សិស្សវិទ្យាល័យបង្ហាញការយល់ដឹងច្រើនអំពីគុណតម្លៃថ្ងៃជ័យជម្នះ ៧ មករា ឆ្នាំ១៩៧៩

បណ្តាសិស្ស កំពុងសិក្សាតាមវិទ្យាល័យរដ្ឋ បានបង្ហាញការយល់ដឹងច្រើន អំពីអត្ថន័យ និង​គុណ​តម្លៃ ថ្ងៃជ័យជម្នះ ៧ មករា ឆ្នាំ១៩៧៩ បានរំដោះប្រជាជនកម្ពុជារួចផុតមហាវិនាសកម្ម នៃ​របប​បន​ប្រល័យពូជសាសន៍ ប៉ុល ពត ហើយបណ្តាសិស្សប្តេជ្ញាចិត្តថា ខិតខំរៀនសូត្រ ថែរក្សា​គុណ​តម្លៃ ៧មករា ថែរក្សាសន្តិភាព និងមិនជឿតាមពាក្យញុះញុងពីជនជ្រុលនិយម ធ្វើឲ្យខ្មែរ​បែក​បាក់​សាមគ្គី ប្រទេសជាតិគ្មានការរីកចម្រើន។

បើតាមបណ្តាសិស្ស នៃវិទ្យាល័យ ហ៊ុន សែន សេរីភាព នៅខេត្តកណ្តាល ថ្លែងប្រាប់​BTV​នៅ​ថ្ងៃទី​៦ ខែមករានេះថា ជារួមបើទោះគេកើតមិនទាន់របបប្រល័យពូជសាសន៍ប៉ុលពត តែ​គ្រប់​សិស្សានុសិស្ស​ទាំងអស់គ្នា គឺបានសិក្សា និងយល់ដឹងច្រើនពីសង្គមបច្ចុប្បន្ន តាមសារមន្ទីរ​ប្រល័យ​ពូជសាសន៍ និងការតំណាលប្រាប់ពីជីដូនជីតា ថា ថ្ងៃជ័យជម្នះ ៧ មករា ឆ្នាំ១៩៧៩ គឺថ្ងៃ​កំណើត​ទី២ របស់គាត់ ហើយបើគ្មានថ្ងៃ៧ មករា ឆ្នាំ ១៩៧៩ ទេនោះ គឺគ្មានពួក​យើង​ជា​យុវជន​ជំនាន់​កោយ និងគ្មានអ្វីៗទាំងអស់ៅថ្ងៃនេះ។

សិស្សានុសិស្សថ្លែងដែរថា សរុបមក ថ្ងៃ៧ មករា ឆ្នាំ ១៩៧៩ គឺជាសច្ចធម៌ប្រវត្តិសាស្រ្ត ដែលមិន​អាច​មាន​អ្នកណាមកបំភ្លៃ បំផ្លើស បំភ្លេច ឬបំផ្លាញបានឡើយ ហើយគេក៏​បាន​អំពាវ​នាវ​ឲ្យ​កូន​ខ្មែរ​ជំនាន់​ក្រោយ ត្រូវខិតខំរៀនយកចំណេះជំនាញអភិវឌ្ឍន៍ប្រទេសជាតិយើង និងមិនត្រូវជឿ​ពា​ក្យ​ញុះ​​​ញុង ពួកជ្រុលនិយម និងអ្នកនយោបាយ ដែលមានចិត្តគំនិតខ្មៅកខ្វក់ ប៉ុនប៉ង​បំផ្លិច​ផ្លាញ​ប្រទេស​ជាតិ និងមិនឲ្យជាតិធ្លាក់ក្នុងភ្លើងសង្គ្រាមម្តងទៀតឡើយ។

សូមបញ្ជាក់​ថា ថ្ងៃ ៧ មករា ឆ្នាំ១៩៧៩ជាថ្ងៃដែលប្រជារាស្ត្រកម្ពុជានៅទូទាំងប្រទេស បានរួច​ចាក​ផុតពីរបបប្រល័យពូជសាសន៍ ប៉ុល ពត ហើយរាជរដ្ឋាភិបាលកម្ពុជាបានកំណត់យកថ្ងៃ ៧ មករា ជារៀងរាល់ឆ្នាំជា”ទិវាបុណ្យ” ព្រមទាំងអនុញ្ញាតិឲ្យមន្ត្រីរាជការ និយោជិត កម្មករ​ក្នុង​ព្រះរាជាណាចក្រកម្ពុជា បានឈប់សំរាកចំនួន១ថ្ងៃ ក្នុងឱកាសទិវាបុណ្យនេះ៕ អត្ថបទ ស៊ុម សុខជា