ពលរដ្ឋរាជធានី-ខេត្តលើកឡើងថាតាមរយៈព្រឹតិ្តការណ៍«សាទរកម្ពុជា» ខ្មែរត្រូវស្រឡាញ់ខ្មែរ ខ្មែរជួយខ្មែរឲ្យកាន់តែថ្កុំថ្កើន

បងប្អូនប្រជាពលរដ្ឋរស់នៅរាជធានីភ្នំពេញ និងមកពីបណ្តាខេត្ត ដែលបានមកចូលរួម​ទស្សនា​ការ​រៀបចំ​ព្រឹតិ្តការណ៍សាទរកម្ពុជា នៅសួនច្បារមុខព្រះបរមរាជវាំង បានថ្លែងប្រាប់ BTV ព័ត៌មាន នា​រា​ត្រី​ថ្ងៃ​ទី៣០ ខែធ្នូ ឆ្នាំ២០២៤នេះថា កត្តាសុខសន្តិភាពពេញផ្ទៃប្រទេស ហើយកម្ពុជា​បាន​រៀបចំ​ព្រឹតិ្តការណ៍​«សាទរកម្ពុជា» ដូច្នេះខ្មែរត្រូវតែស្រឡាញ់ខ្មែរ ខ្មែរជួយខ្មែរឲ្យកាន់តែថ្កុំថ្កើន។

ប្រជាពលរដ្ឋរស់នៅរាជធានីភ្នំពេញ និងមកពីបណ្តាខេត្ត បានលើកឡើងស្រដៀងគ្នាថា ថ្ងៃនេះ​ពួក​គាត់​បាននាំក្រុមគ្រួសារមកទស្សនាកម្សាន្តនៅសួនច្បារមុខព្រះបរមរាជវាំង ដោយមាន​ការ​ហាត់​សម​សម្តែងពីក្រុមសិល្បករ សិល្បការិនី និងក្រុមយុវជនស្ម័គ្រចិត្ត លើទម្រង់សិល្បៈបុរាណ សម័យ ជាច្រើនទម្រង់។ ពលរដ្ឋបានលើកឡើងថា ក្រោយបានទស្សនាផ្ទាល់ ពិតជាមាន​អារម្មណ៍​រំភើប​សប្បាយចិត្តជាខ្លាំង ដោយឃើញមានការរៀបចំផ្តោតសំខាន់លើវប្បធម៌ អរិយធម៌ រួម​បញ្ចូល​គ្នា ដើម្បីផ្សព្វផ្សាយជូនដល់ភ្ញៀវទេសចរក្នុស្រុក និងភ្ញៀវទេសចរបរទេស។

សូមបញ្ជាក់ផងដែរថា «សាទរកម្ពុជា» ជាព្រឹត្តិការណ៍អបអរសាទរសង្គម និងគុណតម្លៃរួមគ្នា ដែល ស.ស.យ.ក.ធ្វើឡើងដើម្បីបង្ហាញមោទនភាពចំពោះសមិទ្ធផល នៃការ​អភិវឌ្ឍន៍​សង្គម​សេដ្ឋកិច្ច និងផ្សារភ្ជាប់ប្រជាជនទៅសង្គមជាតិ តាមរយៈកម្មវិធីនានា។ ព្រឹត្តិការណ៍សាទរកម្ពុជា នឹង​ធ្វើឡើងនារាត្រីឆ្លងឆ្នាំសកល ថ្ងៃទី៣១ ខែធ្នូ ឆ្នាំ២០២៤នេះ ឆ្លងចូលឆ្នាំ២០២៥។ ក្នុងនោះមានកម្មវិធីជាច្រើនដូចជា៖ ក្បួនដង្ហែ​បែប​វប្បធម៌​ប្រពៃណី​ជាង​១០​ក្បួន,​ផែន​តន្រ្តី​ប្រជា​ប្រិយ​ប្រមាណ១​០ផែន និងក្បួនដង្ហែសាទរកម្ពុជា ប្រមាណ១០ក្បួនទៀត រួមទាំងកម្មវិធីកម្សាន្ត​ចម្រុះ​ជា​ច្រើនទៀតផង។ សូមបងប្អូនចូលរួមកម្សាន្ត និងជាសក្ខីភាពក្នុងព្រឹត្តិការណ៍ដ៏អស្ចារ្យ «សាទរកម្ពុជា» ទាំងអស់គ្នា៕ អត្ថបទ រដ្ឋា