​ ក្នុងគោលដៅជួយលើកកម្ពស់ប្រជានេសាទ ឱ្យមានហូបគ្រប់គ្រាន់តាមរយៈការធ្វើនេសាទ និង​មានបានតាមរយៈការជំរុញការងារវារីវប្បកម្ម ព្រម​ទាំង​អាច​កែច្នៃ​ផលិត​ផល​ប្រកប​ដោយ​គុណភាព​ល្អ មានអនាម័យ សុវត្ថិភាព និងមានតម្លៃបន្ថែមខ្ពស់។

ក្នុងឱកាសនោះ​ដែរ ឯកឧត្តមរដ្ឋមន្រ្តី បានសម្ដែងកោតសរសើរ និងវាយតម្លៃខ្ពស់​នូវ​កិច្ច​ខិតខំ​ប្រឹង​ប្រែង និងការយកចិត្តទុកដាក់អនុវត្តការងារជាក់ស្តែងរបស់ថ្នាក់ដឹកនាំ និងមន្រ្តី​រាជការ​គ្រប់​ជាន់​ថ្នាក់​នៃ​រដ្ឋបាលជលផល ជាពិសេសការងារអភិរក្សធនធានជលផល និងធនធានកម្រទឹកសាប និង​សមុទ្រ រហូតទទួទលបានលទ្ធផលជាវិជ្ជមាន តាមរយៈការវិលត្រលប់មកវិញនូវអណ្តើកហ្លួង ផ្សោត​ទន្លេមេគង្គ ផ្សោតឃ្លៀច ផ្សោតផ្កាឈូក ជ្រូកទឹកជាដើម ដែលសុទ្ធ​សឹង​តែ​ជា​ធនធាន​ជល​ផល​កម្រ និងខ្លះកំពុងរងគ្រោះជិតផុតពូជ។

ទន្ទឹមនឹងនេះដែរ ឯកឧត្តមរដ្ឋមន្រ្តី ឌិត ទីណា ក៏បានផ្តល់អនុសាសន៍​ណែនាំដ​ល់​​អង្គ​ពិធី​ត្រូវ​យក​ចិត្ត​ទុក​ដាក់​ជំរុញការងារវារីវប្បកម្ម កៀរគរគម្រោង និងវិស័យឯកជន ចូលរួមវិនិយោគ ដោយ​សហការផ្តល់ជំនួយបច្ចេកទេស សំដៅដល់ការអភិវឌ្ឍវារីវប្បកម្មគ្រប់ប្រភេទ ការងារ​ធាតុ​ចូល​ជល​ផល និងតម្រូវការហេដ្ឋារចនាសម្ព័ន្ធនានា។ ការថ្លឹងថ្លែងពីតម្រូវការ និង​ការ​ផ្គត់ផ្គង់​ឱ្យ​បាន​ច្បាស់​លាស់​ត្រឹមត្រូវ ពង្រឹងនូវខ្សែចង្វាក់តម្លៃដោយផ្សាភ្ជាប់ជាមួយវិស័យឧស្សាហកម្ម ពាណិជ្ជកម្ម និង​ទីតាំងម្ហូបអាហារនានា ក៏ជាការងារសំខាន់ដែលរដ្ឋបាលជលផលត្រូវកចិត្តទុកដាក់ផងដែរ ចំពោះ​ការផ្តល់សេវាសាធារណៈ ឯកឧត្តម ជំរុញការធ្វើឌីជីថលូបនីយកម្ម ផ្ដល់សេវា​កម្ម​ដល់​សាធារណ​ជន​តាមប្រព័ន្ធអនឡាញ ដែលមានភាពងាយស្រួល ទាន់ពេលវេលា និងមាន​ការ​គ្រប់​គ្រង​ច្បាស់​លាស់៕