រដ្ឋមន្រ្តីក្រសួងបរិស្ថាន ស្នើដល់អាជ្ញាធរ និងពលរដ្ឋចូលរួមឱ្យបានផុលផុស​ក្នុង​យុទ្ធនាការ​សម្អាត​ផ្លូវជាតិ

ដើម្បីឱ្យផ្លូវជាតិនៅក្នុងប្រទេសកម្ពុជា គ្មានសំណល់ប្លាស្ទិករាយប៉ាយ រដ្ឋមន្រ្តីក្រសួងបរិស្ថាន បាន ស្នើ​ដល់អាជ្ញាធរមូលដ្ឋាន ប្រជាពលរដ្ឋ និងសិស្សានុសិស្សជាដើមនោះ សូមចូលរួម​ឱ្យ​បាន​ផុល​ផុស​ក្នុងយុទ្ធនាការសម្អាតផ្លូវជាតិ ក្រោមប្រធានបទ «ផ្លូវជាតិគ្មានសំរាមប្លាស្ទិក» ។

តាមរយៈសារសំឡេងក្នុងតេឡេក្រាមដែល BTV ទទួលបាននៅថ្ងៃទី០៣ ខែមករានេះ ឯកឧត្តម​បណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានប្រកាសបើកយុទ្ធនាការសម្អាតផ្លូវជាតិ ក្រោម​ប្រធាន​បទ «ផ្លូវជាតិគ្មានសំរាមប្លាស្ទិក» ចាប់តាំងពីថ្ងៃទី១ ខែមករា ឆ្នាំ២០២៥នេះតទៅ។ ឯកឧត្តម​បន្តថា ការប្រកាសបើកយុទ្ធនាការនេះ ធ្វើឡើងបន្ទាប់ពីមានចលនាចូលរួមពីថ្នាក់ដឹកនាំ អាជ្ញាធរ​មូលដ្ឋានគ្រប់លំដាប់ថ្នាក់ លោកគ្រូអ្នកគ្រូ សិស្សានុសិស្ស និងប្រជាពលរដ្ឋ​យ៉ាង​ច្រើន​កុះករ ដែលបានចូលរួមក្នុងសកម្មភាពសាកល្បងសំអាតតាមដងផ្លូវនានាក្នុងពេលកន្លងទៅដូចជា ផ្លូវជាតិ លេខ៣ លេខ៤ លេខ៤១ និងលេខ ៥១ ជាដើម។

ឯកឧត្តមរដ្ឋមន្រ្តីាន្យដឹងទៀតថា ុទ្ធនាការសម្អាតផ្លូវជាតិ ធ្វើឡើង​ក្នុង​គោល​បំណង​ឱ្យ​ផ្លូវ​ជាតិ​ស្អាត គ្មានសំណល់ប្លាស្ទិកហោះហើររប៉ាត់រប៉ាយនៅតាមផ្លូវជាតិក្នុងប្រទេសកម្ពុជា នៅត្រឹមឆ្នាំ២០២៥នេះ នឹងជាការចូលរួមចំណែកលើកកម្ពស់សោភ័ណភាពទីក្រុង ទីប្រជុំជននៅតាមបណ្តាផ្លូវជាតិទូទាំងប្រទេស ឱ្យកាន់តែស្រស់ស្អាត មានអនាម័យ ខ្យល់​អាកាសស្អាត និងសណ្តាប់ធ្នាប់ល្អ ប្រកបដោយភាពទាក់ទាញ ការរស់នៅប្រកបដោយ​ផាសុខភាព ព្រមទាំងអាចទាក់ទាញអ្នកវិនិយោគ អ្នកទេសចរណ៍មកប្រទេសកម្ពុជាឱ្យកាន់តែច្រើនឡើង។ ក្រៅពីនេះ ឯកឧត្តមរដ្ឋមន្រ្តី បាន​ស្នើ​ដល់​អាជ្ញាធរមូលដ្ឋាន ប្រជាពលរដ្ឋ និងសិស្សានុសិស្សជាដើមនោះ សូមចូលរួមឱ្យ​បាន​ផុលផុស​ក្នុងយុទ្ធនាការសម្អាតផ្លូវជាតិ។

គួររម្លឹកដែរថា ក្នុងឆ្នាំ២០២៤ កន្លងទៅ ក្រសួងបរិស្ថានបានដាក់ចេញយុទ្ធនាការជាច្រើន ដើម្បី ចូល​រួមចំណែកលើកកម្ពស់សោភ័ណភាពបរិស្ថាននៅក្នុងប្រទេសកម្ពុជា ដែលក្នុងនោះរួមមាន យុទ្ធនាការ កាត់បន្ថយការប្រើប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» យុទ្ធនាការ «កម្ពុជាស្អាត ខ្មែរធ្វើបាន» និងយុទ្ធនាការផ្ទៃទឹកស្អាត ជាដើម៕ អត្ថបទ៖ ទូច សោភ័ណ