សិល្បករ សិល្បការិនី តារាចម្រៀង ហាត់សមសម្ដែងសិល្បៈបុរាណ-សម័យ​សម្រាប់​ព្រឹត្តិការណ៍​«សាទរកម្ពុជា»

សិល្បករ សិល្បការិនី មកពីក្រសួងវប្បធម៌ និងវិចិត្រសិល្បៈ ផ្នែករបាំបុរាណ-សម័យ តារាចម្រៀង និង​ក្រុមយុវជនស្ម័គ្រចិត្ត កាន់តែមមាញឹកហាត់សមសម្តែងសិល្បៈបុរាណ សម័យ និងចម្រៀង ត្រៀម​សម្រាប់ប្រារព្ធព្រឹតិ្តការណ៍សាទរកម្ពុជា។

ព្រឹត្តិការណ៍សាទរកម្ពុជា នឹងធ្វើឡើងនៅថ្ងៃទី៣១ ខែធ្នូ ឆ្នាំ២០២៤ នៅបរិវេណ​សួនច្បារ​ខាង​មុខ​ព្រះ​ប​រមរាជវាំង។ ព្រឹត្តិការណ៍ដ៏ធំនាចុងឆ្នាំនេះ នឹងមានកម្មវិធីកម្សាន្តបុរាណ-សម័យ​ចម្រុះ​ជា​ច្រើន ហើយនឹងមានការដង្ហែក្បួនដ៏ធំ មានមនុស្សចូលរួមប្រមាណ៣០០០នាក់។ ជាក់ស្តែង​នា​ល្ងាច​ថ្ងៃ​ទី២៦ ខែធ្នូ ឆ្នាំ២០២៤ សិល្បករ សិល្បការិនី តារាចម្រៀង និងក្រុមយុវជន​ស្ម័គ្រ​ចិត្ត​ជា​ច្រើន​ផ្នែក បានមកចូលរួមហាត់សមសម្តែងរបាំ ព្រះសុភក្ត្រមគ្គលា (ក្រុមសិល្បករក្រសួងវប្បធម៌ និង​វិចិត្រសិល្ប: ចំនួន៤៦នាក់) ស្វាសន្ធិត/ភពស្វា ដោយក្រុម​ខ្មែរ​បារាំង​(សមាគមទេពមនោរម្យ) និងក្រុមយុវជនស្ម័គ្រចិត្ត មកចូលរួមហាត់សមសម្តែង​ច្រៀងបទ​«ក្រោម​ទង់​ជាតិតែមួយ» ដោយលោក សុខ សម្បត្តិ សម្រាប់​ព្រឹត្តិការណ៍​សាទរកម្ពុជា​នះ​ងដែរ​

«សាទរកម្ពុជា» ត្រូវបានផ្តួចផ្តើមឡើងក្នុងគោលបំណង ផ្សារ​ភ្ជាប់​ប្រជាជនទៅ​សង្គម​ជាតិ​ទាំង​មូល ​ដែលក្នុងនោះតាមរយ:ការរៀបចំព្រឹត្តិការណ៍ និងកម្មវិធីនានា «សាទរកម្ពុជា» នឹង​បង្ហាញ​ក្នុងនាម​ជាប្រជាជាតិមានអាយុកាលដ៏យូរលង់ នៅថ្ងៃនេះកម្ពុជាកំពុងឈរដោយមោទនភាព ពោរ​ពេញដោយក្តីសង្ឃឹម និងមានភាពជឿជាក់ រួមគ្នាឆ្ពោះទៅកាន់អនាគតដ៏រុងរឿងរបស់ជាតិយើង។ ផ្តល់​ជាវេទិកា និងឱកាសដល់គ្រប់កោសិកា គ្រប់ស្រទាប់វណ្ណៈ គ្រប់សហគមន៍ និងមជ្ឈ​ដ្ឋាន​ផ្សេង​ៗ នៃសង្គម បង្ហាញនូវមោទនភាពចំពោះអត្តសញ្ញាណរបស់ខ្លួន និងជាពិសេស​ចំពោះ​អត្ត​សញ្ញាណ​ជាតិ​ជារួម ដែលជាអ្វីធ្វើឱ្យខ្លួនយើងមានមោទនភាពក្នុងនាមជាខ្មែរក្រោម «ទង់​នៃ​ព្រះរា​ជា​ណា​ចក្រកម្ពុជា» ដោយការរួបរួម សាមគ្គី ឯកភាព ជាកម្លាំងជាតិតែមួយ។ បង្កើន​មនោ​សញ្ចេត​នា​រ​វាងប្រជាជន និងនៃប្រជាជាតិកម្ពុជា ទោះនៅក្នុងប្រទេស ឬនៅឯនាយសមុទ្រ ក្នុងការ​អបអរ​សាទ​រ​ក្នុងនាមជាមហាគ្រួសារខ្មែរតែមួយ អនាគតតែមួយដើម្បីកម្ពុជា នៅក្រោម​ទង់​ជាតិ​តែ​មួយ​ហើយ​ដែល​មានអនាគតតែមួយដើម្បីកម្ពុជា។

សូមបញ្ជាក់ផងដែរថា ព្រឹត្តិការណ៍នេះនឹងរៀបចំ “ក្បួនដង្ហែសាទរកម្ពុជា” មាន​អ្នក​ចូល​រួម​ប្រមាណ ៣០០០នាក់ ដែលនឹងចាប់ផ្តើមចេញ ដំណើរពីចំណុចកែងរវាងវិថីព្រះអង្គហស្សកណ្ឌ (ផ្លូវ១៤៤) នឹងតីរវិថីព្រះស៊ីសុវត្ថិ មកកាន់សួនច្បារមុខព្រះ បរមរាជវាំង។ ក្បួនដង្ហែនេះនឹងនាំមកនូវអត្ថន័យជាក់លាក់នៃព្រឹត្តិការណ៍ “សាទរកម្ពុជា” គឺការអបអរ​សាទរ​ដល់​សង្គម​មួយ ដែលប្រកបដោយភាពរស់រវើក ជាមួយនឹងការបង្ហាញវិសេសភាពនៃអត្តសញ្ញាណ និង​ការ​លើកតម្កើងមោទនភាពក្នុងភាពជាប្រជាជាតិមួយ៕ អត្ថបទ រដ្ឋា